Адуней апсуа-абаза конгресс Апсны абзазагIвчва акоронавирус ашIашIкIгIара згIва йачвхъыхчара знархару анхара джьгарта йалалтI. Ауи ауыс даквчважватI а-Конгресс ЙхIаракIу асовет аунашвачпагIв Эгьзакь Мусса.

Ауи йшгIаликIгIазла, Апсны апны агвжважвагIва аъаща щаквдырылищтара (акъральгIвчва рбзазари рызгIвадари ргIахчара йазынархата йгьи Апсны Республика апны акоронавирус ашIашIкIгIара згIва атшауацIыхра йапшIагылуата асквш 2020 мартI а 28 йгIашIарышвта араъа гвжважвагIва аъаща щаквдыргылтI – аредакция ррытаразга) АААК анхара абгата акъраль абзазагIвчва рызгIвадара агIахчара йазынанархатI.

Ауи йшихIвазла, а-Конгресс ауысхагIвчва гвып джьгарта йрыцынхауа йалагатI Апсны абзазагIвчва акоронавирус йачвхъыхчара знархарата йгIандыршаз акъральыгIва штаб, агвчIагIвчпара адкIылара «Киараз» йгьи ажвлара хабарргарта квта «Адгылара».

«АААК ауралагьи Москва апсуа диаспора йрабадыритI. Ауат, йалкIгIата адиаспора рунашвачпагIв Агрба Беслан, авирус атшауацIыхра йызлапшIагылуа анхара рхатI ду аларцIахьатI. Авирус абакIра знархару акъральыгIва штаб йацынхауата Адуней апсуа-абаза конгресс аштаб ашвъа йгIанарбауа йгIаквхта йыззыбжу агIахчара пкъыгIваква рпхьадзара мачIымкIва йгIанахвгIуштI», – йхIватI Эгьзакь Мусса.

АААК ашIыпIа советкви анхагIвчви рынхара магIныта йаму

АААК ЙхIаракIу асовет аунашвачпагIв йгIаликIгIатI ари анхара апны магIны зму анархарагьи: ауагIа рпынква йаъазлара анатахъхазара цхърагIара драйдзара шатахъу. Ауи йатайхIвахтI йцIыхъвахауа асквш аурала Апсны шабгу гIацIанакIуата АААК ашIыпIа хъвшараква шгIаннаршуз. Ужвы йалкIгIата ауат ракIвпI ауагIа йырцхърагIарныс йгIащтIырхыз.

«АААК ауысхагIвчва гвып «Киараз» анхагIвчва йрыцта акарантин агIамта ауацIа цхърагIара йазыбжу тгIачва 30 раъара фачIвпкъыгIвала йадыргалтI, ауи ацхърагIара апхъахьылагьи йымгIвайсуаштI. АААК йаланакIуа ЧкIвынргIа рсовет йалу ачкIвынчви ахIвсси дара ртахъырала Апсны апны авирус атшауацIыхра йапшIагылырныс зхъвдаквцIару анхартаква йырцхърагIитI, авирус штшачвхъырхчуш ауысла ахабарква ауагIа йырзынадырдзитI, зныбыжьла йнаскIьахьу абзазагIвчва йырцхърагIитI. АААК ахабарргарта портал апресс-секретарь Барганджиа Саид акоронавирус згIва абакIра зхъвдаквцIару Апсны азгIвадарахчара аминистерства аштаб далапI йгьи аштаб анхара шакIвшауа ауысла ахабарква радгалра дацхърагIитI. Абгата йгIауахвырквын АААК ауысхагIвчва зымгIвагьи абзазагIвчва авирус йачвхъыхчара знархару ауысква йрылапI. Кьангьаш гьазгIазгуам ари апш аъаща щаквгылата заджвгьи гвалымста дшгIанымхуш, ауагIа зымгIва ркъару адхIкIылта ари архъвыхра баргвы дахIврала хIшайгIайуаш», – йхIватI багъьата Эгьзакь Мусса.

