СынчIва адзын Апсны Италия апны йакIвшауа йбергьльу ачыбджьи адуней фестиваль йалапI, ауаъа йадгалу астенд апны йгIарбапI апсуа аджьыкIа.
Барганджиа Саид
Апсуа аджьыкIа ансисквша Италия акъала Диамант апны йакIвшауа ачыбджьи адуней фестиваль апны йгIарбапI, йхIватI АААК ЙхIаракIу асовет аунашвачпагIв йуысхарта ахъада Таниа Кан. Ари йбергьльу афестиваль Апсны ъалалыз збзиру Италия йгьи ЕС рпны Апсны Республика адипломат кIьыкIвара, «Европа – Апсны» ассоциация йгьи Адуней апсуа-абаза конгресс ауысхагIвчва ракIвпI.
«Ари йапшу афестивальква урылазларныс амагIны швабыж йдупI, – араса йпхьадзитI АААК ЙхIаракIу асовет ауысхарта аунашвачпагIв. – Апсны ахъахвитра адуней акъральква зымгIва йгьацрымкIтI, ауи ахIатырла Апсны рыцIагьи уагIа щардагIв йырдырныс, тшахадыргIвазарныс ахъазла ари йашIырпшу алшараква гIарысабапра атахъыпI».
Таниа ари амаль бзигвыгъа гIаннаршауата йпхьадзитI: сквшы 27 рурала йакIвшауа ари адуней фестиваль ансисквша уагIа 150 000-гIв райхIа гIазнакIкIитI.
«Италия апны Апсны адипломат кIьыкIвара агIвыма къральква рпны а-Республика ахьыз бзирала йшдыргуш йащтата амаль шIыцква йырзыпшгIитI йгьи йгIарауитI. Абар ужвы Апсны ажвлара дипломатии Адуней апсуа-абаза конгресси ркъару адыркIылын хIкультура, хIцIасква, хIтурых адуней абзазагIвчва тшызларыхадыргIвазуш алшара шIыцква гIахъыртIитI», – йгIацицIахтI Таниа Кан.
Ари ауыс апны АААК ауысхагIвчва афестиваль апны йгIадырбуш апкъыгIва агIаура, астенд анхара адгалра ракIвын ргватра ззынархаз. Йара Таниа Кан йакIвпI апсуа стенд гIазырбауа, ауаъа йгIадыргалыз афачIв пкъыгIваква дрыхIазыртI ахIаракьатчпагIвчва Кортава Астамури Хьюит-Кортава Гвынди.
«Астенд зджьара йгIанымхауата йбергьыльхатI, ауагIа швабыж йыргвапхитI аджьыкIа. Ауи йахъазымкIва йацхъвлапны Диамант аквта шта апны аджьыкIа ахъгIара дырхъвыхтI. Акъала йауу амацIауыгIвчва ъазаква апсуа аджьыкIа ахъгIара хвду аквырцIатI», – йхIватI АААК ЙхIаракIу асовет аунашвачпагIв йуысхарта ахъада.
Ауи датшагьи йгIацицIахтI Диамант афестиваль йахъазымкIва Италия апны ачыбджьи йаларчпауа афачIвква ргIарбартаква щардата йшакIвшауа, ауаса «ари акIвпI адунейла рыцIа йбергьльу». Ауи йгIалалуа акъральква ансисквша йрылахIитI: Евросоюз акъральква, чыбджьи злу арызкъква бзи йъарбауа аштаква – Латин Америка, Азия, Китай, Ливия. Апсны Республика абар йапхъахауата ауи йалалтI.
Ачыбджьи адуней фестиваль анхъыргIвахуа атшын ауи йалаз зымгIвагьи ачвахъабага согIаква гIарквнадыргуштI. Афестиваль сентябрь а 15 агIандза йакIвшуштI.
швталра йа тшаншвцIара атахъыпI.