Аюрист, аполитиканкъвгагIвы, КIавкIаз ауагIахъаква ргIальаматраква рхчагIвы, зыхьыз дута йзыргаз ачеркес Къалмых Юрий асквшква 1992-1993 рагIан акырт-апсыуа айсра анакIвшуз ахв узымпхьадзушта Апсны ауагIа швабыж йырцхърагIаз ауысхагIвчва дрыуазаджвыпI.
Капба Арифа
Йбергьльу акъральыгIва йгьи аполитика уысхагIв Къалмых Юрий асквш 1934 январь а 1 атшын Абазакт апны дйытI. Ауи акыт Черкесск километр 20 раъарала йачвыхъарата йаныргIалпI. Ашвъаква йзыгIаргIвыз Черкесск апны дйыта акIвпI йшгIадырбауа – ауи асхъан акъала Баталпашинск ахьзын (асквш 1934 агIандза Черкесск араса йапхьун – аредакция ррытаразга). Юрий йани йаби арыпхьагIвта йынхун. АчкIвын 13 сквша дыртата йан азгIва дагатI.
Юрий апхьара апны рыцIа дхъызхуаз агуманитар дырраква ракIвын. Жвыхвсквша дыртата Черкес область аквтанай медицина апхьарта дыцIалтI, ауаъа фельдшер ъачIвагIа гIацIигатI.
Аюрист йгьи арыпхьагIв: «йшаъазлакIгьи йгьайымрыпхьузтI, йуыс ззынардзахуаш гIадзынйыргылуан»
ЖвагIсквша дыртата Къалмых Юрий Калинин йыхьыз нкъвызгуз Ленинград аюрист институт аюрист факультет дастудентхатI, асквш 1957 йгIашIарышвта Жданов йыхьыз нкъвызгуз Ленинград акъральыгIва университет апны юриспруденция дапхьун. Ауниверситет дангIалга амщтахь ачкIвын Курский Д.И. йыхьыз нкъвызгуз Саратов аюрист институт аспирантура апны дапхьатI, йара ауаъа дарыпхьагIвхатI. ЙалкIгIата ауаъа акIвпI ауи юрист ъачIвагIа дъазъазахаз – Россия апны акъральыгIв хабза ауысла рыцIа йбергьыльдзаз аъачIвагIагIвчва дрыуазаджвын. Къалмых Юрий Саратов ацивилистика (къральыгIв хабза знархару анаука – аредакция ррытаразга) апхьарта дагIаныршагIвыта йырпхьадзитI.
Саратов аюрист институт апны ауи запш дгIанымшас арыпхьагIвта йыхьыз бергьыльхатI.
Абар ауи ауысла йгIвыра «Къалмых Юрий. АцIабырг ахвитнагIа» апны Дымов Адам йхIвауа: «КъральыгIв хабзала Къалмых Юрий йкурскви йнаука нхаракви акъраль аюристква рыжвлара зымгIвагьи хвду рзырбауата йаъан. Арыпхьара нхара апны ауи бзи дырбун, пIатIу йыквырцIун: апхьахьаква йызцынхауа рынбжьагIвкI йапш, астудентква – уасаражвра нкъвызгауа ахIба пшдзакI йапшта. АпхьагIвчва йшгIаргвалашвахуала, архъвыхраква йыркIылсырныс ауат зымгIвагьи Юрий ХIамзат йпа йпны йцун. Архъвыхраква зхъвыцщала йаквшвауа агIвычIвгIвысква райчважвара йапшхун. АрыпхьагIв астудент «дцIайыршвкъвалырныс» зынгьи дгьащтамызтI: йдырраква льальазтынгьи дйыцIагвун, йдыруаз атемаква ййырхIвун. АрыпхьагIв йшаъазлакIгьи йгьайымрыпхьузтI, йуыс ззынардзахуаш аъачIвагIагIвчва гIадзынйыргылуан».
Архъвыхра шIыц: аполитика амгIвала
Ахабза йанархару анаука цIолата тшахазыргIвазарныс йащтаз Къалмых Юрий ари аъачIвагIа апны адахIвра дуква гIатигатI: сквшы 34 йныбыжьта анаукаква дыркандидатхатI, сквшы 37 анихъыцI ддокторхатI. Ауаса йылахь йаныз амгIва рыцIагьи хIагIата йхъалуан: анаука, арыпхьара йгьи аюриспруденция рпны йгIанымхауата ауи аполитика йгьи акъральыгIва уыснкъвгара дадгылтI.
