Абаза уысагIв Мыхц Кьарим йысквш 70 йадахIвуата йадгалаз аршIыйара хъвлапны Ставропольшта апны йакIвшатI.
Айсан Людмила
Къарча-Черкес Республика ауагIа руысагIв Мыхц Кьарим йюбилей хъвлапны Ставрополь апны апрель а 24 атшын йакIвшатI. АршIыйара хъвлапны ацадыргалтI Лермонтов Михаил йыхьыз зхьзу Ставрополь шIыпIа анаука библиотека йгьи Ставропополь шIыпIа абазаква руагIахъа-культура жвлара «Абаза».
Абиблиотека аунашвачпагIв Долина Зинаида ахъвлапын асасчва пхата тшырзыналырхауата йгIалрайгватI. Ауи йгIалылкIгIатI йхвыцу ауагIахъаква ркультури рыбызшви ауагIа йрылагара ауысла аршIыйара хъвлапынква рмагIны швабыж йшдуу.
Ахъвлапын йалан амуниципал уысхартаква рынхагIвчва, Къарча-Черкес Республика анаука йгьи аршIыйара нхагIвчва, арыпхьагIвчва, чкIвынргIа, Мыхц Кьарим йцрикви йъахIыльчви. Айззара апны ауысагIв дгIаргвалашвахтI, йуысаква абаза йгьи урышв бызшваквала йгIарыпхьатI, йажваквала йалу ашваква рхIватI. Азал дрыпшдзатI «Алашара» адкIылара йгьи абиблиотека анхагIвчва йдрыхIазырыз астендква.
АуысагIв йбзазари йыршIыйари йауацIыхта дгIарыквчважватI апрофессор ЧкIала Пётр – АуагIахъаква ращтаныкъвара знархару аквта «Диалог» аунашвачпагIв, афилология наукаква рдоктор, Мыхц Кьарим йыршIыйара архъвыхыгIв.
«Мыхц Кьарим – абаза литература апны йагъьу дыршIыйагIвпI. АуысагIв йыршIыйара тынха йахагIвазу ауагIа рпхьадзара рыцIа-рыцIа йшалахIуш хIащтазара атахъыпI. Мыхц Кьарим йбергьльыра агIвынаква ауацIыхIхуамцара йквнагадзауата Россия акультура гьагьара дтагIгара атахъыпI», – йхIватI ЧкIала Пётр.
Ахъвлапын далан Москва йауу ауысагIв, Мыхц Кьарим йуысаква ратакIыгIв Галамага Андрей. Ахъвлапын асасчва ддйырдыруата ЧкIала Пётр «ауи йатакIра нхара» уагIахъа магIны змата йхъйаз «шIырпшыра змам нхара дудздзата» йгIаликIгIатI.
АлитературадырыгIвчва йшырпхьадзауала, Галамага Мыхц Кьарим йуысаква зымгIвалагьи йнардзата, йтамамта рцIолара, рдунейгвынгIвыща йзыгIарбатI.
«Уыса швкIы райхIа ратакIра нхара гIвысквша раъара йакIвшатI. Ари агIамта ауацIа сара Мыхц Кьаримгьи абаза уагIа шабгугьи швабыж йсаргванхатI, – йхIватI гвыхътIыла атакIыгIв. – Йшспхьадзауала, Шекспир Англия ацкIыс, Пушкин Россия ацкIыс йшдууыз апшта Мыхц Кьаримгьи й-«Абазашта» ацкIыс рыцIа ддупI. Насып дута йспхьадзитI шIырпшыра змам ари апроект сырхъйарныс ъасылшаз».
Айззара апны артшхъвагаква рырттI Мыхц Кьарим йуысаква ргIарыпхьарала йауацIыхта йакIвшаз афлешмоб «Айрышта бзи хIабашвырба!» айгIайыгIвчва. Ауи Ставрополь шIыпIа абазаква руагIахъа-культура жвлара «Абаза» аунашвачпагIв Чагва Армида дагIаджвыквцIагIвта интернет анапаква рпны февраль а 2 йгIашIарышвта апрель а 12 атшындза йакIвшатI.
Афлешмоб адгалагIв йшылхIвазла, ауи адунейла тшауацIнахтI: авидеогIвыраква Апсны, Трыквшта рбзазагIвчвагьи йгIарщтитI, уыса йгIапхьатI Таджикистан йауу астудентквагьи.
«ДахIвра дута йхIпхьадзитI абаза уысагIв йыршIыйара ауагIа йрылагара ауыс ауи аъара уагIа щарда гIадхIкIылырныс йъахIылшаз. Ауи рахIагьи хIаргвышхвитI хIкультура агIахчари атшауацIнарыхри апхъахьылагьи джьгарта хIрыдынхалырныс», – лхIватI Чагва Армида.
РахIа йшIаз апхьагIвчва ХIашвцIа Ирина йгьи Мамчуев Эмир пщысквши хвысквши йыртапI, зныбыжьла рахIа йахIбаз апхьагIвчва Ставрополь къала абазаква ркультура квта аунашвачпагIв Къвырча Владимири Ставрополь шIыпIа ауагIахъа йгьи акъазакъ уысквала акомитет аъачIвагIагIв Гребенькова Натальи ракIвын.
«Сгвы йангIаташва амщтахь ацIх шабгу срылапшуан ауысаква, швабыж йсгвапхаз ауыса «Атыдзква» саквгIашIастI. Абараса талант ду зму ауысагIв йыршIыйара сахагIвазахатI. Ужвы ауи йтынха саргьи йсчIвыта йспхьадзитI», – лхIвитI лгвы йалахIауата Гребенькова Наталья. Йапхъахауа агыларта лквнадыргатI Къарча-Черкес педагогика колледж апхьагIв Пщмахва Лиана: ауи лвидеогIвыра уагIа 2500-гIв апшытI, йыргвапхатI 1200-гIв.
Мыхц Кьарим йысквш 70 йадахIвуата йакIвшаз аршIыйара хъвлапны культура гIаншара пшдзахатI, ауи ауысагIв йталант йаргъарыз ауагIа жванзыкьыгIв пхьадзара йнадзауата йаднакIылтI. Арат амшква рагIан ауысагIв ду йюбилей йадахIвуата аршIыйара айззараква акIвшуштI Къарча-Черкес Республика апынгьи
швталра йа тшаншвцIара атахъыпI.