Адуней апсуа-абаза конгресс йаланакIуа апхIвыс советква рунашвачпагIв Ардзынба Гета АААК а-Дискуссия клуб апны йхыгIвхуз дсасхатI.
Барганджиа Саид
Апсуа жвлара рпны апхIвыс лгыларта, Апсны апны агвчIагIвра уысква йгьи Адуней апсуа-абаза конгресс йаланакIуа апхIвыс советква рынхара йрыквчважватI АААК а-Дискуссия клуб апны йакIвшаз йызкьазууыз анйара апны. Ауаъа сасыта даъан анйарагьи акIвлыршатI а-Конгресс йаланакIуа апхIвыс советква рунашвачпагIв Ардзынба Гета.
А-Дискуссия клуб аунашвачпагIв Турава Ирина айззара аналагуз йгIалылкIгIатI ауаъа йшгIадгылыз абизнес, ажвлара нхара, политика, агвчIагIвра уысква рпны зуысква аквзыршвахьаз апхIвысквагьи йшIадзу ахIвссаквагьи. Турава дацIачIвагъватI анати арати райчважвара ашIаква «тахIа йцарныс, йанхарныс йаквнаргвышхвушта, ауи йаццауата даргьи рдырраква йрыладырхIауа, атгIачви анхари ацдырцарныс йачвымшвауа апхъала йымгIвайсырныс лшара шрыму днарбушта».
«АуагIа ркъаруквагьи йрызхъарцIауа, хIаргьи йхIызхъарцIауата йчпара»
АААК апхIвыс советква рунашвачпагIв Ардзынба Гетагьи анхара апынгьи здахIвраква бзийу, зытшгIва апхарагьи ззыхчауа, гIвсабичва гIадзынзыргылуа дпхIвыспI. Ауи апш щарда мцIуата Ардзынба Апсны апны йынхауа «Аквафон» сота компания апны рекламали акомпания зцынхаквауа рабадыррали ахъвшара даунашвачпагIвын. УацIыхъван лылахь Адуней апсуа-абаза конгресс дгIаланагатI. ЛгIачважвара джвыквылцIауата Ардзынба Гета апхъапхъа АААК нхара дшгIайыз лхIватI.
«Сара йсыласхIвун анхара апны закIы сшазынадзахьаз – ауи асахIат сара «Аквафон» апны 12 сквша сынхахьан. Сынхарта спсахырныс сазхъвыцуа саналага ауи агIан йадыркIылуаз Адуней апсуа-абаза конгресс ауысхагIвчва ргвып срылалырныс сызшIырттI. Ауи асахIат агвып йрылалхьан Таниа Кан, Гицба Инар, Лазба Амина, Торчуа Леван. Са йгIасгвынгIвытI ауаъа джьащахъваракI шгIаншауа. ХIара йызнымкIва хIанйатI, сара а-Конгресс ахачIвква рмагIны гIасгвынгIвырныс сащтан. Схъатала ауи анхара этнопсихология нархара амата йызбатI, йауа ухIварыквын, ауагIа разыгIальаматра гIащтIыхра, ркъаруквагьи йрызхъарцIауа, хIаргьи (АААК – аредакция ррытаразга) йхIызхъарцIауа йчпара атахъын. Йаргьи мшкIы йгIасгвынгIвытI, атынчра [апхъала съанхуз] тшгIалжвара йшагIу, абарауаса а-Конгресс апны сынхарныс щаквсыргылтI», – лхIватI аклуб асас.
ЗакIы йахъварныс зтахъу апхIвысква ауи лшарата йырзычпара
Ужвы ари агIамта хачIвыта лпахь йгылу даквчважвауата ауи йгIалылкIгIатI АААК апхIвыс советква рыхъазла рахIа йхъаду Апсны акъалакви акыткви рпны йджьгару ажвлара мгIвайсра йахъвыкIхара, йъабзазауа акыт йа акъала рбзазара ахъазла магIны зму ащаквыргылраква рлыхра йалазара зтахъу, ауаса ужвы йъагIадзаз йапшым ашвхIаусыгIваквала ауи гIаздамыхIвыз апхIвысква гIаура шакIву.
