Иордания йанаъаз АААК ауысхагIвчва йцIыхъвахауата Иордания Хашимит ПаштахIыгIва йтабзазауа АбазаргIа рткъвым йрынйатI.
А-Конгресс ЙхIаракIу асовет аунашвачпагIв Эгьзакь Мусса дызхъадаз АААК ауысхагIвчва Амман апны Иордания йтабзазауа АбазаргIа рткъвым йауу атгIачваква йрынйатI. Ауыла Иордания Хашимит ПаштахIыгIва апны АААК ранйараква алдыргатI. Пхарала йырчвыз анйара апны а-Конгресс ауысхагIвчви апсуа-абаза диаспора ргIащтийыгIвчви апхъахьыла йацыздынхалуаш ауысква лырхтI, Иордания апны адиаспора шбзазауа, а-Конгресс агIвыма къральква рпны абашталагIвчва йшрабадыруа, йшрыщтаныкъвауа йрылачважватI.
А-Черкес гвчIагIвчпара жвлара ртдзы апны акIвын анйара ъакIвшуз. Ахъвлапын гIахъитIуата ажвлара рунашвачпагIв Джанбек Зухди йшгIаликIгIазла, ачеркес адкIылара а-Конгресси Иордания апсуа-абаза диаспори рацынхара атшауацIнарыхра ауыс йацхърагIаныс йхIазырпI, йшпакIву ухIварыквын ажвлара адкIылара «Диуан Абаза» йалакву агвчIагIвчпара жвлара апынгьи джьгарта йынхитI.
«Диуан Абаза» ахъада Абаза (Чычба) ХIасангьи унашва зхъицIауа адкIылара ахьызла Иордания апны АААК анхара йацикIырныс дшхIазыру йхIватI.
«ХIара хIхIазырпI Адуней апсуа-абаза конгрессгьи Эгьзакь Муссагьи йгIаджвыквырцIауа ауысква зымгIва йрыцхIкIырныс йгьи хIшгвыгъауала, а-Конгресс аунашвачпагIв йхъвдаквцIараква йырхъйауата ауи мурадта йпахь йгылу зымгIва гIайыдахIвуаштI», – йхIватI Абаза (Чычба) ХIасан.
АААК ЙхIаракIу асовет аунашвачпагIв Эгьзакь Мусса йгIайззаз тшырзынайырхауата йшихIвазла, анйара пхата, угвы йгIатахауата йакIвшатI. Ауи Иордания апсуа-абаза диаспора «акъраль ачеркес диаспора абзазари анхари цIолата йшрыларпу» гIаликIгIатI. Ацынхара абзирала агIвдиаспоракIгьи йацIагылата рхъатачIв культури рцIаскви рзыгIахчитI.
«Иордания апны ауагIахъа хабзакви ацIаскви гьырзыгIамхчушызтI акъраль аунашвачпагIвчва гIарцымхърагIазарквын, йрыхъвуш амальква, адгалща бзиква рзыгIандмыршазарквын. Ачеркесква, апсуаква, абазаква зымгIва араса бзита дъагIарцхърагIауа, айгвыгIвра ду ъарызйыму ахъазла Иордания апаштахI сизыразпI. Кьангьаш гьазгIазгуам швара швтланыкъвалагьи (апсуа-абаза диаспора швхъаталагьи – аредакция ррытаразга) швразыта акъральыгIва зламгIвайсуа амгIва багъьата йшацшвкIуа», – йхIватI Эгьзакь Мусса.
АААК аунашвачпагIв хвду аквицIатI ачеркес телебара «Нарт ТВ» анхара», ауи ауысхарта апынгьи даъан, йшынхауа дапшытI. Ари аинтернет-канал анхагIвчва магIны рзырбитI Апсны йгIаквчважвауа ахабарква, ауат йапымшвтуата агIарысабапыгIвчва йддырбалитI (анйара аналгара ауат йгIадырбуштI АААК ахабарргарта портал ахабарквагьи – аредакция ррытаразга).