АгвчIагIвчпара адкIылара «Киараз» анхагIвчва дрыцта цхърагIара йазыбжата акъраль акытква йырту атгIачваква гуманитар цхърагIара рзигитI АААК йаланакIуа чкIвынргIа рсоветква рунашвачпагIв Торчуа Левангьи. Ауи йшгIаликIгIазла, а-Конгресс цхърагIара йазыбжу ауагIа йрыцIагылуа йынхуштI, «йалкIгIата Апсны апны акоронавирус гIаншата тшауацIнахуа йджвыквылуазтын».

«Ари апш агIамта баргвы апны айгвыгIвра рыцIа йазыбжапI асабитгIачвакв, зхъахIара мачIу атгIачваква, йызхъазыта йбзазауа атажв-лыгажвква. Сара ари ауыс сзалалыз сабап гIазгырныс стахъыта акIвпI. Швыла йгьшвызгIацIажьрым чкIвынргIа йрыуата ауыс йацхърагIауа зъарагIвы йнадзауа», – йхIватI ауи йгвгIанаграква хIыцагIвишауата.

Арат амшква рпны згвы цхIауа дзачIвгIвычIвгIвысызлакIгьи йылшауала адуней зцIазкIыз ачвгьара – авирус шварагIвара – абакIра йхъатачIв къару алайцIитI.

Ауи апшта, АААК ахабарргарта портал агIацIщтра редактор Хагба Изольда йызнымкIва йгIарысабап йауаш амаскаква лдзахитIта йызтахъу зымгIвагьи йрылалшитI.

АААК ашIыпIа хъвшараква йрылу апхъагылагIвчва ахабарргарта квта «Адгылара» аджьгарыгIвчва йрыцта Апсны акъалаква рпны азгIва атшауацIыхра йабакIуата ачвхъыхчара амальква гIазырбауа ахабарргага швъаква ршитI, АААК ауысхарта анхагIвчва, агIвымакъральква рпны йбзазауа хIабашталагIвчва ртшазынархараква рпны ауагIа аквгIазшIыртитI рпынква йаъазларныс, ауат атшазынархараква АААК ахабарргарта портал апынгьи асоциал сетква рпынгьи йгIатарцIитI.

ЙгIаншауа зымгIва ауагIа цбызшвакIла йдырдырра

АААК ахабарргарта портал аунашвачпагIв Лазба Амина йшгIалылкIгIазла, АААК ахабарргарта портал анхагIвчва зымгIвагьи йшрылшауала йацхърагIарныс йхIазырпI йгIаншауа зымгIва ауагIа йыддырдырырныс ахъазла.

«Акоронавирус абакIра агIамта апны хIпортал формат шIыцла йынхауа йалагатI: апхъала ашIыцраква араъа йгIаталуаз агIвыраква йырхъвгIвацан. Ужвы апортал зланхауа абызшваква зымгIвала йауацIыхта йгIахIырбуштI авирус атшауацIыхра йапшIагылуата йакIвшауа анхара. АААК апортал апны хIдиаспора йырдырныс рылшуштI рапхъанчIви Псадгьыл апны ауагIа ргIахчара ауысла амальта йнарахвуа гIазырбауа ахабарква. ХIара йыгIдыритI хIабашталагIвчва йгватшныта Апсны апны йгIаншауа шдырхъвыхуа, йалкIгIата адуней зымгIва рыхъазла ймайрам ужвы азаман апны. ЙгIахIгвынгIвитI ари ауыс ауат магIныта йазырбауа, йалкIгIата ауи ахIатырла ари апш щаквыргылра нахIахвтI», – лхIватI Лазба Амина.

Адуней апсуа-абаза конгресс апресс-секретарь, акоронавирус ашIашIкIгIара згIва абакIра зхъвдаквцIару акъральыгIва штаб йалу Барганджиа Саид аштаб шынхауа даквчважватI: ауи йашIамсуата ауыс зкву Апсны абзазагIвчва ансимшы йаханаргIвазитI.

