Адуней апсуа-абаза конгресс Ан-абачва рклуб йызкьазууыз алачIвара Гагра апны йакIвнаршатI. Ари азын анйара ан-абачва йырхъазымкIва асабиквагьи алан.
Адуней апсуа-абаза конгресс йапхъахауата Ан-абачва рклуб алачIвара датша шIыпIакI апны йаднагалтI – ауи Гагра апны амтшаша, октябрь а 3 агIан йакIвшатI.
А-Конгресс йалу Хагба Изольда йшылхIвазла, Гагра абзазагIвчва рыхъазла а-Конгресс анйара датшата йаднагалтI.
«ХIара ан-абачва йырхъазымкIва асабиквагьи хIрынйатI. Амш мтшашата йгIалхIхтI, анчва рсабиква ъаргара рымдыруа йаъамызлара ахъазла ауат йрыцта йгIадхIрыдтI. Ауаса ауат кIьыда-кIьыдата хIрыцынхатI, йауа ухIварыквын, анйара апны гIвъачIвагIагIвкI нхун.
Апсихолог КортIуа Элана анчва дрыцынхун, апсихолог йгьи арт-терапевт КIвадзба Астанда – ацIайква. Ауат йахьчIва сабын дыршуан», – лхIват АААК анхагIвы.
Ауи йгIалылкIгIатI а-Конгресс йалакву асабиква йшхвыцыркIву – йрылахIауа йаналагара, закIы рзычпауа йанцауа – уалагата гватра рзалхра шатахъу бзита йшгIаргвынгIвуа. ЙагIвсыз анйара акIвпIта – Хагба Изольда ауи шакIвшаз дазыразпI.
«Ажва гьалам: хIара хIанйараква рымщтахь ан-абачва рхъвыцща зынла тшацанарпауата хIгьгвыгъум, уацIыхъвангьи хIара ауат асабии дари разазаъаща йаззырхъвыцуаш закIы рылахIцIитI. Йалныс ауыпI хIанйараква рымщтахь ауат ари ауыс рыцIа щардала йалачважварныс, ауасамцара ауат йраххIвуа датшагьи зджьакIы йыргIитI, ан-абачвагьи хIклуб рыцIа щардата тшгIазынадырхалитI. Ауылагьи йубитI ауат йрахIхIвуа йшазыбжу, ауи амагIны шгIаргвынгIвуа», – йылпхьадзитI Хагба.
Ауи гвы шалтызла, анйара апны азаман рыцIа кьахвта, сабапгьи алата йызгаз асабиква шракIву.
«Асабиква рлахIвараква рыцIа йымчыпI. Ауат хIанрыцынхуз даргьи гIахIачважвахуан. Ауат зымгIва рымаджьащахъвапI, ргвгIанаграква гьцIаркIуам. Ауи апшта, йахьчIва цIайкI йгIахIайхIвтI: «Арат анйараква ансимшы йакIвшазарквын йачIвбзийызлушызйа, са йхъсымрыпауа сгIайлушын». ХIара хIыхъаз ауи йагъьу гIарбагапI. Ауи акIвымкIвагьи дара-дара рнапIквала кIара ъарчпаз, ауи рпынква йыргахта рандучви рабадучви йъаддырбуш – ауыгьи, ажва аламкIва, йагъьу согIата йхIпхьадзитI», – лхIватI Хагба.
Апсихолог КортIуа Элана АААК Ан-абачва рклуб апны пычIвта дгьгIачважвум. Ауи лынйараква ан-абачва швабыж йрымагIальаматпI. Гагра апны КортIуа Элана атгIачва агIвычIвгIвыс йбзазара шапсахуа дгIаквчважватI.
«ХIара дзачIвгIвычIвгIвысызлакI йыхъазгьи атгIачва магIныта йаму, агIвычIвгIвыс йбзазара атгIачва апны йшджвыквылуа, йапхъахауа асквшква руацIа йыншауа ауи йбзазара йшащатахауа хIалачважватI. АтгIачва дасу йбзазара апны бзиралагьи чвгьаралагьи тшгIадырба йауаштI. Асаби йгIадзныргылра гIапсарапI, ауи джьауапкIра азуымата уадгылра, уаргьи ауи ушйану, ушйабу тшазудыруата ухъа уадынхалра атахъыпI. Уыздынхалуаш йанакIвызлакIгьи йуауаштI. ХIара рыцIа йщаквгылхьата йаъу аклассика агIзащаква, ауат йрыуата рыцIа йгIарысабап йауаш хIрыквчважватI», – лхIватI апсихолог.
Аспикер ан-абачва айчважвара джьгарта йшгIалалуаз гIалылкIгIатI. Ауат азцIгIара щарда лыртуан, ргвакъвпраква ауатыкв йгIатарцIун, йырдыруа анахьанат йрыцагIвыршун, йкьангьашуан.
«Ауи уайгвыргъьушта йаъапI. Ауат закIы йазцIгIитI, ргвгIанаграква рхIвитI, штшучпуш ауысла рхъвыцщаква гIадырбитI, йызхъгвыргIвауата ркъару зквымхъауа йаквчважвитI. Зынзамыза тшырзымкIуата йакIвым шырчпауа, ауи асабиква рпны штшгIанахIвахуагьи тшырхIвахуан. ЙчпачIву йазцIгIун. Ауи рдырра ртахъыпI. Саргьи йыздыруа зымгIва ауат йрасхIвырныс схIазырпI», – лхIватI КортIуа Элана.