«ХIара йгIахIгвынгIвытI ауат апхIвысква хIара йшхIзыбжу – апсуа жвлара закIыла йрыхъварныс хIырцхърагIара ахъазла», – йацылцIахтI Ардзынба.
Гета АААК апхIвыс советква ралаща даквгIашIастI, ауи Черкесск апны дахIвра змата йынхауа «Алашара» жвлара адкIылара ашвапха йгIахъыхта йшлырхыз лхIватI.
«Апсны апны квта пхIвыс советгьи аъапI. УахьчIвала ауи бжьыгIвпхIвысчва алапI, ауат рахIа йджьгару агвып ракIвпI: Гвымба Аза, Барцыц Астанда, Агрба Гвынба, Амичба Илона, Квициниа КIама, Когониа Люда, БаркIал Фатима», – йгIашIылпхьадзатI Ардзынба Гета.
АпхIвыс советква йрылу Гвымба Азагьи анйара апны дгIачважватI.
«Саргьи ауи (АААК апхIвыс советква дъазшIыртыз – аредакция ррытаразга) сыззымпшуаз уысын. Апхъапхъа хIара йчпара атахъыз зымгIва гьгIахIгвнымгIвуазтI, ауаса псайспамцара а-Конгресс мурадта йаму алхIыргауа хIцатI. ХIара йацасуа гвыпта хIаъапI. ЧкIвыныргIа рсоветква хIрыцынхитI», – лхIватI Гвымба Аза.
Ардзынба Гета асквш 2020 агIан АААК уыста йахарныс йылнахызгьи гIахъылтIытI. Ауи йгIалылкIгIатI апроектквакI ужвыгьи йшрыдынхалыркIвауа, ауаса уахьчIвала йбергьльыпI Апсны АкъральыгIва баракъ амши Асабиква рхчара адуней мши йырзынархата АААК йауацIыхта уыс шаднагалуаш. Ауат ауысква апхIвыс советква джьгарта йрылазлуштI.
«Ажва гьалам, йгIайуа асквшгьи хIара Апсны ахъаз закIгьи йашIумырпшуаш гвыргъьахъвыта йалыз «Абаза» культура-спорт фестиваль атакIвхIыршахуаштI», – лажва налырдзатI Ардзынба.
«ПхIвыс» лакта зму агвчIагIвра
АААК апхIвыс советква рунашвачпагIв а-Конгресс гвчIагIчпара нархара зму ауысквагьи дрыквгIашIастI. Ауи айчважвара йгIалалтI анйара йгIадгылыз агвчIагIвчпагIв адкIылараква руысхагIвчвагьи.
Ауи апшта, «Ашана» гвчIагIвчпагIв фонд («Ашана» Апсны йауата хIатлата йчмазагIву асабиква йрайъазара ахъазла ахча азкIкIра йацхърагIитI – аредакция ррытаразга) адиректор Джьынджьолиа Мактина йшылпхьадзауала «Апсны апны агвчIагIвчпара «пхIвыс» лакта амапI». Ауи анйара йалакваз ргватра азыналырхатI АААК апхIвыс советква рунашвачпагIв «агвчIагIвчпагIв фонд йанакIвызлакIгьи йшацылкIуа».
Ауи йайхIахугьи – Ардзынба Гета хысквша цIуата «Киараз» гвчIагIвчпагIв адкIылара («Киараз» Апсны йауу атгIачва къвльейсызква йырцхърагIитI – аредакция ррытаразга) гIанзыршаз дрыуазаджвыпI. «Киараз» архъйагIв директор Гопиа КIаммагьи анйара далан, ларгьи ауи гIалрысабапын адкIылара ансисквша йакIвнаршалауа агвчIагIвчпара уыс уыжвласыла йшатадыргалуаш гIалхIватI.
«ХIара кIара йазыбжу асабиква рсальамшвъаква азхIкIкIытI. Ауат 900 раъара йнадзитI. Асальамшвъаква йызтахъу дзачIвызлакIгьи – Апсны йауаквамгьи – йнарахв йауитI. Ауаъа асабиква Асквш ШIыц агIан йзызпшуа асогIаква гIархIвитI. АсогIаква гьапшым. Зны сабикI хIвыс-хIва дахIватI. Йгьи, зынла йсхIвапIта, йзырхвгIатI ахIвыс. АйхIара йызхIвауа чгIвыча, щапIхъацIа пхапI», – лхIватI Гопиа.
