Адуней апсуа-абаза конгресс апны йгIаныршу Апсны апхIвысква рсовет асквш 2024 агIан йапхъахуз алачIвара акIвшатI. Анйара СогIвым йаъу а-Конгресс ауысхарта апны йадыргалтI.
Бгъанба Щазина
АлачIвара апны хъадата хуыскI йрылапштI: апхIвысква р-Координация совет асквш 2024 агIан ахачIвкви апроекткви, Апсны акытква рпны АААК апхIвыс советква ршIыпIа хъвшараква гIаныршара, апсуара арыпхьара ауысла ашвапха амдаракви айкьангьашракви.
Ауатыкв айчважвара акIвлыршун АААК апхIвыс советква рунашвахъцIагIв Бебиа Екатерина. Апсны апхьартаква рпны апсуара йарыпхьара ауысла ргвгIанаграква рхIварныс, дара ршвапха йаквчважварныс йгIадрайгватI Пицунда йапхъахауа аквтанай апхьарта арыпхьагIвчва Малиа Дони Трапщ Аиди, Дбар Сергей йыхьыз зхъу Апсны ауагIа р-Абашта айсра АкъральыгIва музей адиректор Джьыкьырба Гвагвыца, Гвдауыта ателебера адиректор Чанба Лариса, Гвдауыта йхвбахауа аквтанай апхьарта арыпхьагIв Бытба КIама, Очамчыра йпщбахауа аквтанай апхьарта адиректор ПIапIаскьыр Льальа, Очамчыра апхьарта-интернат арыпхьагIв Пагава Лорена, АГУ ажурналистика хъвшара апны йапхьауа Бениа Сандра. Анйара йалан АААК ахъвшараква рунашвахъцIагIвчви анхагIвчви.
Анйара йалази асасчви тшырзыналырхауата Бебиа Екатерина ауат араъа йгIащтIырхуа ауысква йъарызгвалымсым ахъазла дшырзыразу ралхIвтI.
«Апсны апхьартаква рпны апсуара йарыпхьара ауыс щарда цIуата хIгвы азакъвпитI. Ауаса мачIыгIвпI тшазыздыруа ауи йшахъаз уысхым – йшпроблемахаз. ЙгIадзынгылуа абанпараква рыхъазла йхIчпара атахъу ахачIвква сквшыкI йахъыгIгауа, сквшыкI йзыгIгахуамца хIгIамгIвайситI. Апсуарала апхьага лыхра, ауи арыпхьарала апрограммагьи рыбагъьара, апсуара зымгIвагьи апхьара атахъыта апхьартаква рпрограмма йалажьра – арат хIара хIакIвымкIва заджвгьи йымчпуш хачIвыпI», – дацIачIвагъватI ауи.
Гвдауыта ателебара адиректор Чанба Лариса йгIалылкIгIатI Апсны апхьартаква рпны апсуара йарыпхьарала швапха шдырхIахьаз, ауи йайхIахугьи – ауи айсра апхъалагьи, айсра амщтахьгьи дахIврала йадрыпхьун.
«Сквш 30 рапхъала Чанба Нодар культурали арыпхьарали дминистрта апсуа апхьахьачва гвыпкI йыцта «Апсуара» апхьага лыхрала нхара ду акIвйыршатI. ЙыздырхитI сахIат-сахIат йалыхыз апрограмма. Кьангьаш гьазгIазгуам ауи гIахIрысабапырквын хIуыс агалагьи йшмайрахуш», – лхIватI ауи.
Очамчыра йпщбахауа аквтанай апхьарта адиректор ПIапIаскьыр Льальа апхьарта дъадзанхауа ажвасквшапхьадзара руацIа «Апсуара» арыпхьара апрограмма йалацIара атахъыта йшрымбуз, ауаса йцIыхъвахауа асквшква руацIа аъащаква швабыжта штшырпсахыз лхIватI.
«ЦIыпх сентябрь агIан Инал-ипа Шалва йнаука нхараква гIасрысабапуамцара сара-сара хIапхьарта апны «Апсуара» йызлахIрыпхьуш программа лысхтI. Ауи йгIанацIгIаз уахьчIва йубитI. Ауи апш программа рыхIазырра шатахъу рахIагьи йгвынгIвырахитI», – лхIватI ПIапIаскьыр.
Апсны ауагIа р-Абашта айсра АкъральыгIва музей адиректор Джьыкьырба Гвагвыца агIвыма къральква рпны йапхьаз астудентква ршвапхала йгIалырбатI ауат рщагащаква йрыцапхьаквузгьи йазрыпхьузгьи йшрымагIальаматыз.
«Ауат (агIвыма къральква рпны йапхьуз астудентква) ауи апш закIгьи гьрымчпатI. Ахъаз ахIбачва ангIашылуаз йгылуан. Ауаса сквшквакI анагIвс ауат «йалкIгIата ъадаб нкъвызгауа уагIахъата» йрыквчважвун. ХIаргьи хIхъа ду йыгIбахуан», – лхIватI Джьыкьырба. «ХIара уахьчIва ашIаква апсуара йаквыргIапсымкIва йъагIадзынгылуа джьахIщитI. Ауаса ауи зльажьу хIара хIакIвпI – тшукIра шатахъу, хIцIасква, хIхабзаква йгьырзыгIбжьум. Ауат рзаман агаджеткви асмартфонкви йдырчвытI», – йгIацылцIатI ауи.
Айчважвара йалакваз ауыс ахъатаква зымгIва адыркIылта наука щата зму апхьага адыргалныс йшхIазыру рхIватI. ЗымгIвагьи адгылтI ауи ауыс архъйара лшарата йызчпуш рахIа сабап злу йшамальу. Анйара апны АААК апны йгIаныршу апхIвысква рсовет ахъвшараква ъагIахъыртIуаш акытква йшцушгьи щаквдыргылтI. Апсны апхIвысква рсовет йызкьазуу алачIвара хIызту асквш апрель агIан йакIвшара атахъыпI.
АААК апны йгIаныршу апхIвысква р-Координация совет – а-Конгресс йаланакIуа, Бебиа Екатерина унашва зхъылцIауа хъвшарапI.
швталра йа тшаншвцIара атахъыпI.