АААК ахабарргарта портал йапшым адуней аштаква рпны йбзазауа апсуа-абаза диаспора йрыуу агIвычIвгIвысква рхабарква гIаквнацIитI. Ари агIахIвахра ззынарху Мсыр апны апсауышвхIаква рхвитнагIаква рхчара ауысла жвлара гIанзыршаз, ауи йапрезиденту Абаза Амина лакIвпI.
Барганджиа Саид
Мсыр апны апсауышвхIаква рхвитнагIаква рхчара ауысла ажвлара S.P.A.R.E. агIаныршагIвы, апрезидент Абаза Амина лщала дапсыуапI, Каир апны дйытI. Ужвы ауи сквшы 64 дыртапI, лбзазара айхIара апсауышвхIаква рхчара йазыщтIалцIатI. Ауи акIвымкIвагьи Мсыр йауу хIабашталагIв арадиуа, ателебара рпны дынхатI, француз бызшвалагьи датакIгIвын.
Лабагьи апублицистика дапщылан. Абаза Амина йшылхIвахуала, ауи «хъацIара ду» нкъвигун, аполитикква рынхаща йымгвапхузтын рейша йырджьун.
«Ауи йгIвыраква джьгарра рылан. Сйыквчважвауа салагарквын заман щарда атахъхуштI», – лхIвитI Амина.
«ХIара азаджв азаджв хIишIырпшыпI, шваргьи хIшвапшпI»
Мсыр апны апсуаква, абазаква зымгIвагьи АбазаргIа рткъвым йаднакIылитI, йхътIыта йаратдзахьызкI нкъвыргитI – Абаза. Абаза Амина йшылхIвауала, дызуу атгIачва швабыж йацIагылитI йгьи йащтаныкъвитI.
«АщардагIв азаджв азаджв йшIырпшыпI: йхIагIапI, йхъышпI (рчважьква – хъышпI – аредакция ррытаразга), йпшдзапI, рхъахв рдыритI. ХIара швара йшвыуу щардагIвы хIрапшпI. Швара швщардагIв хъацIара нкъвыргитI, йацIагылитI, цхърагIара йазыбжу дырзыбитI», – лхIвитI Амина «лтгIачва» дрыквчважвауата, ауат лхъа рыладухауата йаталхIвахитI: «ХIара хIхъахв гIдыритI. ХIпха хIхъихырныс заджвгьи дгьахIрыхвитуам».
Ажва ахъазла, ауагIа АбазаргIа дрыуата заджвы зджьара дынхауата йыргIарыквын йырдыритI ауи кърар шынкъвигауа, йуыс йшатахъу апшта йшизырхъйауа.
«АбазаргIа рыхьыз йазцIабыргта йыздгылуа ауыс йазгIашыкъта йынкъвыргитI. ХIара хIнапа шцкьазлуш, хIцIас шгIахIхчуш хIащтапI», – йылрытаразитI хIабашталагIв.
Амина лгвы азыщтIыхта Мсыр йтабзазауа АбазаргIа йынкъвыргауа ацIасква дрылачважвитI. Ага йгвасразтынгьи, цIас бзи щарда гьынкъвыргахуам, ауаса ахIбачва бзита йырдырхитI ауат ахабзаква шаъаз.
«Сан араса йгIалгвалашвахуан: хIъахIыльчва рыуа заджв данпсра аткъвым (АбазаргIа рткъвым, адиаспора руагIа – аредакция ррытаразга) ауаъа йаъата мыш гIвынгIважва руацIа йджьабун. Ужвы зымгIва тшапсахтI, дасу йхъауыс шизыбауа акIвпI, ансимшы хIгьзабабум, ауаса атацанадылраква, апсраква рпны хIанйитI, заджв данчмазагIвхара дыгIбитI. Аткъвым рпны заджвы закIы дазыбжазтын зымгIвагьи хIйыцIагылитI. АбазаргIа йрыуу агIвычIвгIвыс цхърагIара даназыбжу заджвгьи хъатакIла дгьгIанхум», – йгIалылкIгIитI Абаза Амина.
АпсауышвхIаква йрызлыму абзибара нцIра уыста йылчпатI
Лара йшылхIвауала, ужвы Абаза Амина бзи йылбауа ауыс хъада далапI – апсауышвхIаква ргIахчара.
Ажва ахъазла, ари абзагIвра хIанадынхалуаз, ауи луакъыльква лыцта ахIаквымхарта апны Мсыр ахыгIв министркI драмакIуата атшазынархара швъаква алттI – акытмлыкврхIара аминистр, апсабара аминистр йгьи атуризм аминистр.
«Сара швабыж сгвы йаситI Мсыр апны йгIаншауа ахъазла (акъральыгIва уысхартаква рхъатала апсауышвхIаква ъагIамхчахауа ауысла – аредакция ррытаразга). Агвалымсри азальмагIари зба сгьауам, йалкIгIата йкъарусызу апсауышвхIаква ауи анрыдсылуа. Ужвы сызлачважвауа ауат ракIвпI», – лхIвитI адкIылара апрезидент.