АбазаргIи йари райчважвара апны Эгьзакь Мусса адиаспора къральта йъабзазауа зымгIва рпынгьи АААК анхара йалалырквын ауи магIны ду шаму гIаликIгIатI. Ауи а-Конгресс мурадта йаму йгьи ауат дахIврала йхъйара ахъазла амальта йаъу дрыквчважватI.
«ХачIвыта хIпахь йгылапI Апсны аъаща багъьа йтагылата тшауацIнахырныс ахъазла йхIылшауа зымгIва хIчпарныс. Ауи ахIатырла хIыуа дзачIвызлакIгьи (апсуа-абаза уагIа йрыуу – аредакция ррытаразга) йкъару дамайгьдзауата йалайцIара атахъыпI. Апсны апынгьи Абазашта апынгьи хIара а-Конгресс ашIыпIа хъвшараква, ЧкIвынргIа йгьи АпхIвысква рсоветква ргIаныршарала швапха бзи хIымапI. Араъа акультура, анаука-арыпхьара, аспорт йгьи ажвлара уысква знархару апрограммаква абзазара йалагIжьитI. Ауат аштаква рбзазагIвчва рбзазарта аъащагьи рбзазащагьи уыла йгIащтIнахуата дара ркъарула йырпсахитI. Ари адгылща ауагIа ртшдыррагьи рнашхгьи апсахитI. ТшанадыркIылра йырзымчпуш шаъам йазхъарцIауа йалагитI, йшпакIву ухIварыквын агIвычIвгIвыс ауыс бзиква рырхъйара тшаназынайырхара йара йгвала пшдзаквагьи рдахIвра мгIва дыквнацIитI», – йхIватI Эгьзакь Мусса.
АААК ЙхIаракIу асовет ахъада йшгIаликIгIазла, Иордания йъадзаныз, йакIвдыршаз анйараква рымщтахь, а-Конгресс ауысхагIвчва гвып рымч рыцIагьи йалахIатI, рахIагьи джьгарта, рахIагьи йацахъуа адиаспора йрыцынхарныс гIартахъхатI.
Ащтаныкъвара, ахабарква рамдара знархару амаль хъадаква йрыуата Эгьзакь Мусса йгIаликIгIатI зынхара цIыпх сентябрь мыз агIан йджвыквызцIаз АААК ахабарргарта портал.
Ахабарргарта портал агIацIщтыгIв редактор Хагба Изольда а-Конгресс асайт апрезентация йауацIыхта йакIвлыршатI, апхьагIвчва йырзыгIаныршу амальква ашIылпхьадзатI.
«Апортал цбызшвакIла йынхитI, ауи ахIатырла адиаспораква йызтабзазауа акъральква рыбызшваквала «йгIарачважвитI». ХIара магIны ду азыгIбитI а-Конгресс анхара, акультура-спорт гIаншараква, ауагIахъа ртурых, адунейла хIабашталагIвчва рбзазара знархару ахабарква зымгIвалагьи йгвынгIвырата, ауагIа йырзынадзауата йаъазларныс. Асайт апны тшанызцIаз агIарысабапыгIвчва ауи агIвыраква йрыквчважварныс, ауахьауат акъральква рпны рабашталагIвчва йырзыпшгIарныс, йрабадырныс, дасу шIыцрата йыму амырдарныс амаль рзыгIаншитI. А-Конгресс йалалырныс зтахъу асайт йту анкета гIатырхта, йтагIвыта йгIарбу адресла йырщти йауаштI», – лхIватI Хагба.
Анйара йгIадгылыз зымгIвагьи чвалатшычпарадъа а-Конгресс анхара, ауи йызлалалуаш амальква йрызцIгIун. Асасчва йрымагIальаматын а-Конгресс алоготип йгIаныцIуа, а-Конгресс Апсны аунашвачпагIвчва йшрыцынхауа, Иордания йгьи Апсны рквтала аэкономика ацынхара адгалра ауысла амальта йаъу, датшагьи нархара щарда.
