Аконференция йалази асасчви зчважвари зпсихика тшауацIыхри тащахIахауа асабиква ртара йтагылхныс лшарата йрыму йалачважватI.
Адуней апсуа-абаза конгресс йаланакIуа Ан-абачва рклуб зчважвари зпсихика тшауацIыхри тащахIахауа асабиква ртара йтагылхныс лшарата йрыму, ауат ажвлара йрылагIващауата йчпара йгьи йарыпхьара ауысква йырзынархаз анйара аднагалтI. Аконференция йаднакIылтI айъазагIвчва, адефектологква, алогопедква, арыпхьагIвчва, ажвлара уысхартаква рынхагIвчва, ан-абачва. Сасыта ауаъа йаъан аврач-нейрофизиолог Горелик Александр, «Альбамед» медицина квта аунашвачпагIв, аневролог Ходжава Альбина, адефектолог Стогова Елена, «МРТ-эксперт-Сочи» аврач-рентгенолог Тимонин Олег, Апсны Республика апны асаби йхвитнагIаквала хъвдаквцIара зму ауысхагIв Джьынджьолиа Мактина. Анйара акIвлыршун арыпхьарали жвлара джьгаррали згIвадарахчарали АААК ахъвшара аунашвахъцIагIв Хагба Изольда.
Анйара гIахъылтIытI аконференция адызгалыз «Альбамед» медицина квта аунашвачпагIв, дугьи хвыцгьи йрайъазауа аневролог Ходжава Альбина. Ауи йшылхIвазла, аконференция мурад хъадата апахь йгылу зчважвари зпсихика тшауацIыхри тащахIахауа асабиква ртара йтагылхныс лшара рзыгIаныршара ауыс апны амедицина йгьи ажвлара хъатаква адкIылра акIвпI.
«Анйара айъазагIвчва йырхъазымкIва ауагIа йрыдынхалуа ауысхартакви апхьартакви рынхагIвчвагьи алапI. ХIара неврология диагноз зму асабиква цхърагIара драдзара йапщылу абаргвыраква ушырхъысуаш йазалхта уадынхалра ахIатырла абари йапшу айчважвартаква тшауацIдрыхра атахъыта йхIпхьадзитI. Апсны апны диагностикала алшараква аъахьапI. Зчважвари зпсихика тшауацIыхри тащахIахауа асабиква ареспублика йтымцIуата цхърагIара рауаштI. Алогопед йпны уцара апхъала аневролог уйызцата аквта нарв ргIапсра тазщахIауа ашвхIаусыгIва гIаууырдырра атахъыпI. Алогопедква йрызгIайуа асабиква энцефалограмма, ахъаквынцI ащаныкъвартаква р-УЗИ, нейросонография, йатахъызтын – МРТ ргIарбараква рымазара атахъыпI. Амедицина рхъвыхракви йузалырхыз айъазари уангIаркIылсра амщтахь акIвпI датша ъачIвагIагIвчва тшанырзынауырхуш. Амедицина щата зымгIва йрапхъапI. Ауи амщтахь акIвпI уыздынхалуаш, йучытIуш, айъазага физкультура агьиквата йчпара атахъхуш анлырхуаш», – дацIачIвагъватI Ходжава.
Анйара аврач-нейрофизиолог, Бехтерев йыхьыз зхъу психиатрии неврологии р-УагIахъа медицина рхъвыхырта квта йаланакIуата Санкт-Петербург йаъу функционал диагностика апещ аунашвачпагIв Горелик Александр Апсны дангIай йаквдыршватI.
«Сгвыргъьауа Апсны сгIайтI, йыздыруа, швапхата йсырхIахьаз зымгIва араъа йынхауа съачIвагIалагIвчва йрыцагIвсшарныс схIазырпI. Са гвы шастызла, ари адуней шабгу апны йзынйауа проблемапI, аневрология згIваква зхьуа ауагIа йапшым акъральква рпны рыцIа-рыцIа йщардагIвхитI, швабыжтагьи йрылахIитI. Ауат йнардзата уырцхърагIара ахъазла асаби неврологква рпны угIалагата айъазага физкультурала абжьагIвчва рпны йыцIшвтхуата йапшым аъачIвагIагIвчва злу агвыпква нхара атахъыпI», – йгIаликIгIатI ауи.
АйъазагIв аконференция йалакваз нейрофизиология айъазари реабилитации йырзынархаз доклад ду рзичпатI.
«ХIара нейрофизиология йапщылу абаргвыраква руысла уахьчIвала хъвыцщата йаъакву хIрыквчважватI, азгIвадара гIащаквыргылхрала 21-хауа асквшышв йаквнагауа аргIапсща аъазара шатахъу ауысла хIгвгIанаграквагьи абахIхIвтI», – йхIватI Горелик.
