Трыквшта йбзазауа апсуакви абазакви гуманитар цхърагIарата Апсны йгIарщтийыз ачгIвыча пхаква Гагра апны йаныргIалу ареспублика реабилитация квта йыргатI.
Барганджиа Саид
Трыквшта йбзазауа апсуакви абазакви гуманитар цхърагIарата йгIарщтийыз ачгIвыча пхаква рыуа азджьакI октябрь а 18 Гагра къала йтагылу ареспублика реабилитация квта йаъу Апсыуа уагIахъа р-Абашта айсра ныкъвадыкъвата йгIахъынхIвыхкваз йрырттI. Ауат ачгIвычаква ауат йырзыгIартийхтI Адуней апсуа-абаза конгресс йалакву. АААК архъйагIв секретарь Гицба Инар асквшква 1992-1993 йакIвшаз Абашта айсра аныкъвадыкъваква ари ауыс рзадызгалыз райхIвтI. Ауи йгIаликIгIатI а-Конгресс ауысхагIвчва апхъахьылагьи адиаспора агвчIагIв уысква йшгIарыланадыркIуаш.
Ареабилитация квта айъазагIв хъада Адлейба Валерий ацхърагIара адызгалкваз дшырзыразу райхIвтI. Ауи йгIаликIгIатI ари йапшу айгвыгIвра айсра йалакваз ргвы шахвгIауа, йшаргвыргъьауа.
ГIвадахь Осетия йауу айсыгIв Рубаев Ефрем АААК акорреспондент дгIайачважвауата ари йапшу айгвыгIвра магIын ду шаму йрыбагъьатI.
«ХIара йанакIвызлакIгьи сасра йхIызгIайквауа хIрайгвыргъьитI. Ауат анйараква ауагIа хIшырхъмаштылуа йаквшахIатхитI, хIаргьи ауи гIахIгвынгIвитI», – йхIватI ауи.
АйгвыгIври ахъмаштылри хвы шаквырцIауа гIархIватI ареабилитация квта йыцIу датшагьи щардагIвы. Ауи апшта, айсра аныкъвадыкъва Демерджипа Зураб арат йрапшу ауысква адгалра магIын ду шаму дацIачIвагъватI, ауат «айсра йалакваз шырхъмаштылуа, йшрызхъвыцуа, хвы шырзырбауа» шгIадырбауата йхIватI.
Трыквшта йбзазауа адиаспора сынчIва сентябрь агIан АААК ЙхIаракIу асовет йалу ХIапIатI АхIмад йгIаджвыквцIарала чгIвыча пха абаркIырата 1200 азыркIкIын Апсны апны цхърагIара йазыбжу ауагIа йырзыгIарщтийтI. Ауат йрыуата 400 саби чгIвычапI, 250 хъацIа чгIвычапI, 550 пхIвыс чгIвычапI. Октябрь а 4 ауат Согъвым йгIадзатI. АчгIвычаква зымгIва шIыцдзапI, ауат йъардзахуа афабрикаква – Şik Örme, HSM Tekstil, Karadağ Tekstil, Hayber Tekstil, Dark Tekstil, Espira Tekstil, Anemon Tekstil, Berfin – знапIыцIакву йшгIарыртуаз рейша Апсны йгIаргтI.
швталра йа тшаншвцIара атахъыпI.