Асквш 1989 мартI мыз агIан Къалмых Юрий СССР ауагIа дырдепутатта далырхтI. СССР ЙхIаракIу а-Совет далан, здырраква цIолаз дюристын, ауи ахIатырла йазалхта акъраль рхабзалыхра агъьчIвра дадынхалуан. Ауи йгврыхвара СССР аналпIла амщтахьгьи йгIайрысабаптI. Асквш 1993 агIан Юрий ХIамзат йпа Россия Федерация аюстиция аминистр йъанатIа гIайызхъарцIан ауи нкъвигауа далагатI. Ари аъанатIа анынкъвигуз рыцIа йхъадаз йгIатгараква йрыуан акъраль АкъральыгIв кодекс алыхра. Ауи Россия Федерация а-Конституция алыхрагьи йхатI алайцIатI. Къалмых Юрий аминистр йъанатIа асквш 1994 агIан йнижьхтI Ельцин (Ельцин Борис – Россия Федерация йапхъахуз апрезидент – аредакция ррытаразга) Чачаншта айсра джвыквицIарныс унашва аничпа (асквш 1994 декабрь мыз агIан – аредакция ррытаразга) айрышта дъапшIагылыз ахъазла.
Йыщайдза ъану зынгьи йгьихъмаштылуазтI
Къарча-Черкес абзазагIвчва рхаквлагIв Къалмых Юрий йгIатгараква рхабар бзита йырдыруан. Рхъа йыладухун, швапхата ддыргылуан. Йаргьи – ага дчкIвынищтара йцришта дтамбзазузтынгьи – зынгьи йыщайдзаква ъану гьихъмаштылуазтI, йцри уагIахъа зынгьи йхъа гьрылйымхуазтI.
Йкнига «Алахь арыхъвартаква» апны Юрий ХIамзат йпа йгIаликIгIун: КIавкIаз апны дйытI, араъа щарда дгьымбзазатI, абызшвагьи ахабзаквагьи йдыруан, ауи атлахан ага йайшысызтынгьи йуагIахъа тшдырра щаквгылтI.
«Акыт йтазгаз агIвба-хпа сквшы руацIа суагIахъа тшдырра ажвла гIакIылстI, суагIа рылахь гIальаматра ду азызбауа сцатI. ЦIабыргыпI Щынквба Баграт йхIвауа: агIвычIвгIвыс йсабихъа – «йпсы йащайдзапI, ауи хIшангьи хIылахьгьи асайитI», – йгIвитI Къалмых Юрий.
КIавкIаз ауысква йылахьгьи йакъыльгьи багъьата йрылалтI. Ауи ахIатырла йджьаущушта йгьаъам асквш 1991 агIан Къалмых Юрий Адуней черкес ассоциация дъахъадахаз, йащтагIайуата, асквш 1992 агIан ауи къабард уагIа рконгресс даунашвачпагIвхатI.
КIавкIаз анысла йгьи Апсны ахъазла
ЙалкIгIата арат агIвадкIыларакI йгьи йхъатала Къалмых Юрий рхатI ду алата асквшква 1992-1993 рагIан Абашта айсра анакIвшуз Лагъь КIавкIаз айщчва уагIахъаква Апсны цхърагIара ду адрайдзатI.
«Апсны апны айсра шгIалагаз аныздыр зынла Нальчик телефон сасын Адуней черкес ассоциация архъйагIв комитет рыхьызла адгьаква (ачеркесква) зымгIва аквгIазшIысттI Апсны йырцхърагIарныс. УадыргIвана схъатала Къабард-Балкъар спссгIатI, ауаъа зтахъырала айсра йпшцIалуашыз ачкIвынчва ашвъа тшанырцIауа йалагахьан», – йгIайгвалашвахитI Къалмых Юрий йара ауи йкнига «Алахь арыхъвартаква» апны.
Юрий ХIамзат йпа йадигалуаз ари ацхърагIара хвду аквицIун Апсны йапхъахуз апрезидент Ардзынба Владислав. Ауи Къалмых Юрий нбжьагIв дута, «згви зпси хътIу йгьи зталант дуу запш даъам гIвычIвгIвыста» дипхьадзун.
