Апсны йауу апхьагIвчви астуденткви Абаза бызшви литератури рфестиваль йахъвыкIта йакIвшуш абаза бызшвали апсуа бызшвали уыса гIапхьарала анкъвакъвра хъада йалазлуш апхьагIвчва ъагIалырхуаз анкъвакъвраква йрылан. Ауат рпны рапхьаща гIадырбатI АГУ афилология факультетт йапхъахауи йгIвбахауи акурсква, Гвдауыта 2-хауа аквтанай апхьарта, Гагра 1-хауа аквтанай апхьарта рапхьагIвчва.

АпхьагIвчва абаза бызшвалагьи апсуа бызшвалагьи уыса йгIапхьара атахъын. Ауат штшдрыхIазырыз, ауыса апхьара йшазычпу дырхъвыхуан АГУ афилология факультет адекан Хагуш Батал ахIбата дъачIваз ажюри. Ауи йалан апсуа литературала АГУ акафедра арыпхьагIв ахIби адоценти АмкIваб Ахри Какоба Адгури, апсуа бызшвала АГУ акафедра адоцент Лихова Наталья, «Абаза бызшви литератури рфестиваль» проект унашва ахъызцIауа ПIаз Сергей йгьи Черкесск апны йгIаныршу «Алашара» жвлара адкIылара ахъвшара аунашвачпагIв Мыква Мурат. Гагри Гвдауыти рпны ажюри йгIарылалуан арыпхьагIвчви арыпхьарала ауысхартаква рынхагIвчи.

АгIвуагIахъакI абызшви акультури йырзынарху ауысквала ращтаныкъвара апны арат йрапшу ауысква магIныта йрыму гIаликIгIатI АмкIваб Ахра.

«Абаза бызшви литератури рфестиваль апсуакви абазакви культурала, бызшвала ращтаныкъвара рыбагъьара ауыс апны рахIа мгIан ду зму ауатыквква йрыуазакIыпI. Ауи ансисквшагьи йакIвшалитI, Апсны йауу чкIвыныргIагьи йхъдымрыпауа ауи йалазлитI. Апроект апкъ йтата Апсны йауу апхьагIвчва, астудентква, арыпхьагIвчва Къарча-Черкес апны йакIвшауа анаука-практика конференциягьи джьгарта йалазлитI», – йхIватI АмкIваб.

Апсны апхьартаква рпны йакIвшаз анкъвакъвраква бзита йшадгалаз гIалыркIгIатI ареспублика йгIайыз асасчва.

«Апхьарта ауи анкъвакъврагIвацата акIвымкIва гвыргъьахъвыта йаднагалтI. Ауысаква йгIарыпхьауа йаламгаскIва Амамыр амш йазынархата асабиква «Амамыр ахIвыхIв» ргылчIв гIадырбатI. Зныбыжьквала йалыхыз агвыпква рыуа закIы ауысаква йангIарыпхьара амщтахь тшпсщара дакъикъаквакI гIабжьадрышвуанта ауи азаман ашвахIварала йдырчвуан», – Гвдауыта йгIвбахуа апхьарта апны анкъвакъвра лахIварата йгIайыланацIаз хIыцагIвишатI ПIаз Сергей.

ЙгIаликIгIатI ауи анкъвакъвра йалакваз абаза йгьи апсуа уысара азыгIальаматрата йазрымугьи.

«Астудентква закIы-гIвбала йгIашIамсуата хуысакI йгIарыпхьара зтахъызгьи рылан – ауи анкъвакъвра йаларымпхьадзузтынгьи. АпхьагIвчвагьи швабыж цкьата, ауыса амагIны угвы йнадзауата, йангIалуата тшацырчпауа йгIархIватI», – йлахIвараква гьцIайымкIуазтI ПIаз Сергей.

Анкъвакъвраква ргIарбараква йанрылапшра амщтахь йагъьта йырпхьадзауа 14-гIв гIалырхта Къарча-Черкес апны йакIвшуш анкъвакъвра хъада йырщтиуаштI.

Абаза бызшви литератури рфестиваль адгалра асквш 2019 агIангьи сынчIвагьи Апрезидент грантква р-Фонд гIацхърагIитI. Афестиваль адызгалуа «Алашара» жвлара адкIылара акIвпI. Ансисквшагьи ауи йалазлитI Апсны йауу аделегация: апхьагIвчви астуденткви уыса гIапхьарала йанкъвакъвитI, апхьахьакви аъачIвагIагIвчви «Тобыль апхьараква» наука-практика конференция йалазлитI.