АААК ЙхIаракIу асовет апрезидиум йалакву а-Конгресс уахьчIвала уыста йархъйази апхъахьыла йырчпуши йрылачважварныс ахъазла октябрь а 16 атшын йанйатI.
Барганджиа Саид
АААК анхара апны уахьчIвала йыззынадзаз агIарбаракви апхъахьыла йырчпуши – анахьанат акъральква рпны йчпачIвугьи алата, йрылачважватI Адуней апсуа-абаза конгресс ЙхIаракIу асовет апрезидиум йалакву ахаша, октябрь а 16 атшын.
Анйара йалан Эгьзакь Мусса, Лазба Натали, Дбар Беслан, Гицба Инар, Чирикба Вячеслав, Маршан Шараф.
АААК ЙхIаракIу асовет аунашвачпагIв Эгьзакь Мусса алачIвара йгIадгылкваз сальам райхын ажва а-Конгресс архъйагIв секретарь Гицба Инар йыйттI. Ауыгьи зымгIва йрапхъата йгIаликIгIатI апрезидиум йалакву райхIарагIв шаъу, «йаргьи ауысква йрылапшра ахъазла ауагIапхьадзара шнахъауа».
АААК архъйагIв секретарь а-Конгресс уахьчIвала йызлу ауысква йайззакваз йгIаргвалайыршвахтI.
«АААК апсуа-абаза тгIачва йрыуата адуней шабгу йхъылапсата йбзазауа джьгарта йырзыпшгIитI, ауат а-Конгресс йшгIалалуаш апшта нхара акIвнаршитI. Ауи амурад хъйара ахъаазла ашIыпIа йгьи ашта советква гIахъыртIитI. Ауат аштаква рпны йбзазауа апсуа-абаза уагIа йрыуата рыцIа йджьгаркву йгIандыршитI», – йхIватI Гицба.
Ауи йгIахъыртIхьаз йгьи згIахътIра йазыхIазыру асоветквала апхьадзараква гIайгтI. УахьчIвала шта советта быжьба аъахьапI (КъБР, КъЧР, Апсны, Трыквшта, Москва, Санкт-Петербург рпны – аредакция ррытаразга), ужвы Иордания апны ашта советква гIаныршарала нхара акIвшитI. Гицба Инар йшихIвазла, хачIвыта йгылапI йара ауи апшта Великобритания, Германия, Сирия датшагьи апсуа-абаза диаспора ъану акъральква рпны ашта советква гIахъыртIырныс.
«Ашта советква ргIаныршара йаццауата къалаквакI рпны ашIыпIа хъвшараква рсоветквагьи гIандыршитI: Апсны апни (Ткъварчал, Очамчыра, Гвдауыта) Трыквшта апни (Астомбыль, Инегель, Измит, Эскишехир, Биледжик, Бурса и Сакарья). Асоветква Апсны арайонква зымгIва рпны йгIахъыртIуаштI. УахьчIвала ауат 10 йнадзахьатI», – йхIватI АААК архъйагIв секретарь.
Гицба Инар а-Конгресс анахьанат акъральква рпны уыста йахауагьи айшыста дгIаквчважватI. АААК амурад хъадаква йрыуазакIу – адуней шабгу йхъылапсу апсуа-абаза уагIа адкIылра – архъйара апкъ йтата а-Конгресс ауысхагIвчва ргвыпква нхара уысла адиаспора ъану акъральква йцитI: Трыквшта, Иордания, Египет йцахьатI. Ужвы Нидерланды, Сирия, Германия йцарныс ргвыгъапI.
Ауи йацицIауата Эгьзакь Мусса АААК анахьанат акъральква рпны анхара ауысла Россия агIвымакъраль уысквала а-Министерства йшрайкьангьашуа йхIватI.
«ХIара Россия а-МИД хIрайкьангьашитI. Ауат нхарала швапхата йдырхIахьу гIахIпхьадзауата хIгватра рыцIа йыззынахIырхара атахъу ауысла йгIахIылабжьарныс тшырзынахIырхитI. Ауати хIари йхIызбжьу ацынхара кIара гIанацIгIитI. Йшабгу йгIауахвырквын хIара (АААК) агIвыма къральква рпны йакIвхIыршауа анхара щарда гIацIанакIитI», – йхIватI АААК ЙхIаракIу асовет аунашвачпагIв.
А-Президиум йалу Чирикба Вячеслав АААК агIвыма къральква рпны йакIвнаршауа ауысква хвду рыквицIатI йгьи апсуа-абаза уагIа ъату акъральква йъацалауа магIын ду шаму гIаликIгIатI.
«Сгвы гIатгвыргъьгIауата а-Конгресс агIвыма къральква рпны йшынхауа сапшитI. Швабыж йбзипI АААК хIабашталагIвчва йыгIбата хIрабадырныс лшарата йызчпауа «цхIата» йъалуа. Сара сквшщарда Европа апны сбзазатI, ауаъа йыздырыз йгIаквхта АААК ъацуш акъральква Швейцариягьи Бельгиягьи рылацIара атахъызшва йызбитI. Ауаъагьи апсуа-абаза диаспора ймачIымкIва йаъапI», – ажва гIайгтI Чирикба.
Алазлара швачIвква руыс зкву гIайхIватI АААК ауысхарта аунашвачпагIв йтарагылыгIв Калинкин Михаил.
«АААК зкьгIвы райхIа гIалалхьата ашвъа йанып. Ауи ауысла анхара щаквгылхьатI. Йалу дзачIвызлакIгьи сквшыкI апны сом 100 йтира атахъыпI. АшвачIвы Адуней апсуа-абаза конгресс асайт апынгьи йутйы йауитI. УахьчIвала ауи апш лшара зму Россия Федерация апны асайт гIасрысабапквауа ракIвпI. АшвачIвква азхIкIкIитI, процент 30 гIазхIкIкIхьатI», – йгIарылайхIватI Калинкин Михаил.
АААК алазара ауысла Эгьзакь Мусса йгватракIгьи гIайхIватI: уахьчIвала «ауагIа нхагIвчва а-Конгресс джьгарта йалалитI, ауаса ахIаракьатчпагIвчва ауи дукI йгьазыгвжважвум».
«ХIара хIуыс рыцIа хъйара алата хIынхара, ауыла пIатIу гIахIынхара атахъыпI. ХIара хIуыс гьашIахIрысуам, абизнес пхатшагьи а-Конгресс апроектква йгIарылазыжьуаш джыпхакI лыхIхуаштI», – йхIватI ауи.
Адуней апсуа-абаза конгресс ЙхIаракIу асовет йалакву октябрь а 17 ужвыгьи зны йатайззахуаштI.
Адуней апсуа-абаза конгресс ЙхIаракIу асовет анхара йаквчважварныс йапымшвтуата йайззалитI. Ари апхъала ЙхIаракIу асовет йалакву асквш 2019 аюнь агIан тшазыркIкIытI.
швталра йа тшаншвцIара атахъыпI.