Абар Ардзынба Къалмых Юрий йунашва шихIвуз: «РахIа йхьантаз атлахан <…> ауи зымгIва рапхъа хIуагIахъа ргIахчара йазгылыз агIвычIвгIвысква дрыуазаджвын. Ауи агIан къабард уагIахъа рконгресс даунашвачпагIвын. Бзита йбергьльыпI ауи ашвхIаусыгIвала дагIадмырбауата зъара йыщта нкъвырцуз».
Апсны апны йгIаншуз Къалмых Юрий быжь дула йхътIыта США апынгьи даквчважватI, Атланта къала апны асквш 1993 агIан Лагъь КIавкIаз аъащата йызтагылу знархараз адуней конференция акIвшауата. Аконференция йадгалагIвын Картер-квта (Картер-квта – асквш 1982 агIан США аэкс-президент Джимми Картер йгIанйыршаз хIаракьатра нкъвзымгауа аправительства йырчIвым адкIыларан – аредакция ррытаразга).
Аполитолог йгьи акъральыгIва уысхагIв Акаба Нателлагьи ауаъа даъан, ауи Апсны ателебарала дгIачважвауата араса йгIалгвалашвахитI йгIаншуз: «Юрий ХIамзат йпа йквпшырала дджьаущушта чва йхъан, йажва багъьан. Американкви аконференция йалаз анахьанатгьи хъадата ауи гIальаматра злайызрымаз РФ аюстиция аминистр йъанатIа ъанкъвигуз акIвын, ауи йаццауата йгIаргвынгIвуан йгIвыра шIырпшыра шамамызгьи. Йджьаущушта уасаражвра нкъвигун, дхътIын, зажва багъьаз дгIвычIвгIвысын. ЦIабыргыта, багъьата дрыквчважватI Апсны абаргвыраква, Совет Союз аналпIла амщтахь йалыргамкIва йгIанхаз рыцхIагIа щарда. Сшхъвыцуала, ауи ауаъа йгIачважвара Апсны ахъазла магIны ду аман».
Къалмых Юрий КIьылдза МухIамад йгвы дшгIатахаз
Апсны апны айсра анакIвшуз апсыуа уагIа дырцхърагIауата Къалмых Юрий йалайцIаз йхатI ду даквчважвитI Апсны ашварагIварадара а-Совет асекретарь КIьылдза МухIамадгьи.
«Къалмых Юрий ХIамзат йпа йыхьыз адыгьа-апсыуа, ачеркес дуней апны швабыж йбергьльыпI, швабыжгьи пIатIу ду аквпI, – йгIаликIгIитI ауи. – ЙалкIгIата Къалмых Юрий йгьи Москва «Адыгэ хасэ» («черкес адкIылара» – аредакция ррытаразга) йаунашвачпагIвыз Акъбаш Борис ракIвпI айсра анакIвшуз хIадыгьа-апсыуа диаспора шабгу гIащтIызхыз, йалкIгIата ауат рахьыла акIвпI ахчала йапхъахауа ацхърагIара ду ъахьгIахIайдзаз. Сара схъатала йыздыритI ауат айсра агIан Адлер йгIатыцIта катерла Гвдауыта йшгIайыз, ахчала цхърагIара ду шрыцгIаргыз. Сара ауат сгьырнымйатI, ауаса ауи аунашва Владислав Григорий йпа (Ардзынба – аредакция ррытаразга) йхIвахуан».
Йхъатала КIьылдза МухIамад Къалмых Юрий данйабадыр айсра амщтахь акIвпI, Черкесск къала апны. МухIамад йызнымкIва дрыквшахIатын Согъвым апны Къалмых Юри Апсны аунашвачпагIвчва хIаракIкви ранйараква.
