Апсны Республика а-Президент Бжаниа Аслани АААК ЙхIаракIу асовет аунашвачпагIв Эгьзакь Мусси СогIвым апны йанйатI. Эгьзакь Мусса СогIвым нхара уысла даъапI. Йара ауи атшын Бжаниа АААК ауысхарта днашылтI.
Адуней апсуа-абаза конгресс ЙхIаракIу асовет аунашвачпагIв ахаша, мартI а 24, Апсны дгIайын а-Президент Бжаниа Аслан дйынйатI. Анйара СогIвым, а-Президент й-УнашвахъцIарта апны йакIвшатI, ауи цри бызшвала сальамтирала йджвыквылтI. А-Президент апсуа-абаза уагIахъа зыхьыз дута йырхIвауа абзихагIв йыгIвзакI йапш тшизынайырхатI.
«Бзиала уаабеит, Мусса Хабал-иҧа!» («Бзила уыгIбатI, Мусса ХIабальа йпа!»). Апсны – уара йупсадгьылпI, угIатгараквагьи дупI, хIара йхIгвапапI араъа уъагIайзапытуа», – йхIватI Бжаниа.
Эгьзакь Муссагьи йкьазу ангIадза апсуа бызшва йаргвану абаза бызшвала джьауап айтхтI. Анйара йалаз зымгIва агIвыджь йырхIваз рзатарымкIуатагьи йгIаргвынгIвытI.
«ХI-Конгресс анхара саквчважвара стахъыпI. А-Конгресс акъаруквагьи алшараквагьи абгата йыззынарху ауагIа шхIыргвыргъьуш, рбзазара рыцIа йшагъьхуш акIвпI», – йгIачважвара ззынархазлуш гIайырбатI Эгьзакь Мусса.
Ауи амщтахь ажурналистква джвылырщтын анйара уагIа чIыда аламкIва йакIвшатI. Ауи аналга ажвлара хабарргагаква йырзадыргалыз абрифинг апны Мусса а-Президенти йари АААК агвып проект щарда дырхъйара ахъазла лшарата йрыму йшалачважваз гIайхIватI.
«ХIара Апсны апны АААК проектта йархъйауа, ауат рыцIагьи йрыщарда, рсабапрагьи йалархIа йшауаш хIаквчважватI. А-Президент ауагIа рбзазара агъьчIвра йахъвушта йаъу зымгIва йымагIальаматпI, бзитагьи йгIайгвынгIвитI. А-Президент хIылшараква гватшныта ййырдыруан, дазцIгIун», – йхIватI Эгьзакь Мусса.
Йара ауи амш, мартI а 24, рыцIа йкIьасата Бжаниа АААК ауысхарта днашылын анхагIвчва гвып дрынйатI.
А-Президент а-Конгресс анхара йапшым анархараква унашва рхъызцIаквауа данрачважвуз Эгьзакь Мусса ари анйара ауысла агIвыджь майрадзата йшангIалыз гIаликIгIатI.
«ЙахьчIва а-Президент й-УнашвахъцIарта хIанаъаз сара Аслан Георгий йпа хIуысхарта апны сасыта дыгIбарныс анауаш [ахъаз] сазцIгIагIвацатI. Сажва салымгаскIва дадгылтI. СгвыгъитI ари йапшу анйараква цIасхушта, а-Конгресс ансисквша анхара агIарбараква хIшрылапшуа апшта. ХIаргьи йгIахIархIвуагьи хIаздзыргIвыпI, хIазхъвыцпI, ужвыгьи уыздынхал йауаш хIалапшпI», – йхIватI АААК ахъада, йгьи а-Президентгьи йаъаз зымгIвагьи тамамта йшгIаргвынгIвуаш апшта йгIацицIахтI: «АААК апроектква згIаланагауа йгьи йзархъйауа ахъаз закI шачпауа гIанарбарныс гьакIвым. Проектипхьадза гIвычIвгIвыскI, тгIачвакI, ажвлара шабгу сабапкI рызгIанагра атахъыпI. АцIыхъва хIыззгIайуа акIвпI магIны зму».
