СахIаткIла астудентква абаза бызшвала ажва 142 йнадзуз диктант ргвытI.
Голандзиа Есма
Алиев У.Д. йыхьыз зхъу Къарча-Черкес къральыгIва университет КъЧР ауагIахъаква рыбызшваквала III Адуней онлайн-диктант акIвнаршатI. Ауи шакIвшуз райшата Россия аштаква рпынгьи КъЧР ауагIахъаква рдиаспораква ъабзазауа акъральква рпынгьи Интернетла йгIадырбун, йаргьи йызтахъу дзачIвызлакIгьи далал йауашын. ХIреспублика апны адиктант йазалхыз тыпта, йшцIасхаз апшта, Апсны акъральыгIва университет апны йгIаныршу АмкIваб В.П. йыхьыз зхъу Апсуа-адыгьа филология Аквта алтI. Абаза бызшвала диктант згIвыз райхIарагIв АГУ апны йапхьаквауа ракIвпI.
«ХIара щарда цIуата хIайщчва абазаква хIрыцынхитI, Абаза бызшви литератури рфестиваль, ансисквша йакIвшалауа анаука-практика конференцияква датшагьи ауысква хIрылазлитI. УахьчIва ужвыгьи магIын ду зму, хIадызкIылуа уыскI акIвшитI. СынчIва ауи йгIалалыз гьщардагIвым, айхIарагIв йгIалалшIыцтI, йауа ухIварыквын, абаза бызшва йхпахауа акурс йгIвбахауа аъарагIвшара апны акIвпI йддырдыруа йаналагауа, сквшыкI йадрыпхьитI. Акурс ахIбаква ужвы анхара тшарыщцара йаъапI, азджьакI нхауа йалагахьатI. Ажва гьалам, хIара йхIтахъын чкIвыныргIагьи ахIбачвагьи рыцIа джьгарта ари ауыс йгIалалырныс», – йхIватI Апсуа-адыгьа филология Аквта аунашвахъцIагIв АмкIваб Ахра.
Адиктант сахIаткI йнайтI. Атекст йбергьльу абаза уысагIв Шхай Катйа лгIвыраква йгIарылхын, абазаква рцIаскви ргвбайари йырзынархан. Ауи дгIапхьун афилология наукаква ркандидат, апсуа бызшва йапхъахауа акафедра адоцент Лихова Ната.
«Адиктант амщтахь дасу йгIвыз сурат ахъыхIхитIта йдырхъвыхырныс Къарча-Черкес йхIщтийитI. ЙызгIвыз йазалху кодла дащтазцIгIата йдрытамамхыз йынхарагьи ауи баллта йгIанагызгьи дырпшых йауаштI. Йыхьызи йтдзыхьызи анйымцIарыгьи йауитI, ари гьанкъвакъврам – удырраква уырхъвыхырныс лшарапI», – йгIаликIгIатI АмкIваб Ахра.
АмкIваб Ахра йшихIвауала, адиктант мурадта йаму ауи йгIалалуа гIарбага рзыргылра гьакIвым – дасузлакIгьи хальатIта йагIвищтуа гIайгвынгIвыта йхъа дадынхалырныс даквыргвышхвара акIвпI, йащтагIайуата йанрыгIвуа ргIвыща рыцIа йшцкьахуш апшта.
ДзачIвызлакIгьи дызлал йауа адиктант ансисквша йадыргаллауа, агIвычIвгIвыс йдырраква йшрылахIуш йазынарху уыспI. Ауи – ныбыжьла, хъацIа-пхIвыс-хIва, йызпхьазла, динла, ъачIвагIала, тгIачвата йрымула, разыгIальаматраквала йалырымхуата – йызтахъу зымгIва гIаларжьитI.
швталра йа тшаншвцIара атахъыпI.