Апсны апхIвысква мурадта йынкъвыргауи ауат шырзырхъйауи
Анйара далан Апсны апны йбергьльу ажвлара уыснкъвгагIв Акаба Нателла. Ауи «Апхъазамани уыжвгIанчIви замани рагIан Апсны апхIвысква ргыларта» ахьызта брошюракI лыцгIалгтI. Йапшым асквшква рагIан акъральыгIва апны аъанатIа хIаркIква змаз Акаба Апсны акъральыгIва унашвахъцIара апхIвысква мачIта йшгIаланадыркIуала лгвгIанагра лхIватI. Йара акIвпIта, ауат ауаъа рыцIа йщардагIвхара ахъазла прагылакIгьи гьаъам. Швапхата Акаба Нателла ужвы йынхауа, депутат-пхIвыста заджвзаджвыкI лахIа дызлам Апсны Республика а-Парламент гIалгтI.
Ажвлара уыснкъвгагIв йшылпхьадзауала, ари анархарала мчыта уынхара атахъыпI акъральыгIва уысхартаква рпны ахIвссаква рыцIа йшщардагIвхуш апшта. Датшагьи уаквчважварныс йгIальаматхушшва йылбауа уыскI ауатыкв йгIаталгатI ауи – «Аквырджь-апсуа айсра апны Лагъь КIавкIаз апхIвысква ралацIара».
«Са йшызбауала, АААК ахъазла ауи магIны зму уыспI. Апсны Республика а-Парламент йапхъахуз азддара санадепутатыз Ардзынба Владислав Апсны йауаз аделегация унашва рхъсцIарныс гIасыхъвдаквицIан Лагъь КIавкIаз хIцатI – зпачваква Апсны ауагIа р-Абашта айсра йаладзыз апхIвысква хIрынйарныс. ХIара хIвгвква акъвпуан. НцIрала сгвы йгIатахатI ауаъа пхата йшгIахIпылыз. Ауи анархарала рхъвыхра нхаракI акIвыршазарквын бзийын. Сара ауи сацхърагIарныс схIазырпI», – айззара йалаз лыргвыгъатI Акаба.
Аклуб алачIвара шабгу АААК YouTube канал апны швапшы йауаштI>>
Апсуа жвлара рпны апхIвыс лгыларта ауысла лгвгIанаграква лхIватI Апсны акъральыгIва университет апны йапхьауа ПапIба Ланагьи. Ауи йшылпхьадзауала уыжвгIанчIви апсуа жвлара рпны апхIвысква рмурадква гIардахIвра ахъазла прагылакIгьи гьаъам.
«Ащардала ауи зпщылу лара апхIвыс, ауи мурадта йынкъвылцауа, ауат рзынадзара магIныта йазылбауа ракIвпI», – лхIватI апхIвыспа.
А-Дискуссия клуб уалалра ахъаз йазалху анкета аджьауапква тагIвыта, рыцIа йуымагIальамату анархара гIалхта ахIвара швъа электрон адресла (discussclub@abaza.org) йущтира атахъыпI. Нархарипхьадзала тыпта йаъу пхьадзапI: ауи гIазлыцIуа аклуб алачIвараква ъакIвшалуш апещ (Лакоба йурам апны йгылу Апсны анаукаква р-Академия атдзы йапхъахауа аэтаж апны йаъу «Алашара» ауысхарта) уагIата 25-30-гIв райхIа ъагIвнамшвауа акIвпI. Ауаса уыскI аквчважвара йалазларныс зтахъкву рыцIа йщардагIвызлузтын адгалагIвчва ауи ужвыгьи зны йшаквчважвахуаш апшта лшара йазыпшгIуштI. РыцIа магIны зму анйараква ахъырхлата YouTube апны АААК аканал йгIатарцIалуштI. Аклуб алачIвара кIьыдаква рейша асоциал сетква рпны йгIадырбалуштI.
швталра йа тшаншвцIара атахъыпI.