Ауи дшапшуала, абарауи йапшу айчважвара хътIы акIвпI арат анйараква рпны рыцIа йсабапу.
«УахьчIва асабиква шуыгIзуш ауысла уызпхьуш, уызпшуаш щардапI. Ауаса дара ан-абачва урынйата абараса уанрачважвауа, ауатгьи швапхата йдырхIахьаз ангIауархIвуа, уаргьи закIыла уанрылабжьауа рыцIа йджьащахъвапI, ауыс рыцIа йахъвитI», – йылпхьадзитI КортIуа.
ЙгIвыджьхуз апсихолог, КIвадзба Астанда, дызцынхаз асабиква дгьаурымщтхуазтI. ХIара хIанлачважвузгьи дгIакIвдыршан йылхIвуз гватшныта йаздзыргIвуан.
АъачIвагIагIв йакIвшаз анйара хвду аквылцIатI.
«ЗымгIвагьи йрымаджьащахъван, зымгIвагьи джьгарын. ГIвыджь ракIвмызтын анахьанат заджвгьи сабын гьдмыршысызтI, ауат ачваква, афыгIвква, аквпшыраква йапшымкIва йырчпун. ЗымгIва бзита, сабапрагьи алата йакIвшатI. Ан-абачва йгIарыхъвуш дырра ъадзарауаз асабиквагьи аршIыйара йалан. Арат йрапшу анйараква атахъыпI – ауи асабиква рылаквала, рлахIвараквала йубитI, ауат швабыж йразыта йгIанхатI», – лгватраква хIыцагIвылшатI КIвадзба Астанда.
Пичугина Мира анйара быжьсквша йырту лпа длыцта дгIайтI. Ауи апхъала Мира Ан-абачва рклуб алачIвараква агIвлымщтра ахIатырла Гагра дтыцIуанта СогIвым дцалун, йызкьазуу анйара лара лцри къала апны йакIвшушта йанылдыр «зджьара йгIанымхауата дайгвыргъьатI». Ауи йгIалылкIгIатI а-Конгресс асабиквагьи гIауд йауата йъарчпаз шбзихаз.
«Ан алекция даздзыргIвитI, асабигьи ршIыйара далапI – ауи швабыж йбзипI. Асаби дзызгIаныуыжьуаш данумауагьи ншитI, ауи йгIалцIла анйара узымцауата упны угIанхара атахъхалитI», – лхIватI анйара йалаз.
Ауыгьи йгIалылкIгIатI Ан-абачва рклуб апны йакIвшауа анйараква швабыж йшсабапу.
«ХIызту агIамта Интернет апны информация щарда уауитI, зымгIвагьи асабиква рыгIзара йазынарху акнигаква йапшымкIва йрымапI. Ага ауаса йаъазтынгьи абари йапшу «йбзу лахIвара» злу айчважвараква уанрылалуа магIын ду амапI. Араъа датшата упсыпнкъвгитI. РыцIа щарда ухъа йгIатахитI, швабыж йджьащахъвапI. Арат йрапшу анйараква рыцIа щардата йакIвшаларныс стахъын», – лажва аллыргатI ауи.
Чагава Диана пщгIвысабичва дранпI. Ауи щарда цIуата дазпшуан Ан-абачва рклуб анйара Гагра апны йанакIвшуш, йалкIгIата ауи йылтахъын КортIуа Элана длынйарныс – ауи ауыжвгIанчIви ан-абачва ргвква зызгIвауа ймайрам ауыскви агIаншаракви рыцIа йалыргата йгIаугвынлыргIвуата йылпхьадзитI.
«ХIара хIсабиква рыхъаз джьауап шхIкIуа тшазыгIдырхитIта ауат рыхъаз рыцIа йагъьхуш, хIара хIхъатала тшхIпсах йшауаш гIдырра хIтахъыпI. Ауи гIахIазхIвуаш абарат йрапшу аъачIвагIагIвчва бзиква хIырзыбжапI. СогIвым йтакву ауи апш лшара ъарыму «хIрайхIвапсун». Ужвы хIаргьи ауи анхIау уымцакIва угIанхарныс, са йшспхьадзауала, йгьтамамымхушызтI», – лхIватI ан.
Анйара йалаз ахвыцква рнапIквала йырчпаз асабынква йырхъазымкIва рпынква алахIвара пшдзаквагьи рыцыргахтI.
Боян Артем сабынтшыткI йахща лыхъазла йчпатI. ГвынгIвырапI йхъагьи шалйымхыз. АчкIвынхвыц йапхъахауата сабын йыршуан, йара анхарагьи йчпазгьи йгвапхатI.
Шамба Саид запш заджвгьи йымам йара йсабын гIанйыршан йащахIба Льиуан согIата йыйтуаштI. Саид дгвыгъитI ари апш анйара ужвыгьи йакIвшушта, йаргьи дгIайта ужвыгьи уыс джьащахъвакI тшазыйбжьушта.
Гагра апны йакIвшаз Ан-абачва рклуб алачIвара ауысла Адуней апсуа-абаза конгресс анхагIвчва ажва бзи щарда гIарадзан Гагра апны ужвыгьи закIы-гIвбамкIва алачIвараква акIвдыршарныс щаквдыргылтI.
швталра йа тшаншвцIара атахъыпI.