Къарча-Черкес Республика йауата Абашта айсра Ду агIан йкIвыршаз Ленинград гIазхчуз айсыгIвчва рхъмаштылра йадамыгъата Санкт-Петербург апны чвахъабага гIахъыртIытI.
Барганджиа Саид
Къарча-Черкес Республика йауата Абашта айсра ду агIан йкIвыршаз Ленинград зхъа азыщтIазцIаз айсыгIвчва рхъмаштылра ачвахъабага агIахътIра знархараз айззара Санкт-Петербург Пискарёв нышвынтара апны сентябрь а 5 атшын йакIвшатI. Абараса чIахI рзырчпауата рыхьызква рхIватI йкIвыршаз Ленинград агIахчагIвчва. Ауат йрылан абазаквагьи.
Ачвахъабага агIахътIра знархараз айззара йалан Санкт-Петербург авице-губернатор Метянина Анна, Къарча-Черкес а-Хъада Темрезов Рашид йгьи Адуней апсуа-абаза конгресс ЙхIаракIу асовет аунашвачпагIв, Адуней адкIылара «Алашара» апрезидент Эгьзакь Мусса.
Эгьзакь Мусса йгIаликIгIатI ари агIаншара амагIны швабыж йшдуу Санкт-Петербург абзазагIвчва зымгIва рыхъазлагьи, йалкIгIата, Къарча-Черкес йауата араъа йту рыхъазла.
«ХIцри хакв йауата Санкт-Петербург уагIа щарда табзазитI. ХIара хIыхъазла хвду амапI араъа тгIачвала хIгIайта Абашта айсра Ду агIан хI-Псадгьыл зхъа азыщтIазцIаз айсыгIвчва, йалкIгIата Ленинград ахчагIвчва, квырмыш рзыхIчпарныс. Ауи хIара хIыхъазла гIаншара дупI», – йгIаликIгIатI АААК аунашвачпагIв.
Айззара анакIвшуз ауи йалакваз датшагьи йгIаргвалашвахуата йалачважватI КъарчаЧеркес Республика Бесленей кыт абзазагIвчва рфырра. Рхъа йамайгьдзауата ауат рунагIваква рпны йкъарчIвахуан агъачвала йкIвыршаз Ленинград йгIатыргаз асабиква. Айсра асквш хьантаква рагIан араъа хъацIакIырта раутI Ленинград йауаз асабиква 32-гIв йнадзауата.
Пискарёв нышвынтара апны йгылапI Апсны йауата Ленинград гIазхчуз айсыгIвчва рчвахъабагагьи, ауи асквш 2004 май агIан йгIахъыртIытI.
Йапшым ахаквква йрыуата Ленинград йазгылаз айсыгIвчва рхъмаштылра чвахъабагаква рпхьадзара апны Къарча-Черкес айсыгIвчва рчвахъабага араъа й-101-хауата йгIахъыртIытI.
Пискарёв нышвынтара асквш 1939 агIан Ленинград алагъь дзакIьа апны йгIандыршатI, ауи ахьыз гIахъшахъыцIтI йхъарамкIва йчIваз Пискарёвка кыт. Асквшква 1941-1944 рагIан анышвынтара йыцIарцIатI Абашта айсра Ду йаладзыз щардагIвы йнадзауата.
Айщчва нышвынтара йацтарцIатI Ленинград фронт апны йщхаз айсыгIвчвагьи йкIвыршазЛенинград апны амли ахьти йыргаз абзазагIвчвагьи къомыгIвкI – зымгIва шалу уагIа зыкь 470-гIв йнадзауата (датша пхьадзарала йгIащтIыхта, уагIа зыкь 520-гIвы йнадзауата, ауат йрыланакIуата абзазагIвчва зыкь 470-гIв йгьи айсыгIвчва зыкь 50-гIв). Пискарёв нышвынтара – ЙгIвбахауа адуней айсра йаладзыз ауагIа рпхьадзара адгьыл ахъахьла йгIахвта рыцIа йщардагIвыта йъацIу нышвынтарапI.
швталра йа тшаншвцIара атахъыпI.