АААК архъйагIв секретарь Гьыцба Инари АААК аппарат аунашвачпагIв Таниа Кани а-Конгресс анхара анархара хъадаква, ауи алаща, аргIапсща, ашта йгьи ашIыпIа хъвшараква рынхара йаквчважватI.
АунашвачпагIвчва йгIалыркIгIатI АААК уахьчIвала Апсны апынгьи апсуа-абаза диаспора ъабзазауа акъральква рпынгьи апсуа-абаза уагIахъа рацзакIыра рыбагъьара, цри бызшва, ацIасква, агвбайара хчара йгьи тшауацIдрыхра мурадта зпахь йзыргылуа йацасуа йшгвыпу.
Бжаниа Аслан АААК агвып уыста йырхауа швабыж йджьайщатI – «Ари апш уысхарта сджвылцIхырныс сгвы йгьауам» – хIвагьи дымшыркъватI. АнхагIвчва шIаква тшырзынайырхауатагьи акъральыгIва уысхара йазхъвыцырныс дрылабжьатI, йауа ухIварыквын, ауат зуыс бзита йыздыруа йшъачIвагIагIву рылибгIатI. УацIыхъван Эгьзакь Мусса тшизынайырхатI.
«ЙгIащтIышвхуа ауысква гьмайрам. ЙджьасщитI уара бизнес шуымугьи ауат ауысква рырхъйара замангьи къаругьи лшарагьи шрызгIауауа, – йхIватI Бжаниа. – Ужвы хIызту агIамта тгIачвазаджвыкI уырцхърагIузтынгьи уыс дупI. А-Конгресс йархъйауа ауысква акъральыгIва йачпара атахъыта зпхьадзауагьи аъазапI. Сара йшазызбауа швасхIвпI. ЗымгIва хIацIагылта акъральыгIва йшазхIуш хIазынхара атахъыпI».
А-Президент йапхъала ауи аъанатIа змата йынхаз, зыхьыз атурых йгIалахаз Ардзынба Владислав акъральыгIва ауыхвара дшазаъаз гIайгвалашвахтI.
«ЙхIчпара атахъу йхIчпахьаз ацкIыс рыцIа йайхIапI. Владислав йхIвун: рахIа уызчвшвушыз хIыщтахьла йгIанхатI, рахIа йбаргву хIпахь йщтIаркIвапI. АкъральыгIва уыхварагьи, ауи тшауацIнарыхрагьи азынхарагьи уыс хъадапI. Зынхара сабапра ду алата йыззырхъйауа ауысхартаква мачIсачIпI. Швара йшвапшу агвышхвагIвчва анаъу акъральыгIва ахъазла цхърагIара дупI. Швара швпны анхара шадгалу апшта партиякI апынгьи йгьадгалам – заджвгьи йгвы йайымрысргIатI. Анчва дшвзыразхатI уыста йшвхауа ахъазла», – йажва алйыргатI Бжаниа Аслан.
Эгьзакь Муссагьи АААК «ари къральыгIва уыспI, ари а-Конгресс йауыспI»-хIва йшалнамхуа, зымгIвагьи ажвлара шабгу рбзира йшазынхауа гIаликIгIатI.
«ХIара йхIмураду гIвычIвгIвысипхьадза хIшйыдзхъагылу, хIшйызхъвыцуа йылайхIвауата, хIгвы апхара йыхIтырныс хIшхIазыру йбауата хIицхърагIара акIвпI», – йхIватI АААК ЙхIаракIу асовет аунашвачпагIв.
Эгьзакь Мусса Апсны апны нхара уысла мартI а 27-дза даъазлуштI, а-Конгресс ЙхIаракIу асовет, Апсны арайонкви акыткви рпны йгIаныршу АААК ахъвшараква йрылакву дрынйуштI.
швталра йа тшаншвцIара атахъыпI.