Адуней апсуа-абаза конгресси Апсны азгIвадарахчара а-Министерстви ареспублика акытква рапхьартаква рпны диспансеризация акIвыршарала анхара йгIвбахауа ахъвы джвыквырцIатI. Апхьара сквшшIыц апны йапхъахауата йъацаз Очамчыра район йаланакIуа Джьгьарда кыт акIвпI. РзгIвадара дырхъвыхныс ауаъа йгIадгылтI Гвада кыт апхьагIвчвагьи арыпхьагIвчвагьи. ЗымгIва шалаз айъазагIвчва швкIгIвы раъара йырпшытI.

ЙшцIасхаз апшта, диспансеризация гIвхъвыкIта йшан. Йапхъахуз амш апхьагIвчви арыпхьагIвчви ща рылырхын йдырхъвыхтI, мшквакI анагIвс ауат ргIарбараква рымата знархараквала йапшым айъазагIвчва гIарддырпшытI. АпхьагIвчва йырпшытI акардиолог Пипиа Инга, ЭКГ ахъызхуа амедахща Джьынджьолиа Эльза, аофтальмолог Сангулиа Фатима, апедиатрква Голандзиа Алиси Берберян Гайани, ареабилитолог Агрба Арзадин, арентгенолог Берзениа Аслан, ауролог Смыр Давид йгьи аэндокринолог Джьыкьырба ХIамид.

Арыпхьарали жвлара джьгаррали згIвадарахчарали АААК ахъвшара аъачIвагIагIв Хьышба Науыр диспансеризация магIныта йаму йхIватI.

«Анчва йбзирала, ацIайква райхIарагIв згIвадапI, ауаса щардагIвы рпны урология йгьи кардиология нархараквала йахъуымгауата уызхьпшра атахъу апроблемаква гIараутI. Ауи йапшым азгIваква пасата, йалкIгIата – агIвычIвгIвыс дшхвыцыркIву йгIаудырырквын шбзийу чIыдахъвыла йарцIабыргитI. Акытква рбзазагIвчва, йалкIгIата – саби щардагIв зму атгIачваква йаназаману айъазагIв йызцарныс лшара анрымам аъапI. Араъа йыгIбауа адиагнозкви архъвыхракви ужвыгьи зны диспансеризация магIныта йаму гIахIдырбитI», – йхIватI Хьышба.

Джьгьарда кыт ахъада, АААК ашIыпIа хъвшара аунашвахъцIагIв Амычба Адгвыр АААК апроект хвду аквицIатI.

«ХIкыт апхьарта апны диспансеризация шакIвшушыз ахабар арыпхьагIвчвагьи ан-абачвагьи айгвыргъьатI. Асабиквагьи арыпхьагIвчвагьи йауацIыху медицина рхъвыхра йгIакIылстI, ауи ахъазла хIара Адуней апсуа-абаза конгрессгьи айъазагIвчвагьи швабыж хIырзыразпI. Ари апроект хвы аквцIауачвапI, йалкIгIата угвы ахвгIитI ажвлара адкIылара асабикви арыпхьагIвчви рзгIвадара йъайгвыгIвуа», – йхIватI Амычба.

Диспансеризация акIвнаршауата а-Конгресс ари агIынхауата мгIва йыквлитI. Йапхъахауата ауи апш уыс асквш 2023 мартI агIан йыншатI. Апроект Апсны акытква рапхьартаква рапхьагIвчва йнардзу медицина цхърагIара шрадзуш йазынархапI. Ауи ахчала дацхърагIитI АААК ЙхIаракIу асовет аунашвачпагIв Эгьзакь Мусса. Ауыс архъйара йгIаланадыркIтI акардиологква, аотоларингологква, аневрологква, аофтальмологква, апедиатрква, ауролог йгьи арентгенолог. ЙащтагIайуа адиспансеризация сентябрь а 15 угIалагата а 17-дза ащхъа кыт ПсхIвы апны йакIвшуштI.