Базба Селма

Асквш 2024 агIан «АимцакIьачарала» (апсуа уагIа ртопасща – аредакция ррытаразга) йапхъахуз атшыбжьара ПакIващ йапхъахауа аквтанай апхьарта апны йадыргалтI. Ауи акIвйыршатI чкIвыныргIи физкультури тшауацIдрыхрала АААК ахъвшара аунашвахъцагIв Берзениа Валерий.

Апхъапхъа Берзениа апхьагIвчва ахъвмарща йамагIну, ахабзаква шаъу райхIвтI, аъамапсымаква шгIаурысабапуаш гIаргвынйыргIвытI, айгIайра шгIатугуш къвышраквакIгьи рзыгIахъитIтI.

«АимцакIьачара» – апсуа хъвмаррапI, алащала регби, бейсбол, хвитта абакIра алауцIарыквын йрапшпI. Ауи хIабачви хIабадучви аслун. Ахъвмарра ахабзаква шаъу ари акIвпI: агвыпква рапхъагылагIвчва ауабчватоп лабала йаситI, ахъвмарыгIвчва ауи гIаркIыта, ласыта йырпшIагылу агвып йырчIву ахъвмарырта аъарагIвшарала йыгIвуамцара абаллква гIарынхара атахъыпI», – йгIаликIгIатI ауи.

Атеория андйырдыр амщтахь ачкIвынчва хъвмаруа йалагатI. Ауат гIвгвыпкIта тшагIвыршан Берзения дырхъпшылуамца йапхъахауата «АимцакIьачара» йастI.

АпхьагIвчва ауагIахъа хъвмарщаква йъарзырбжьуш гвышхвара ду гIарыланацIатI. Атшыбжьара аналгагьи ауат, йгIаджвыквлыз аквагьи йампшуата, йгIанхан дара-дара ужвыгьи йхъвмартI.

«Ахъвмарра хъатакIла угылата уанапшуа уыла йшгIацIалуа апшта йгьмайрам. Араъа уабакIра, къаругьи гIаурысабапра атахъыпI. Ауи акIвымкIвагьи ущаласызларагьи атахъыпI. ХIара ахъвмарра ауи аъара хIаланахIван – аквагьи хIампшуата хIасуан», – йхIватI апхьагIв Пачулиа СултIан.

Амастер-класс йалан арыпхьагIвчвагьи – ауат ачкIвынчва ахъвмарра ахабзаква ласыта йырдырырныс йырцхърагIуштI. Йауа ухIварыквын, ауат анкъвакъвраква рпырапI.

«Апсуа хъвмарщаквала апроект цIаста йщаквгылтI. Ансисквшагьи анкъвакъвраква адыгIгалитI, ауаъа акъраль шабгу йгIатыцIитIта акомандаква гIайитI, тшыззырбжьаз гIадырбитI. УайгвыргъьитI сквшигIадза ахъвмарраква тшырзызбжьарныс зтахъу рыцIа-рыцIа йъащардагIвхауа. ХIара сынчIва йапхъахауа асквшбжа ауацIа амаль шхIауа апш апроект рыцIа кыт щарда гIаланахIыркIра хIгвыгъапI. Ауи амщтахь зымгIвагьи йыргвапхаз анкъвакъвраква адыгIгалуаштI», – йгIацицIатI Берзениа.

Апсуа уагIа рхъвмарщаквала апроект асквш 2022 йгIашIарышвта йынхитI. Ауи агIамта ауацIа чкIвыныргIа рквта бзита тшауацIнахтI. Анкъвакъвраква хын йадыргалхьатI. Сквшипхьадза ауат йрылалырныс зтахъу йрылахIитI. Апсуа уагIа рхъвмарщаквала апроект ауат ахъвмарщаква разыгIальаматра гIаршIыхахра, апсуа гвбайара ауысла адырраква йрылархIара йазынархапI. АдгалагIвчва апроект рыцIагьи тшауацIнадрыхра ргвыгъапI.