Адуней апсуа-абаза конгресс чкIвыныргIи физкультури тшауацIдрыхрала ахъвшара амакъымршIыйагIв, амакъымалацIагIв Марыхвба Абзагв дрыцта йадыргалыз макъымршIыйарала апроект шакIвшаз йалапштI.
Бгъанба Щазина
Апроект адызгалквази йалаквази ранйара СогIвым йаъу АААК ауысхарта апны йакIвшатI. Ауи йалан Кортуа И.Е. йыхьыз зхъу АуагIа рыршIыйара ареспублика квта адиректор Къварча Нури, апсуа ашвахIвагIв Берзениа Фрида, амакъымалацIагIв Агрба Темур, амакъымршIыйагIв МаркIолиа Алхас, Гвдауыта къала апны ашвахIвара йъазырбжьауа «Voice» студия йцауа асабиква йгьи Гал район апхьагIвчва.
Апроект хIызту асквш амазахIван агIан йджвыкврыжьтI. Ауи йгIалалтI Анчва йхъвыкI злу ашIакви апсуа эстрада артисткви: НТВ апны йакIвшаз ашвахIварала асабиква ранкъвакъвра «Ты супер» («Уара уымчдзапI») апны йайгIайыз Адлейба Валерия, ашвахIвагIв Кварацхелиа Мадина, «Ахщчва Березениа» дуэт йалу аэстрада-джаз ашвахIвагIв Берзениа Фрида, ашвахIвагIв Качарава Артем йгьи «Apsny-Star» ларпшыга хъвмарра йалу Джумутиа Ираклий.
Апроект мастер-класс джыпха йтагылата Гвдауыта, Гал, Гагра, Очамчыра къалаква рпны йакIвшатI. АдгалагIвчва йрылшатI закIы йашIысу ашIаква разыгIальаматра гIащтIырхырныс, йаргьи ацынхара абзирала апроект архъвыхра версия йыззыгIаларгаз амурад йаквыргIапста йалтI. А-Конгресс ахьыла ари апроект йахъпшылуа Берзениа Валерий йшгIаликIгIазла, чкIвынчва, хIвсыса щардагIв рыхъаз ауи амакъымршIыйара амгIва апны йапхъахауа чIвырхъапI.
«Ари хIхъа йгIаташваз апроект йархъвыхра версиягIвацапI. Ауи Апсны апщрайонкI йрыуата 100-гIвы райхIа гIаланакIтI. ХIара йхIтахъыз ауи сабапта йалу хIырхъвыхырныс, апсуа макъымршIыйара апны хьыз шIыц азыгIахънатIуашызтын хIапшныс акIвын. АшIаква йгъьагъьазуа рылаква уаныртапшуа ауи джьауапта йаутуаш бергьыльхитI. Ужвы, ажва аламкIва, хIапхъа апроект абгата йхIырхъйуштI», – йхIватI Берзениа.
Анйара апны Гвдауыта къала астудия «Voice» абжьаматаква алата йхъырхыз хвидеороликкI гIадырбатI.
Йара ауи апшта йдрыхIазыритI Гал район апхьагIвчва злу ароликгьи. Ароликква рпны бжьы анызцIауа Марыхвба Абзагв йакIвпI, йхъызхуа – Каджайа Сергей. Анйара йалакваз ацынхара лахIварата йгIарыланацIаз абархIвтI, апроект тшауацIыхра айауашта йшгвыгъауагьи рхIватI.
«Ажва аламкIва, асабиква ртшауацIыхра йазынарху, ауат рылшараква шырзыгIарбуш йахъвауа йамгIануысызлакIгьи йацкIра атахъыпI. Апхъахьыла магIын ду амапI апроект ргIапсщакI йтаргылра. Ауи агIан дзачIвцIайызлакIгьи йбжьы дйыргIарныс лшара рыцIа йауаштI», – йхIватI АААК ЙхIаракIу асовет йалу Къварча Нури.
«Эньзакь Мусси ауи йгвыпи ансхIвауа закIы йашIысу чкIвыныргIа ртшауацIыхра йадынхалуа зымгIва гIацIанасыркIуата сшырзыразу расхIвитI», – йгIацицIатI ауи.
Адуней апсуа-абаза конгресси Марыхвба Абзагви макъымршIыйарала рпроект асквш 2024 агIан йнадырдзуштI.
швталра йа тшаншвцIара атахъыпI.