Адуней апсуа-абаза конгресс ауысхагIвчва ахаша ноябрь а 14 атшын Ткъварчал район абзазагIвчва йрынйатI
Барганджиа Саид
АААК ауысхагIвчва ноябрь а 14 атшын Ткъварчал район апны абзазагIвчва йрынйан аконгресс анхара, ауи мурадта йаму, хачIвыта йаргылуа рархIвтI.
А-Конгресс архъйагIв секретарь Гицба Инар йгIачважвара апны АААК анхара йанархаракIу акытква рбзазагIвчва рбзазаща агъьчIвра шакIву гIаликIгIатI. Йара ауи апшта ауи а-Конгресс алащи йаргвану азаман йархъйарныс йылнахыз ауыскви дрыквгIашIастI.
Анйара апны дгIачважватI АААК ЙхIаракIу асовет йалу Чирикба Вячеслав. Ауи рыцIа дызцIачIвагъаз а-Конгресс «шполитика организациям, хIуагIахъа йшрадкIылару» акIвпI.
«ХачIв хъадата хIпахь йгылу хIызлашвауа аглобализация хIаламдзуата хIыбызшви хIгвбайари гIащаквыгIжьырныс акIвпI», – йхIватI Чирикба йгьи йгIацицIахтI а-Конгресс ацхърагIарала адуней шабгу йрылапсата йбзазауа абазакви апсыуакви адкIыл йшауаш, «датшагьи уыс щарда шузычпуш».
Айззара апны АААК ахабарргарта порталгьи йаквчважватI. Апортал апресс-секретарь Барганджия Саид асайт апны а-Конгресс анхара гIазырбауа, апсыуа-абаза уагIахъа йгIарылцIыз агIвычIвгIвыс джьащахъваква йгIарыквчважвауа, хIуагIа ргвбайара, ртурых, аэтнография йырзынарху агIвыраква урыпхьа йшауаш гIайхIватI.
Ахабар ргара йахъазымкIва ауаъа йгIаншвалуа агIвыраква адуней апны Апсны аунашва бзирала йдыргарнысгьи хачIвыта йрыквпI. АгIвыраква зымгIва цбызшвакIла – абазала, апсышвала, урышвла, трыквла, ангьльызла, гIарыпла – йгIаталлуштI. УахьчIвала ауат хвбызшвакIла урыпхьа йауитI: агIарып версия ужвыгьи йадынхалыркIвитI, уыжвласыла ауыгьи ауырщтуаштI.
Барганджия апортал тшануцIарыквын хъгалрата йуымазлушгьи айззара йалакваз ргватра азынайырхатI.
«ДзачIвызлакIгьи апортал тштайгIвыта ауаъа тшанызцIаз зымгIва рхабарква гIайрысабап йауаштI, ауыла дасу лшара йымазлуштI абазакви апсыуакви адуней шабгу апны йъабзазалакIгьи йгIайауырныс», – йгIаликIгIатI АААК апресс-секретарь.
Анйара апны йгIачважватI АААК йаланакIуа чкIвыныргIи апхIвыскви рсоветква рунашвачпагIвчвагьи. Ауи апшта, чкIвыныргIа рсовет аунашвачпагIв Торчуа Леван а-Конгресс далата дъанхауа йгIайыланацIауа алахIвараква йгIайззакваз йрыцагIвишатI.
«Сара АААК сзалалыз «хIуачIвымш лашара» сазынхарныс акIвпI. Сара ауи амеханизм «садгалчIв хвыцкIта» салазлушдзысщун, старала, хIара хIтарала ауыс хъада зджьакIы йырчпушта схъвыцуан. Ауаса йшгIацIцIызла, АААК йалалуа дзачIвызлакIгьи зынла йуыс шаъазлуш гIалихра атахъхитI: йа ари апшвахв ацIыхъва апны дхъынхIвра йа йхъатала ауахьауат зрыхъынхIвуаш дмеханизмхата хIреспублика апны абзазаща шагъьхуш дазынхара. Ауи дасузлакIгьи йара дъану апны йзычпуштI – уыунагIва, уыурам, укыт, укъала рпны угIалагата», – дацIачIвагъватI Торчуа.
АпхIвысква рсовет аунашвачпагIв Ардзынба Гета лнархарала ахачIв хъадаква дрыквгIашIастI.
ЗымгIва йрапхъата Апсны шабгу апны ахIвсса джьгарква адкIылра, районипхьадза, кытипхьадза рпны апхIвыс советква гIаныршара атахъыпI. Кытипхьадза йазалху «апаспорт» азырчпуштI, ауи акыт алшараква, агIалцIыртаква, аэкономика тшауацIыхра нархарата йамазлуш гIанарбуштI, лхIватI Ардзынба.
Ткъварчал район ахъада Чачхалиа Аида йшылпхьадзауала, анйара апны йгIархIваз агвгIанагракви ахачIвкви ажвата йгьгIанхушым, уыс рыщтагIайуаштI.
«ХIара хIпны чкIвыныргIагьи ахIвссаквагьи швабыж йджьгарпI, агIаджвыквцIара бзиква йрыцыркIырныс йхIазырпI», – лхIватI ауи.
Анйара амщтахь йызтахъыз зымгIва а-Конгресс йалалырныс ахъазла йазалху ашвъаква ргIвытI. АААК йалалшIыцкваз йрыуа заджву Дарчан Анжела лгвгIанаграква гIалхIватI.
«Адуней шабгу хIайщчва зкьышвыгIвпхьадзара бзазитI, йаргьи гвыргъьара дупI уахьчIва ари апш хIадызкIылуаш, хIуагIа бзира рызгIазгуаш, акыт гIащтIызхуаш организация мчы ъахIыму», – лхIватI ауи.
Адуней апсуа-абаза конгресс ауысхагIвчви Ткъварчал район абзазагIвчви ранйара – Апсны апны йакIвдыршарныс йлырхыз анйараква йрыуата йапхъахауата йакIвшаз акIвпI. Ауи йапшу анйараква арайонква зымгIва рпны йадыргалта ауаъа Апсны абзазагIвчва а-Конгресс анхара йахадыргIвазуштI, уагIа шIыц ауи йгIаланадыркIуаштI.
Молодцы ткуарчальцы!
швталра йа тшаншвцIара атахъыпI.