АхъатачIв азкIкIра йгIалху асуратгIвгIвы Бубнова Варвара йкъытхаз лынхараква ргIарбарта Москва Цветаева Марина лмузей апны йгIахъыртIытI.
Барганджиа Саид
Апсны сквшы 20 райхIа йтабзазаз йбергьльу асуратгIвгIвы Бубнова Варвара лынхараква ргIарбарта Москва Цветаева Марина лмузей апны йгIахъыртIытI. «Бубнова Варвара. Аурышв авангард йгьи аяпон цIасква» - араса йзхьзу агIарбарта аурышв суратгIвгIвы Япония апни Апсны апни данбзазуз агIан йылчпата ужвы йкъытхаз лынхараквала йадгалапI.
Бубнова Варвара лчкIвынхъа асквшква совет власть ащаквгылра йаквшватI, ауи Япония дцахын ауаъа лынцIра айхIара дбзазатI, ацIыхъва СССР дгIацапахын Согъвым дтан.
АгIарбарта дахъпшылыгIвпI асуратгIвгIвы, азъазарадырыгIв, Бубнова йалрыпхьаз Лозовой Александр. Ауи агIарбарта ахъазла йгIайгтI асуратгIвгIвы дызларшIыйуз аъамапсымаква, лнапIлагIвыра йгьи лынхараква ркаталог.
«Согъвым апны ауи (Бубнова Варвара – аредакция ррытаразга) лпсып йгIванхауата тшгIаунащтхтI. Лныбыжьла сквшы 80 лхъыцIуан, ауаса лыршIыйара апны ауи агIамта зымгIва йрагъьын, рыцIа йнардзан йгьи йлашаран», - араса йпхьадзитI азъазарадырыгIв.
АсуратгIвгIвы Япония данбзазуз агIамта гIахIахвырквын, уахьчIвала лынхараква рунашва аламкIва йпасу лсуратква зджыпха йтагылата йылчпуз аурышв авангард знархару гIвыракIгьи ауи акъраль апны йгьгIаквымшвастI.
Лозовой Александр йшгIацицIахызла, агIарбарта гьауацIыхым: ауи ахъатачIв азкIкIра йгIалхта йызладгалу анхараква 14 ракIвпI йнадзауа.
АзкIкIра атурых кIьыдапI, гIальаматрагьи алапI. Согъвым данбзазуз агIан Бубнова Варвара лсуратква лыгIвза согIата йылтуан, дызлайыхIвузгьи закIзаджвыкI акIвын: ауат зынгьи Россия йтрымгарныс. Лозовой йшгIаликIгIазла, азкIкIра ЙгIвбахауа адуней айсра агIамта хьантагьи йгIахъшвалын Анчва йбзирала йгIащаквхатI.
Ужвы асуратква разкIкIра зчIву, агIарбарта ахъазла лынхараква гIарызтыз Барашков Кирилл йшихIвазла, Бубнова лсуратква ргIарбартаква щардала йгьакIвшум, ауаса йгьапышвтуам.
«Асквш 1970-ква рагIан ауи апш гIарбарта акIвшатI Пушкин йыхьыз зхьзу азъазараква рмузей апны, жвасквша рапхъала – Третьяков йгалерея апны. Йапымшвтуата, хысквша рпны зны Бубнова лгIарбартаква адылгалитI Агрба Щазина (Москва аршIыйара галерея «Щазина» агIаныршагIвы, культура знархару Искандер Фазиль йдуней фонд «АгIвычIвгIвыс йгыларта» аунашвачпагIв – аредакция ррытаразга)», - йхIватI Барашков.
Агрба Щазина, лара лхIваща, сквшкъомкI цIитIта «Варвара Дмитрий йпхIа лтынха ауагIа йшрылалгуш» дащтапI.
«Бубнова Варвара – щардала уызнымйалауа дсуратгIвгIвын, лдырраква хъата щардала йалата йцIолан, лъадаб агIмыста цIас пшдзала йщаквгылан. Ауаса зымгIва рацкIыс йджьащахъваз этика хIагIара ду зхцIараз лгIвычIвгIвысагIа акIвын. Ауи лшан зынгьи дгьамайжьатI, ага лынцIра баргвыра щардала йырчвызтынгьи. Уыжв азаман ауи амагIны швабыж йдупI, ауагIа рарыпхьара апынгьи агIвычIвгIвысагIа анкъвгара ауыслагьи йхIаракIу швапха пшдзапI», - лхIватI Агрба.
Ауи йшылхIвазла, агIарбарта йалу лсураткI, асквш 1922 агIан йгIаншаз лынхара «Маска», ауи аъара йджьащахъвапIта «кIьыдата йуырхъвыхырныс йаквнагитI».
Бубнова Варвара Ленинград апны дйытI (асоветква рзаман Санкт-Петербург араса йапхьун – аредакция ррытаразга). Ауи Петербург йтагылу аршIыйараква ракадемия дгIалгатI, «ЧкIвынргIа радкIылара» (Россия апны апхъапхъадза йгIаншаз авангард адкIылараква йрыуазакIын – аредакция ррытаразга) далан, уадыргIвана Москва йтагылу аршIыйара культура аинститут апны дынхатI.
Асквш 1923 агIан Бубнова Совет Россия дтыцIхын лахщайцIба, аскрипкасыгIв ду Анна дъабзазуз Токио дталхтI. Анна лхъапщыла, асамурай Оно йаща дипхIан Йоко Оно – асуратгIвгIвы йгьи амузыкаршIыйагIв, «Битлз» гIанзыршаз йрыуазаджвыз Джон Леннон йхъапщылаз. Йоко данхвыцыз Анна ауи амузыка дазылбжьун, Варварагьи – асуратгIвра. Бубнова Япония апны сквшы 34 дтабзазатI, уадыргIвана Апсны дталхтI.
ЛынцIрабзазара ацIыхъва Ленинград дацапахтI. Ауи лсуратква уахьчIвала йпхатшу хIкъраль йгьи агIвымакъраль музейква разкIкIраква йрылата йынкъвыргитI.
швталра йа тшаншвцIара атахъыпI.