АААК ЙхIаракIу асовет аунашвчпагIв Эгьзакь Мусса Иордания Хашимит паштахIыгIвара данца йапхъахауата август а 25 атшын Иордания акъала хъада апны апсуа-абаза жвлара йрыуу агвып дрынйатI.
Хагба Изольда
АААК ЙхIаракIу асовет аунашвчпагIв Эгьзакь Мусса август а 25 атшын нхара уысла Иордания акъала хъада Амман дгIайтI. Араъа ауи ажвлара адкIылара «Диуан Абаза» (Иордани йту апсуакви абазакви рыжвлара адкIылара – аредакция ррытаразга) ауысхарта апны Амман апсуа-абаза жвлара йрыуу гвыпкI дрынйатI. Иордания апсуа-абаза диаспорагьи Египет адиаспора йрапшта лкIгIарата йрыму ари акIвпI: ауи йауу зымгIвагьи йаразакIу аткъвым Абаза йаланакIитI, уахьчIвала ауи атдзахьыз хабза щата амата йынкъвыргитI, ауаса атгIачваква рызбжа йгIазлыцIыз ажвла ахьыз гьырдырхуам.
Эгьзакь Мусса Иордания апсуа-абаза диаспора ауысхагIвчви йари ранйара гвыхътIыла дайгвыргъьауата йгIаликIгIатI, а-Конгресс а-Устав йшгIанахIвауа апшта, адунейла абаза уагIа радкIылра АААК ахачIв хъададзаква йшрыуазакIу.
«ХIара йыгIдыритI Иордания апны хIайщчви хIахщчви рпхьадзара шмачIым. Мурадта йхIымапI хIкъару адхIкIылта хIыбызшва, хIкультура, хIцIасква ргIахчари ртшауацIыхри знархару амальква ацгIанхIыршарныс, уадыргIвана абари абайара шабгу хIсабиква йрызгIаныгIжьхырныс. ЙхIтахъыпI хIсабиква йара культура, йара хабарргарта штакI йтабзазарныс, йацыхIчIву хIпсадгьыл Апсынгьи къагIарныс», – йхIватI Эгьзакь Мусса йхIвахIвра тшазынархара апны.
АААК ЙхIаракIу асовет аунашвачпагIв йшгIаликIгIазла, абаза уагIа хIапхъанчIвиква сквшызкьпхьадзарала йырзыгIахчун йджьащахъву хIыбызшвагьи хIкультурагьи, ауи абзирала хIуагIахъа гIащаквхан уахьчIва йъагIадзазгьи йбзазитI.
«Кьангьаш гьазгIазгуам Иордания апынгьи, Трыквшта апынгьи, анахьанат акъральква рпынгьи швара (адиаспора йрыуу ауагIа – аредакция ррытаразга) шванчви швабачви апхъанчIвиква йырзгIаныржьыз ацIас бзиква йырхъазымкIва, апсуа-абаза культурагьи шынкъвыжвгауа, швызту акъраль акультура атшауацIыхрагьи швшазынхауа. ХIара хIуагIахъа адуней апны йызшIуырпшуаш датша гьаъам. Швари хIари хIабадыргIвацатI, ужвыгьи бзита швыгьхIыздырам, ауаса хIпсы бзи швабитI, йауа ухIварыквын хIщала хIазакIыпI», – йгIаликIгIатI ауи.
Ауи араъа йгIайззакваз а-Конгресси «Алашара» адкIылари Апсны апны, Къарча-Черкес апны абзазара йаларыжьуа апроектква йрыхайыргIвазатI, АААК анхара апринципква райхIвтI.
«ХIара политика хIгьалалуам. ЙгIахIрысабапуа адипломатия тIатIа акIвпI. ХIызламгIвайсуашта йаъу мгIвазаджвыкI акIвпI – хIацызларныс, тшадхIкIылырныс, хIацIагылырныс. Ауи акIвпIта Абаза дуней швгIахIрайгвитI! ТшадхIкIылпIта хIацынхапI», – йаквгIазшIиттI Эгьзакь Мусса.