ЙалкIгIата Апсны а-Совбез асекретарь йгIайгвалашвахитI Владислав Григорий йпи Юрий ХIамзат йпи ранбжьагIвра гвапарала, пхарала йшырчвыз. ЙузымхIвушта анцIрала йгвы йгIатахатI «КIавкIаз ахыгIв пачва дуква» – Щынквба Баграт, Ардзынба Владислав йгьи Къалмых Юрий – ранйара. «ГвынгIвырапI алачIвараква рпны ауысква йанрылачважвара амщтахь апсыуа джькIахбаста йшадзхъачIвуз, – йхIвитI МухIамад. – ЙгIасгвалашвахитI ауи апш айшвакI. Йшыздырхуала, айшва апны ахIбата йчIваз Гагулиа Геннадий Леонид йпа йакIвын, ауаса ачважвараква акIвызгашуз Ардзынба Владислав Григорий йпа, Щынквба Баграт Василий йпа йгьи Къалмых Юрий ХIамзат йпа ракIвын. Йджьасщадзуз ауат агIвычIвгIвыс дуква асабиква рапш йшызгвыргъьуз, йшхътIыз акIвын. Ауи алахъвгIахъасра ауат азаджв азаджв хвду йзырбауата, аща-аща гвыхътIыла йабабун. ЙгIарымгвалашвахуазйа, йшпакьахвуаз! Айшва апны йгIакIвзыршуз асасчвагьи гвыргъьарата йрылахIаз зъарайа!»
«АгIвычIвгIвыс дуква рапш апхъахьыла йгIаншуш йзыбун»
Йшцазла, КIьылдза МухIамад Къалмых Юрий данпсы зынла йзынадзаз дрыуазаджвын. Асквш 1997 январь мыз агIан Юрий ХIамзат йпа Минводы аэропорт дгIапссгIатI, уадыргIвана Черкесск дцушын – Адуней черкес ассоциация архъйагIв комитет алачIвара дадгылныс ахъазла. КIьылдза МухIамад Черкесск даъахьан: асасырта дыгIвната Къалмых Юрий аэропорт дангIадза йзгIвадара ацакIта дшпсыз ахабар йдыртI. «Ауи Минводы аморг дшаъу ахабар аныгIдыр гвыпла тшадхIкIылын амашинаква хIрыквчIвата ауаъа хIнадзатI. Атшын тшпсщара мшын, йхъвади гIагIгхырныс ахъазла швъа щарда адгалра атахъын, зымгIва агвынхIыргIвын Юрий ХIамзат йпа аморг дгIаджвылыгIгахтI», – йгIайгвалашвахитI МухIамад.
Черкесск апны Къалмых Юрий йпсхъа аннардасуаз уагIа щарда гIайззатI, апсы рыжвгIвахъаква дрыквта ауагIа щапIыла Черкесск шабгу йрылсын йцри Абазакт йазцауа амгIва арыхъвартадза йымгIвайстI. Акыт апны ауи чIахI ду йзырчпауата йпсхъа ачIвыла йарттI.
«УадыргIвана Юрий ХIамзат йпа йхъапщыла Къалмых Октябрина йгIасалхIвхыз джьасщатI – йаджьаль шгIаргванхаз йдыршва йара йнапIыла йнышвынтара асурат йчпатI. ДгIвычIвгIвыс дууын, ауи йаквшахIатта апхъахьыла йгIаншушгьи йзыбун», – йгIаликIгIитI КIьылдза МухIамад.
Асквш 2008 май мыз агIан Черкесск апны йдыргылтI Къалмых Юрий йчвахъабага. Согъвым аурамкI ауи йыхьыз ахьызпI. СынчIва Юрий ХIамзат йпа йюбилей сквшыпI (асквш 2019 апны Къалмых Юрий сквшы 85 йхъыцIуашын – аредакция ррытаразга), Апсны Республика апны йакIвдыршуштI Апсны йанбжьагIв дууыз йгьи КIавкIаз йапа цIабыргыз ари агIвычIвгIвыс йхъмаштылра йазынарху айззараква.
АгIвыра апны йгIарысабапу агIалцIыртаква:
- Дымов Адам. «Къалмых Юрий. АцIабырг ахвитнагIа»
- Ашвъаква йгIархъыху афильм «Алахь арыхъвартаква», Черкесск телекомпания
- Ателебара фильм «КIавкIаз анамыс. Къалмых Юрий», АГТРК
- Агырба Юрий. «Йыхьыз хIхъа аладупI йгьи йхIгвырбзигапI. Ачеркес уагIа р-Прометей»
швталра йа тшаншвцIара атахъыпI.