АчкIвынчва Иордания апны АААК йакIвнаршуш анхара йацхърагIарныс шыртахъу рхIватI.
«ХIкъраль апны а-Конгресс анхара тшауацIнахырныс ахъазла йхIзычпуш гIахIашвхIв? ЧкIвынргIа ауи анхара йалалта апхъанчIви псадгьыл атшауацIыхра йацхърагIарныс магIны шаму гIахIгвынгIвитI йгьи ауи асатырква хIрылалырныс хIхIазырпI!» – йхIватI адиаспора йрыуазаджву ачкIвын Абаза Махер. Эгьзакь Мусса джьауап айтуата йгIаликIгIатI йапшым апроектква рырхъйара чкIвынргIи асабикви тшангIадыркIылуа ауи магIны ду шаму.
«ЧкIвынргIа рбаргвыраква хIрыдынхалра ахъазла ауат йырмагIну гIахIрыбергьыльра атахъыпI. Ауи ахъазла чкIвынргIа хIрынйата хIрачважвара атахъыпI. Иордания апны рыцIа йджьгаркву адкIылта ЧкIвынргIа рсовет гIаныршара атахъыпI. ТшадхIкIылпIта баргвырата йзынйауа рахъвдаквыщтра ауысла апрограммаква лыхIхпI, хIацыта апхъахьыла швбзазара знархару апрограмма гIгIвыпI. ТшалахIырпата хIацынхараквын ауысквагьи сабапра ду гIарылцIуата йхIзахъвдаквыщтуаштI», – йхIватI Эгьзакь Мусса.
Анйара ацIыхъва йаннадзагьи ауагIа йамцIыцIхырныс ртахъымкIва щарда йалан, йыззцIгIуш рщардан, ауат абадыруан, апхъахьылагьи йшанйушла йангIалуан, анйара ргвы йызлагIатахуш асуратква хъырхуан.
Ари апхъала август а 24 йгIашIарышвта август а 27-дза Эгьзакь Мусса дызхъадаз АААК ауысхагIвчва гвып Иордания Хашимит ПаштахIыгIва рцара-гIайра йаланакIуата датша анйарагьи акIвдыршатI. ЙалкIгIата, ауат ажвлара адкIылара «Диуан Абаза» ауысхарта апны апсуа-абаза диаспора ргIащтийыгIвчва, Иордания ажвлара йгьи аполитика уысхагIвчва йрынйатI – Иордания а-Сенат авице-председатель Мунир Соубар, Иордания апны ачеркес чкIвынргIа радкIылара, Иордания АуагIа Айззара (а-Парламент) акIьыкIваква рпалата адепутат Мансур Сейфеддин Мурад Сжьажь, аспорт клуб «Аль Ахли Клаб» аунашвачпагIвчва. Агвып Амман апны апсуа-абаза диаспора йрыуу абзазагIвчвагьи ъапхьауа ачеркес апхьарта апны йаъан, Иордания йту ачеркес диаспора рбзазаща адунейла йгIазырбауа ачеркес интернет-канал НАРТ ТВ анхара тшахадыргIвазатI.
АААК Иордания Хашимит ПаштахIыгIва рцара-гIайра асквш 2019 аурала а-Конгресс аунашвачпагIвчва агIвыма къральква ргIарыкIвшара знархару аплан йаланакIитI. Ауи аплан асквш 2018 агIан ЙхIаракIу асовет йдрыбагъьатI. СынчIва асквш ацIыхъвадза АААК датшагьи йгIарыкIвшарныс ргвыгъапI Сирия, Германия, Голландия йгьи Трыквшта.
швталра йа тшаншвцIара атахъыпI.