Адуней апсуа-абаза конгресс хабарргарала ахъвшара апны нхагIв ахIбата йнарахвуаш дгIалхрала анкъвакъвра акIвнаршитI. Ауи хабарта йыргатI СогIвым йаъу АААК ауысхарта аунашвахъцIагIв Реквава Темур.

Ауи йшихIвазла, анхагIвы днахврала анкъвакъвра пщхъвыкIта йалапI.

«Анкъвакъвра йапхъахауа ахъвы апны хIара а-Конгресс хабарргарала ахъвшара апны журналистта йынхара зтахъкву АААК ЙхIаракIу асовет аунашвачпагIв Эгьзакь Мусса йыхьызла йыргIвуа рахIвара швъаква азхIкIкIуаштI. Ауат йгIарылырхуа йгIвбахауи йхпахауи ахъвква рпны СогIвым апны йгIаныршу Анкъвакъвра комиссия йалакву йрынйуштI, Санкт-Петербург йаъу АААК ЙхIаракIу асовет аппарат анхагIвчвагьи видео амальла йгIарачважвуштIта дзачIвызлакIгьи аъачIвагIа шидыруа, хабарргарала ахъвшара апны йхъвдаквцIараква йырхъйарныс дшазыхIазыру гIаддырдыруаштI. Йпщбахауа ахъвыдза йнадзаквауа АААК ЙхIаракIу асовет аунашвачпагIв Эгьзакь Мусса онлайн амальла дгIарачважвуштI», – йхIватI Реквава.

Датшагьи ауи йгIацицIахтI акандидатква рахIвара швъаква йрыцта нхара ауаъа йалагарныс зыртахъу зну сальамшвъа (бгъьыцкI йаншвалуата, апсуа йа урышв бызшвала йгIвыта), резюме, дасузлакIгьи дзачIву йаквшахIатхауа ашвъа акопия, дъанхаз знырцIауа ашвъа гIайгра шатахъу.

АААК хабарргарала ахъвшара журналистта йынхуш ауи аъачIвагIала дырра хIаракIы йымазара, ажвлара хабарргагаква рпны хысквша ацкIыс ймачIымква дынхахьата даъазара, атекстква йзыгIвра йгьи дырзыхьпшра, цифра йгьи мультимедиа ргIапсгаква дызрыланхара, суратгьи видеогьи йызхъыхра атахъыпI. Апсуа бызшвала хвитта дызчважвузтын лкIгIара йзырчпуштI.

АхIварагьи ауи йацызлара атахъу швъаквагьи info@abaza.org электрон адресла йщтира атахъыпI. Ашвъаква асквш 2023 мартI а 27 йгIашIарышвта апрель а 24-дза йнарахвитI.

Анкъвакъвра йапхъахауа ахъвы йаналгара АААК Анкъвакъвра комиссия йгIалырхыз акандидатква гIвымчыбжьа руацIа кIьыда-кIьыдата йанрачважвуш амшква рзыщаквдыргылуаштI.

АААК хабарргарала ахъвшара анхара асквш 2018 сентябрь агIан цбызшвакIла йджвыквнацIатI: апсуа, абаза, ангьльыз, гIарып, урышв, трыкв. Асайт ъадзанхауа ахвысквша руацIа ауаъа ацбызшвакIлагьи гIвыра 4500 райхIа гIаталхьатI. МшкIы ауацIа асайт 2000-гIв райхIа талитI. Хвысквша руацIа ауаъа йту агIвыраква уагIата зыкь 350-гIв райхIа рпшытI.