А-Конгресс аунашвачпагIв йгIайрайгватI Иордания адиаспора йшрылшауала йгIалалырныс ансисквша АААК йгьи «Алашара» йакIвдыршауа аспорт йгьи акультура гвыргъьарамшква, йара йтланыкъвалагьи цхърагIарата йатахъула дрыцIагылырныс йыргвыгъатI.
УадыргIвана ажвлара «Диуан Абаза» ахъада Абаза (Чычба) ХIасан адкIылара шгIаншаз атурых гIайхIватI. Ауи мурад хъадата йаман Иордания апны апсуа-абаза уагIа йрыуу зымгIва аднакIылырныс йгьи рапхъанчIви псадгьыли дари ращтаныкъвара щаквдыргылта апхъахьыла тшауацIнадрыхырныс.
«Апхъапхъадза апсуа-абаза ткъвымква зымгIва руагIа азхIкIкIыта йабахIырдырныс, рыжвла ъану дхIырдырныс акIвын йхIгвыгъаз. УадыргIвана Апсны ахьыла мгIва щтIахIцIатI, апсуа къральыгIвра шгIахIыртуаш ацIыхъва хIтагылтI. УахьчIвала «Диуан Абаза» йалапI уагIа 4000-гIв раъара, ауат йрыуата 750-гIв апсуа паспортква гIапшцIыргахьатI. Ари ауыс апхъахьылагьи тшауацIнахуашта хIгвыгъитI», – йхIватI Абаза ХIасан.
«Диуан Абаза» ахъада йшгIаликIгIазла, адиаспора йрыуу щардагIвы йцIыхъвахауа агIамтадза рапхъанчIви псадгьыл аунашва гьрымдыруазтI. «Диуан Абаза», Апсны арепатриация ауысла аминистерства, абар ужвы АААК рбзирала Иордания йтабзазауа апсуакви абазакви Апсны рыцIа аргваныта йшызрыщтаныкъвушла йгвыгъитI, апхъала ауи апш амаль «пхызтагьи рыла йгьрызгIацIамыжьуазтI».
Абаза ХIасан йшихIвазла, Иордания апны «Диуан Абаза» апахь йгылу амурадкви ахачIвкви хIдиаспора ъату акъральква зымгIва рпынгьи АААК йархъйауа амурадкви ахачIвкви йрапшпI. Дшхъвыцуала, ауыс дахIврала йымгIвайсра ахъазла адиаспора рапхъанчIви псадгьыл йапымшвтуата йащтаныкъвара, ауагIа рацынхара йацхърагIара атахъыпI, ауаса йхъаду асабикви чкIвынргIи ракIвпI.
«СынчIва апхын Апсны атшпсщарта (атшпсщарта Трыквшти Иордании йрыуу асабиква рыхъазла Апсны арепатриация ауысла аминистерства йадыргалтI – аредакция ррытаразга) йцаз хIсабиква бзира щарда рыларкIын гвышхварала йырчвыта йгIайхтI. Ужвы ауаъа йцарныс гIазтахъхаз рахIагьи йщардагIвыпI, ауагIа рхъатала йырбарныс ртахъыпI Апсны, ауи акультура, ацIасква», – йгIацицIахтI Абаза ХIасан.
Анйара алгауата «Диуан Абаза» йалакву Адуней апсуа-абаза конгресс йшалалуала анкетаква йыртагIвытI.
АААК ауысхагIвчва гвып Иордания Хашимит ПаштахIыгIвара апны август а 24 йгIашIарышвта август а 27-дза йаъазлуштI. Ауат ауаъа рцара асквш 2019 аурала а-Конгресс аунашвачпагIвчва агIвыма къральква ргIарыкIвшара знархару аплан йаланакIитI. Ауи аплан асквш 2018 агIан ЙхIаракIу асовет йдрыбагъьатI.
швталра йа тшаншвцIара атахъыпI.