Апремьера Адуней апсуа-абаза конгресс ауысхарта апны ноябрь а 23 атшын йакIвшатI. Афильм «Амазара» проект апкъ йтата йхъырхтI.
Хутаба Алиса
«Аимцакиачара» апрезентация акIвдыршатI афильм арежиссер Лагулаа Беслан, апроект лызхыз Берзения Валерий, ауагIахъа хъвмарраквала агвыпква рбжьагIвы йгьи асудья хъада Гвымба Адгвыр.
Анйара йалан чкIвыныргIи спорти руысквала акъральыгIва комитет аунашвахъцIагIв Хагба Таращ, чкIвыныргIи спорти руысквала СогIвым къала акомитет аунашвахъцIагIв Хагба Эльза, АГУ физкультурали спортли акафедра аунашвахъцIагIв Джениа КIьагва, АГУ астудентква, анкъвакъвра йалаз ЧIлоу кыт агвып йалу ачкIвынчва.
Апрезентация гIахъитIытI чкIвыныргIи физкультури тшуацIдрыхрала АААК ахъвшара аунашвахъцIагIв Берзениа Валерий. Ауи ахъвмарра акIвыршара ауыс шгIаларгаз, фильм ахъырхныс йшаквыркIыз, уацIыхъван чIвырхъа-чIвырхъамца ауи йшадынхалуаз гIайхIватI.
«АуагIахъа хъвмарщаква хIгватра рзынахIырхищтара бзидздза цIитI, хIара йхIмурадпI ауи азыгIальаматра ауагIа йрылагIгарныс. УахьчIва йшвхIырбауа афильм йгьгвацчпа фильмым, ауи аимцакиачара хъвмарра шгIаншаз ахабар зымагIальамату йа ари ухъызкъьалуа аспорт квпшырала йхъвмарра зтахъу цхърагIагата йырзалуашта йаъапI. ХIара хIхъатала ауи ахъвмарща хIхIырдыртI, хIастI, уацIыхъван акIвпI ауагIа йдхIырбауа хIаналага. Ауасамца йдучвам анкъвакъврагьи адыгIгалтI, хIапхъахьыла щарда хIгвыгъапI. Анкъвакъвра йгIалагIжьыз ачкIвынчва азыгIальаматра ду гIадырбатI. Кьангьаш гьазгIазгуам жвасквшаквакI агIвсырквын хIынхара йгIахъшахъыцIыз шыгIбуш», – йгIаликIгIатI Берзениа.
Афильм арежиссер ауи ъахъырхыз ашIыпIаква, анхара апны йзынйуз абаргвыра тшытмытква, йара йхъатала дхъвмаруата акино ахъыхра дшалаз дгIарыквчважватI. Ауи АААК ари ауыс ъагIаларгаз ахъазгьи адгалра уыста йакIвдыршаз ахъазгьи дшырзыразу йхIватI, агвбайара тынха йахъвыкIу ауагIахъа хъвмарраква ргIащаквыжьра магIын ду шамугьи гIаликIгIатI.
Йара акино «Аимцакиачара» апны ахабархIвагIви (ауи йтурасыла дгIахъвмартI апсуа ашIара ртеатр актер КIамкIьийа Саид) атурыхдырыгIв АгIвдза Виктори апшыгIвчва ахъвмарра ахабза хъадакви алкIгIаракви йрыхадыргIвазитI. Афильм ахъвмарра шакIвшауа уыла йгIацIанажьитI, ауи ахъазла ъамапсымата йатахъу гIаунахIвитI.
Ари аспорт квпшыра атурых ащайдзаквала йагIвсыз асквшышвква цIолата йрылалитI. Ауи ахабар НартыргIа ртурыхгьи йалапI, ауаъа атгIачва ртаца шIа ачв ахъвы алалрыгьажьта топшва йшылчпаз, НартыргIа айщчвагьи ауыла аимцакиачара йшасуаз гIанахIвитI. Ахъвмарра чкIвыныргIа рбжьара йахъвыкIын. Ауи, щаласта уачпауата, укъару йазнархIауата, анагра, адзыргIвра, ахъвыцра урызнабжьауата йырпхьадзун. Ахъвмарра угвылагьи уыпкълагьи уарыбагъьун, айсыгIв дрыхIазырра ауыс йахъвун. Апсуа жвлара ргвыргъьахъв хъадаква зымгIва аимцакиачарала анкъвакъвраква рылан.
Апсуаква рыцIа бзи йырбуз ахъвмарра йгIаквчважвауа афильм апшыгIвчва йыргвапхатI, айчважвара дугьи гIанарыцIстI. АГУ физкультурали спортли акафедра анхагIвчва ауагIахъа хъвмарщаква астудентква рыхъазгьи апхьагIвчва рыхъазгьи нархара кIьыдата арыпхьара йаларжьырныс ажва гIаргтI. Айчважвара йалакваз ауагIахъа спорт квпшыраквала федерация агIаныршара ауысгьи ауатыкв йгIатаргатI. Апрезентация сасыта йаъаз чкIвыныргIи спорти руысквала акъральыгIва комитет аунашвахъцIагIв Хагба Таращ апхъахьылагьи ари йапшу апроектква рырхъйара дацхърагIарныс дшхIазыру йхIватI.
Анйара алйыргауата СогIвым йаъу АААК ахъвшара аунашвахъцIагIв Реквава Темур йалачIваз зымгIва афильм агIаныршара йъалаз ахъаз йразыра ажваква рзынайырхатI.
«АААК ЙхIаракIу асовет аунашвачпагIв Эгьзакь Муссагьи АААК агвып шабгугьи рыхьызла афильм агIаныршара йапщылаз зымгIвадзугьи «Анчва дшвзыразхатI» – швасхIвра стахъыпI. Йайшыста, йацIакIыта ауи атурыхгьи ахъвмарщагьи гIанарбитI. Анчва дшвзыразхатI швгIапсара ахъазла, ари ауыс апны швпшыща араса пшдзата аэкран апны йъагIашвырбаз ахъазла. Багъьата йазхъасцIитI ауагIахъа хъвмарщаква апхъахьыла тшауацIыхра шрауаш!» – йхIватI Реквава.
Афильм уыжвласыла зымгIвагьи запшуаштI. Йызтахъу дзачIвызлакIгьи ауи телебаралагьи АААК асайт апынгьи дапшы йауаштI.
швталра йа тшаншвцIара атахъыпI.