Апхьахьаква Чрыгба Вячеслави ДжьапIуа Зураби атурыхдырыгIв дудздза Генко Анатолий йхъхIвалгIата КъЧР апны йакIвшаз Адуней наука-практика конференция йшалаз апсуа журналистква йрархIвтI.
Декабрь а 3 Адуней апсуа-абаза конгресс апресс-квта апны йакIвшаз апресс-конференция апны апсуа апхьахьаква Чрыгба Вячеслави ДжьапIуа Зураби ноябрь а 25-26 рагIан Къарча-Черкес Республика апны йакIвшаз «Генко Анатолий Нестор йпи КIавкIази» Дуней наука-практика конференция йшалаз ажурналистква йрархIвтI.
Апресс-конференция гIахъылтIуата АААК анхагIвы Хагба Изольда зымгIвагьи йгIаргвалалыршвахтI Генко Анатолий дшкIакIыздырыгIв дудздзаз, афилология дшадокторыз, дшпрофессорыз, дшлингвистыз, дшфольклоразкIкIгIвыз йгьи дштурыхдырыгIвыз.
«Ага йгвасразтынгьи, Генко Анатолий йпхыцIа рыцхIагIата йцатI. Льажьа йымамкIва йхIаквым рхан йзаманыгIвата, йкъару штаркIваз атутанакътара дтапсытI. Ауи амщтахь апхьахьа йыхьыз сквшщарда руацIа зджьарагьи йгьгIарымхIвахуазтI. Апхьахьа дгIадырзахвахищтарагьи ужвы акIвпI йапхъахауата йыхьызла йапшым ауысква адыргалуа йаналага, йынхараквагьи шIыц-шIыц адуней йангIаквылхуа», – йгIалылкIгIатI Хагба.
«Генко Анатолий Нестор йпи КIавкIази» наука-практика конференция «Алашара» Дуней адкIылара агвып Алий Умар йыхьыз зхъу Къарча-Черкес къральыгIва университети Россия анаукаква р-Академия йачIву Петр Ду йыхьыз зхъу Антропологии этнографии рмузейи (Кунсткамера – аредакция ррытаразга) рыцта йадыргалтI.
Ауи «Полиглот» Дуней колледж апны йакIвшатI. Ари ауыс дагIаджвыквцIагIвхатI АААК ЙхIаракIу асовет аунашвачпагIв, «Алашара» Дуней адкIылара апрезидент Эгьзакь Мусса. Ауи йакIвпI ноябрь а 25 атшын КъЧР апны аконференция гIахъызтIызгьи.
«Генко Анатолий Нестор йпа КIавкIаз ауагIахъаква, зымгIва йрапхъатагьи – абазакви апсуакви, йырмагIну агIардырра къару ду алайцIатI», – йгIаликIгIатI ауи. Эгьзакь Мусса кьангьаш гьазгIайгуам «уахьчIва абаза уагIа йырзынарху аэтнография йгьи афилология наука злащаквгылу Генко йщтIайцIаз ащата шакIву».
Адуней наука-практика конференция йалан Генко Анатолий йнаука тынха ззырдыруа Москва, Санкт-Петербург, Ставрополь, Адыгейшта, Йынгвыщшта, Дагъстан, Къарча-Черкес, Апсны йауу апхьахьаква.
АААК ЙхIаракIу асовет апрезидиум йалу, Апсны а-Президент йуысхартаква йрыланакIуа Астратегия рхъвыхраква р-Квта адиректор, афилология наукаква рдоктор Чрыгба Вячеслав йакIвшаз аконференция КIавкIаз шабгу рыхъаз магIын ду зму культура гIаншарата йпхьадзитI.