«Аштаб апны ансимшы акъраль ашIыпIаква йгIартыцIитIта азгIва гIаздысылызшва йырбауа абзазагIвчва рхабар гIарщтийитI. Акоронавирус йашIырпшыта йчмазагIвхауа зымгIвагьи архъвыхраква йыркIылситI. Айъазартаква тшгIарзыназырхаз ачымазагIвква йрыуата, ауат 50-гIв райхIа йнадзитI, заджвы йпынгьи коронавирус гьырмаутI. Ауи насып дупI», – йхIватI Барганджиа.

ХIара хIадгылтI

ЙатахIхIвахпI, асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва COVID-19 йабакIуата Апсны абзазагIвчва ргIахчара знархару амальква нарахвтI. УагIа щарда злу айззараква гьакIвдыршахуам, Апсны Республика йгьтарыжьхуам турист гIамдара мурад змата йгIайуа агIвымакъраль бзазагIвчва йгьи къральгIвра швъа змам агIвычIвгIвысква, афачIвтйыртакви аптакькви ракIвымкIва анахьанат аткванква зымгIва адыркIытI. Ажвлара чартаква зымгIва адыркIытI, апхьартаква амцIырщттI, акъральыгIва нхартакви абанккви рынхара дрыбжатI. АкъральыгIва къвырльыкъвхартаква хъвдаквцIарата йрымапI ркъару абгата акоронавирус ашIашIкIгIара згIва абакIра йазынадырхарныс.

Арат амшква рпны апсуа хIаракьатчпагIвчва гвыпкI йнадзауата тшадыркIылтI «ХIара хIадгылтI» – хIва йызпхьауа амгIвайсра гIандыршан. МшквакIла азгIва шIыц абакIра йазалхта сом мильуан 42 райхIа азыркIкIытI. Арат ахчаквала айъазара ъамапсымакви Апсны азгIвадарахчара нхартаква ззыбжаз адезинфекция пкъыгIвакви рхвгIатI. Ауыс джьгарта йалалтI Москва апсуа диаспора. Ауат сом цмильуанкI райхIа азыркIкIытI, азгIва абакIра йазалхта йыззыбжу аъамапсымаква, айъазагIвчва ргIахчара йазалху апкъыгIваква рхвгIата Апсны йырщтиуаштI.

Акъраль апны гвжважвагIва аъаща щаквгылазтынгьи Апсны а-Минфин абзазагIвчва анхашаквагьи ацхърагIага ахчаквагьи рыртуаштI

Йапхъахуз амшква рпны йгIашIарышвта къару щарда аларцIатI цхърагIара йазыбжу абзазагIвчва фачIвыла йадыргалырныс ахъазла. Ари ауыс джьгарта йалалтI згвы цхIауа акъральгIвчва. Ауат гвып-гвып тшадыркIылитIта рыгвлачва йырцхърагIитI, зхъазы йбзазауа атажв-лыгажвква фачIвы рзыргитI.

Асквш 2020 мартI а 27 атшын акъраль апны унашва гIаргтI ГвжважвагIва аъаща щаквдыргылырныс. Апсны апны акоронавирус тшауацIнамхырныс ахъазла акъраль аунашвачпагIвчва асквш 2020 мартI а 28 йгIашIарышвта Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвахагIвчви

адипломаткви йырхъазыпI. АкъральгIвына ахъысра дрымчтI зпсадгьыл ахьыла йгIацапахуа Апсны акъральгIвчва рыхъазла, атепловизорква дыргылтI, зпсадгьыл йгIацапахуа Апсны акъральгIвчва гIвымчбжьала ашIыпIа хIаракьатчпагIвчва йрыздрыхIазырыз ахъатачIв сасыртаква йыртарцIитIта йырхъпшылитI.

Джьгарта йынхитI йазакIу аколл-квта, араъа ансимшы уагIа 200-гIв райхIа гIадгылитI. ЗымгIвагьи цхърагIарата йыззыбжу ддрадзитI, йанатхъахара психология цхърагIарагьи гIандыршитI.

Апсны айъазагIвчва рыхъазла йапымшвтуата атренингква адыргалитI.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.