Апсны акъральыгIва университет апны йбергьльу акIавкIаздырыгIв, афилология наукаква ркандидат ПIаз Сергей йюбилей дыртлапIатI. Апхьахьа абаза фразеология архъвыхра дащатащтIацIагIвпI, ауи анархарала йхIаракIу апхьартаква рыхъазла апхьагаква йгIвытI йгьи акъральыгIва стандартква лихтI.
ЧIахIра зму АГУ апрофессор йюбилей ахьызла агвыргъьахъв айззара апсуа бызшва акафедра апны йакIвшатI. Зымш дыртлапIуз агIвычIвгIвыс йайхIвахIвырныс йгIадгылтI ауи йъачIвагIалагIвчва – Апсны анаука анхагIвчва апхъагылагIвчва.
Йайззакваз сальам райхуата тшырзынайырхатI АГУ афилологии ажурналистики рфакультет адекан Хагуш Батал. Ауи асасчва пхата йрайгватI, апхьахьа кIавкIаздырра апны йалацIара шдуугьи гIаликIгIатI.
«ХIара АГУ афилология факультет апны йгIаныршу Апсуа-адыгьа бызшваква р-Квта апны хIайззатI. Ари апещ хIыбызшва гвып йгIарыланакIуа адхIкIылырныс ахъазла йгIанхIыршатI. УахьчIва хIара пIатIу ду зквхIцIауа хIъачIвагIалагIв гвапа Сергей Умар йпа йюбилейла хIйайхIвахIвитI», – йгIаликIгIатI ауи.
Хагуш ажва лыйттI АГУ наука нхарала апроректор, афилология наукаква рдоктор Адлейба Джульетта. Ауи аюбиляр дйайхIвахIвтI йгьи аректор Гварамиа Алеко йыхьызла тшизыналырхатI. АхIвахIвра апны араса йгIалкIгIан:
«АйхIарала Алиев йыхьыз зхъу Къарча-Черкес къральыгIва университет йапщылу уара уынхара мгIва агIвычIвгIвыс анауки арыпхьари азцIабыргра рызйымата дшырзынхуш йашвапхапI. Уара афилология наукаква уыркандидатпI, Информатизация адуней академия уалапI, Апсны Анаукаква ракадемия чIахI уымата уалапI, РФ йхIаракIу ъачIвагIа арыпхьара чIахI зму уанхагIвыпIта – ауатква зымгIва сквшщарда руацIа абаза бызшва архъвыхрала уынхари КIавкIаз бызшвадырра апны йдуу уалацIари хвыта йрыму йагIарбагапI».
Аюбиляр ажва пхаква йзырхIватI йъачIвагIалагIвчва. Ауи йайхIвахIвуата йгIачважватI афилология наукаква рдоктор, апрофессор Хагба Лили, АмкIваб В.П. йыхьыз зхъу Апсуа-адыгьа бызшваква р-Квта аунашвачпагIв АмкIваб Ахра, апедагогика наукаква рдоктор, апрофессор Касландзиа Алексей, афилософия наукаква рдоктор, чIахI зму апрофессор Аджьынджьал Диана, афилология наукаква ркандидат, Апсны агуманитар рхъвыхраква ринститут адиректор, АААК ЙхIаракIу асовет йалу Ашуба Арда.
ЙгIачважвакваз зымгIва зынцIра шабгу кIавкIаз филология архъвыхра йазыназырхаз апхьахьа пIатIу ду шйыквырцIауа йацIачIвагъватI.
Агвыргъьахъв дрыпшдзатI аршIыйагIвчвагьи. АГУ афилология факультет астудентква асасчва рпахь йгIахъвмаруата апсуа йгьи абаза бызшвала ауысаква йгIарыпхьатI, ашваквагьи рхIватI.
ПIаз Сергей йгIайззаз зымгIва йгвы йгIатыцIуаз аразыра ажваква рзынайырхатI.
«Сгвы йгIатыцIуата сшырзыразу схIвитI хвду ззызбауа Алеко Алексей йпа запхъа дгылу Апсны акъральыгIва университет аунашвагIвчвагьи арыпхьагIвчвагьи. Ари аюбилей йайщчву ауагIахъакви абызшва культуракви адыркIылырныс йгIандыршаз апещ апны йъахIыртлапIауа йалкIгIу магIны амапI. ЙхIцрийу АГУ акъагIара азыстахъпI, швара дасузлакIгьи згIвадара багъьа швымазтI, анаука гIатгара шIыцква гIашвыдахIвргIатI!» – йхIватI ПIаз Сергей.
Анйара айчважвара гвапаквала, кIавкIаздырра атшауацIыхра аквчважвараквала йалгатI.
швталра йа тшаншвцIара атахъыпI.