«Сара ужвы йъагIадзазгьи Эгьзакь Мусса йбзирала йадыргалыз ауи аконференция гIальамат саларкIвазшва саъапI. Швабыж йбзипI апхьахьа джьащахъва Генко Анатолий дъархъмаштылуа. Ауи Россия, Россия апхъалагьи – Совет Союз рпны кIавкIаздырра щаквзыргылыз, Лагъь КIавкIази Апсни рпны акультура уыхвара зхъатала йапщылаз Яковлев Николай, Марр Никола, Поливанов Евгений йрапшу апхьахьа дуква рсатыр далапI. Генко йынхараква хIхIырдырпхьадза ауи йалацIара ахв рыцIа-рыцIа йхъалитI», – йхIватI апхьахьа.
Чрыгба Вячеслав ари йапшу «йауацIыху акультура гIаншара» збзиру Эгьзакь Мусса зджьара йгIанымхауата дшизыразу йхIватI.
Апсны анаукаква р-Академия апрезидент, афилология наукаква рдоктор ДжьапIуа Зураб йшипхьадзауала, «Генко Анатолий Нестор йпи КIавкIази» наука-практика конференция КIавкIаз ззырдыруа апхьахьаква Генко йынхараква тшырзынадырхата ауат рмагIны гIаргвынгIвуа йшалагуш йаквнаргвышхвушта йаъапI. Генко Анатолий йбзазари йынхари, ауыс шидыруази йгIвычIвгIвыс хIалькви дгIарыквчважвауата ДжьапIуа йгIаликIгIатI КIавкIаз ауагIахъаква рыбызшваква рырхъвыхра апны Генко йгIатгараква гIарпхьадзауата СССР анаукаква ракадемия а-Президиум йалакваз асквш 1935 агIан ауи диссертация йдымрыхчауата абызшвадырра адоктор хьзы шиквнадыргаз.
ДжапIуа Зураб йгIайхIватI аконференция апны шIыцта йгIацIцIыз «КIавкIаз аэтнография аджвыквцIага» книгагьи ауагIа йшддырбаз. АгIвыра йащатахатI асквш 1940 агIан Генко Анатолий Ленинград къральыгIва университет астудентква рыхъазла дгIазпхьаз КIавкIаз ащхъа уагIахъаква рэтнография йазынарху алекция 20.
Акнига йара ДжьапIуа Зураб, йъачIвагIалагIвчва Анчабадзе Юрий, ХIаджьым Саида, Барцыц Наала йыцта йадынхалтI. Акнига йащатахаз ашвъаква ДжьапIуа асквш 2007 агIан Санкт-Петербург апны йаъу Россия анаукаква р-Академия йачIву АмарагIайырта напIлагIвыраква ринститут ашвъащтIацIарта апны йгIайаутI.
Апхьахьа Эгьзакь Мусса анаука-рхъвыхра нхараква дырцхърагIауата уыста йхауа, Генко Анатолий йюбилей йазынархаз ауысквагьи къарута йрылайцIаз хвду рыквицIатI.
ЙгIайхIватI ДжьапIуа Зураб аконференция йащтагIайуаз амш, ноябрь а 26, Гвым кыт апны гвыргъьахъв ду адыргалта Генко йчвахъабага син шгIахъыртIызгьи.
«Сара ауи апш магIны зму ауыс съалаз схъа ду йызбахитI. Амш бзидздзан, амара гIакIкIун, асабикви чкIвыныргIи щардагIвын. Генко йсин адуней апны датша зджьарагьи йгьаъам», – йажва цIхъва айттI ауи.
Генко Анатолий йчвахъабага син аргылра гIаджвыквызцIазгьи АААК ЙхIаракIу асовет аунашвачпагIв Эгьзакь Мусса йакIвпI. Апроект ахчата йаквшвуз азалызхызгьи ауи йакIвпI.
«Генко Анатолий Нестор йпи КIавкIази» йапхъахуз Адуней наука-практика конференция алдыргауата ауи йалакваз Генко йыхьызла йапшым ауысква гIвысквшипхьадза рпны зны йадыргалларныс щаквдыргылтI.
швталра йа тшаншвцIара атахъыпI.