Анейрофизиолог ан-абачва гватшнызларныс, асабиква рчпащаква дырхъвыхларныс, ргвы кIара йазыбжахузтын йаназаману аъачIвагIагIвчва тшырзынадырхаларныс йаквгIазшIиттI.
Адефектолог Стогова Елена анйара йалакваз анхара апны йгIалрысабапуа амальква ралхIвтI, ажва ахъазла – моторика адынхалри аинтегратив хъвмарракви рсабапра. Даун йсиндром зму сабикI йшвапхала аъачIвагIагIв ауи арзахвахрала айъазара сабапра шалаз гIалырбатI, атгIачвагьи апхьарта анхагIвчва гвыпгьи урыцынхара шатахъу гIалылкIгIатI.
Асаби йхвитнагIаквала хъвдаквцIара зму ауысхагIв Джьынджьолиа Мактина Апсны апны зызгIвадара алшараква ахъарысу асабиква ажвлара йрыквшвауата йаъазара ахIатырла йчпачIву даквгIашIастI. Ауи лгватра рыцIа йыззыналырхаз инклюзив арыпхьара апны йаъу абаргвыраква ракIвпI.
«УахьчIвала йазалху ацхърагIага апхьартаква рпны 150-гIв апхьитI, зныкъвадыкъвара хIатлам саби 139-гIв йалакIу адыррагIацIгарта апхьартаква йцитI. Аклассква, апещква гьнахъум. ХIара Апсны арайонипхьадза апны инклюзив апхьартакI гIаныршара атахъыта йыгIбитI. ТшазыгIдыруата йхIхIвитI ауат асабиква апхьарала рхвитнагIаква шхIзынамырхъауа», – лхIватI ауи.
АйъазагIвчва, ан-абачва, асасчва райчважвара пкъы ацIата йакIвшатI. Анйара апны йгIащтIырхуаз ауысква рхъйащата йрымазла йауаш рхIвун.
АмакIыраква рымщтахь арыпхьарали жвлара джьгаррали згIвадарахчарали АААК ахъвшара аунашвахъцIагIв Хагба Изольда аконференция апны йызлачважваз йалакIыта йгIалхIвахтI.
«АААК йаланакIуа Ан-абачва рклуб апны рацIа хIызлачважвалауа асабиква – йызгIвадугьи зылшараква ахъарысугьи – рыгIзара-бжьара, ажвлара йрылажьра йырпщылу ауысква ракIвпI. ЙахьчIва «Альбамед» медицина квти хIари хIацыта йадыгIгалыз йгIвбахауа анйара акIвшатI. Знархарала йапшым аъачIвагIагIвчва хIрыздзыргIвытI, дасу швапхата йырхIаз амырдатI, рыцIа йсабапу ауыжвгIанчIви айъазащаква йрыквчважватI. Аконференция йазалхта ари ауыс йадынхалуа айъазагIвчва алан. Ауат йшырхIвазла, йрысабапхуш шIыцра щарда ргIатI. Аконференция Апсны апны, ажвапIта, «Альбамед» медицина квта апны, йгIадрысабапуа йызлагахьаз айъазаща апхъагыла амальква гIадырбатI. Ауат рхабар щардагIвы йгьрымгIастI», – йгIалылкIгIатI Хагба.
Хагба аконференция асоциал хъата магIын ду шаму дацIачIвагъватI, ажвлара арат ауысква йрыквчважваларныс, ари ауыс рыцIа йагъьызчIвуаш ачIвырхъаква атырпырныс йаквгIазшIылттI.
Ан-абачва рклуб – Адуней апсуа-абаза конгресс йазалху йапроектпI. Аклуб анхара асквш 2019 ноябрь агIан йджвыквнацIатI, асквш 2021 йгIашIарышвта алачIвараква Гагра апынгьи йакIвдыршауа йалагатI. Ан-абачва рклуб гIари дызму дзачIвызлакIгьи далал йауаштI. Ауи ахъазла хъадата йатахъу «азыгIальаматри агвышхвари» ракIвпI. Аклуб апны апсихологква, апедиатрква, асабиква рыгIзари рбжьари знархару йапшым аъачIвагIагIвчва йрынйалитI. Зчважвари зпсихика тшауацIыхри тащахIахауа асабиква ртара йтагылхныс лшарата йрыму ауыс араъа рахIа йгIащтIырхлауа ауысква йрыуапI. РыцIа пасата АААКи «Альбамед» медицина квти ауи апш анйара уагIата йалаз рыцIа ймачIыгIвта Гагра апны йакIвдыршатI.
швталра йа тшаншвцIара атахъыпI.