Амина дсабийищтара апсауышвхIаква бзи йылбитI. ДанпхIвыспа хвыцызгьи лгвы гьамуазтI рыцхIагIа йалашваз апсауышвхIаква дрыгIвсырныс.
«Ауат сырчарныс, срыцхъвмарныс бзи йызбун. Спсы йадыруан знымзара-зны ауат рыхъазла закI шсхакIьуашыз. Зны акъала акъвырльыкъвхарта нхагIвчва сара сызхьпшуаз
аурам ла рщытI. Ауи йанакIвызлакIгьи йсызпшуан, апхьарта автобус сангIакIныцIхрыз йнаспыралуан. Схъатала йызгIатI уахъынлата кIьарахIвала йшсхысуаз, сара сла шуыуаз згIатI… Ауи ахъвы шкIвокIван, La Plus Belle de la Terre (Адуней апны йпшдзадзу – аредакция ррытаразга) ахьзын. Ауи агIан схвыцчван, закIгьи гьсзымчпатI. Ауаса ауаъа йнанаркIыта схъа йасхIвтI сандухара апсауышвхIаква сшырцхърагIуш», – йгIалгвалашвахитI Абаза Амина.
Мсыр апны апсауышвхIаква рхвитнагIаква рхчара ажвлара S.P.A.R.E. лхъапщыли лари асквш 2001 агIан йгIандыршатI.
«Мсыр апны апсауышвхIаква аъаща рыцхIагIата йызтагылу швабыж йсылнардзгIитI. Сара апсауышвхIаква шгIасхчуш сащтан, стдзы зоопарккI йагIвызата йцанадзыкIьара. Ауаса ауылагьи сразхауата йгьаъамызтI. УадыргIвана схъапщыла, Мишрики Рауф, дгIасайбжьатI ауралагьи сымгъынцIкIвауата ари уыста йсчпарныс. Араса йгIасайхIвтI: «ЗакI былшарныс бтахъызтын ауыс тамамта бадгыл», – йгIацылцIахитI ауи.
Абаза Амина уыста йынкъвылцауа рщарда апсауышвхIаква ргIащаквыжьра йазынархапI. Ари ауыс акIвпI ауи йлынцIра уыс хъадата йылпхьадзауа.
«АпсауышвхIаква ргIахчара ауыс бзи йызбитI, апхъахьылагьи йлысхуа ауысква ауи йазынархапI, адуней съадзакву къарута йсыму шабгу ауи йастуаштI», – лхIвитI Абаза Амина багъьата. УадыргIвана йгIацылцIахитI: «ПсауышвхIакI ансызгIащаквыжьра насып ду гIасыдахIвта йызбитI, ауаса зкьпхьадзара йнадзауата сыззынамдзаз анахьанат апсауышвхIа рыцхIаква санрызхъвыцхра анашхыйара саланахIвахитI, сгвы йыцIалхитI».
Лпсадгьыл йазынарху агвалаква
Амина зынгьи йгьылхъаштылуам Апсны, ауаса лпсадгьыл Twitter йгьи Facebook рамальквала акIвпI дшабадыруа.
«РыцIагьи аргваныта хIабадырныс, уыжвгIанчIви апсуакви хIари (Мсыр апны АбазаргIа рткъвыми – аредакция ррытаразга) хIцIасква, хIхIальшанква, хIхъызхуа аквшвауи йаквымшвауи гIбара ахъазла хIанйалара атахъыпI. Ауи швабыж йгIальаматпI. Сара зынгьи спсадгьыл апны сгьымцастI, ауаса йыздыритI хIчIвыла швабыж йшпшдзу, хIыгIвычIвгIвысква шдуу, хIайсыгIвчва хъацIара шынкъвыргауа», – лхIвитI ауи.
Ауи лхъагвы аквыта йылхIвитI адунейла йхъылапсата акъральква йыртабзазауа апсуа-абаза диаспора тшадыркIылра шатахъу.
«ЙхIылшауа зымгIва ацыхIчпара атахъыпI хIгIазлыцIыз шазакIу, хIщагаща, хIхIальшанква шаквшвауа, хIшапшу гIдырныс ахъазла хIабабара атахъыпI. Йаргьи ауи хIгвапахушта йаъапI. Швабыж магIны амапI хIащтаныкъвара. ХIара швахьыла хIызнайуаштI, шваргьи швхIызгIайырныс швылшитI. Ансисквша хгIвы-пщыгIв раъара. Ауи бзихуштI», – лхIвитI Абаза Амина лажва далгауата.
Асквш 2019 агIан Адуней апсуа-абаза конгресс ащтийыгIвчва гвып гIвымакъраль нархара уысла Мсыр йаъан. Ауаъа йъадзаныз а-Конгресс ауысхагIвчва змагIны дууыз анйара щарда акIвдыршатI, Мсыр йтабзазауа АбазаргIа рыцынхара ауысла йрангIалтI, ауат рыуа щардагIвы нбжьагIв-нбжьагIв йрыщтаныкъвауа йалагахьатI.
Амина Абаза респект ✊
швталра йа тшаншвцIара атахъыпI.