АААК хабарргарала ахъвшара «САРА ИСЫХЬӠУП» зхьзу апроект шIыц йадынхалтI.
Апсуа-абаза уагIахъа ргвбайара тынхи руагIахъа лкIгIаракви гIащаквыжьрала АААК анхара апкъ йтата хабарргарала АААК ахъвшара «САРА ИСЫХЬӠУП» («САРА ЙСЫХЬЫЗПI») проект ауатыкв йгIатанацIатI. Ауи АААК агвып йдрыхIазырыз, апсуа хьызква зну буклетпI. Ахьызква аъачIвагIагIвчва-этнографква рылапшын йдрыбагъьатI. Апроект мурадта йынкъвнацитI апсуа хьызква рыцIа йауацIыхта ауагIа йрылагара.
Хабарргарала ахъвшара анхагIвчва ргвы йтапI абуклетква саби дзауырныс йазпшуа апхIвысква рзгIвадара ъадырхъвыхуа ареспублика айъазартаква, апхIвысква райкьангьашыртаква, асабийыртаква ртерапия хъвшараква, алабораторияква йгьи анакьахIгIвыртаква рпны хвыдъа йыршарныс.
Абуклет ащтахьла амгвадура амшпхьадзага аныпI, ауи йхIатлу апхIвыс луацIа псахрата йыншауа, асаби йшйызхIауа, йапшым агIамтаква рхъвыхрата дгIазкIылсра атахъу-агьиква гIанахIвитI. Ахьызкви ан-абачва шIаква йрызцауа атшазынархари гIвбызшвакIла йгIвыпI (апсыуи урышви), амшпхьадзага – урышвла.
«Ага апроект джвыквхIцIахьазьынгьи, ауи ужвыгьи йхIырхъвыхуата акIвпI йшаъу. Ахьызква ауаъа йгIашIыхIпхьадзаз ацкIыс агалагьи йайхIапI. ХIара хIсайт апынгьи тып азалхIхын ауат рыцIа щардата йгIатахIцIитI. Абуклет зызгIацIхIщтыз ракIвпIта – ауат тшырзынахIырхауата зымгIва йрапхъата йзызпшуа ахвыцква ртыдзква гIадрылашарныс хIрызхIвахIвра хIтахъыпI! ГIари дзауаш ан-абачва ауи хьзыта йыхьырцIуш гIалырхырныс анырчвыбаргвхауа ншитI. Ауи уыс дупI! Асаби йбзазара апны йыхьыз магIын ду амапI: ауи акIвпI ауагIа дызларылалуашгьи йара тшызлайдыруашгьи. Йыхьыз амагIны йынцIра шабгу мгIвалагIвта йымазлуштI. ХIара йгIалхIхыз ахьызква – кIара гIазныцIуа апсуа хьыз пшдзапI. Ауат хIара хIуагIахъа лкIгIараква гIадырбитI, хIцIаскви хIгвбайари ураргванырчIвитI, абанпараква апырщылитI. Ахьызква хIара хIгвбайара тынха гIахчарала АААК апроект апкъ йтата йазхIкIкIытI. ХIгIариква йапхъахауа рчIвырхъаква рапшта ари ауысгьи пшдзаракI хIаззырцауа чIвырхъакIта йалргIатI! ХIара йазхъахIцIитI Апсни ауи ауагIи бзи йызбауа дзачIвызлакIгьи йхIчпаз йгвы йшнадзуш! ШвгIай, хIалалпIта абари йапшу, йдучвам, ауаса магIны зму чIвырхъаламца хIылкIгIараква гIащаквхIыргылхпI», – йгIалылкIгIатI апроект гIазхъвыцыз АААК хабарргарала ахъвшара аъачIвагIагIв Хвтаба Алиса.
ЗымгIва шалу абуклет хъацIа йгьи пхIвыс хьзыта 200 райхIа аншвалтI. ЙгIайуа амчыбыжь йгIашIарышвта абуклетква ареспублика азгIвадарахьпшыртаква рпны йыргуштI.
швталра йа тшаншвцIара атахъыпI.