«Абазаква рыгIвзачва йрыцпI. ЦнапIкIракI» зхьзыз чкIвыныргIа рнетворкинг акIвшатI Ставрополь апны амтшаша, ноябрь а 11 атшын.
Барганджиа Саид
Зыбызшваквала йапшым студент 120-гIвы, Ставрополь абзазагIвчви датша штаквакI йгIартыцIыз асасчви айззатI ноябрь а 11 йакIвшаз чкIвыныргIа йырзынархаз «Абазаква рыгIвзачва йрыцпI. ЦнапIкIракI» зхьзыз анетворкинг апны. Анйара АуагIахъакви акъазакъкви руысквала акрай комитет ацхърагIарала Ставропольшта апны абазаква руагIахъа-культура автономия «Абаза» йаднагалтI.
Ажва «нетворкинг» ангьльыз бызшва йгIахъыхпI, урышв бызшва йгIалалищтара щарда гьцIуам, ауаса чкIвыныргIа рыхъазла йгвынгIвырахарныс йгьи йщцалрахарныс йахадзатI. ЙауацIыхта йухIвушызтын нетворкинг – уыскI йадгылата ауи ауыс хъйара ззатуа ауагIа йрадкIыларапI.
Ауи ажвлара шабгу рыхъазла магIны зму йа йазалта ъачIвагIа кIьыдакI йазынарху уысхарныс ауаштI. Ауи лкIгIара хъадата йаму ауагIа зацацхърагIауата, йабаркIыта мурадкI йазычIвырхъауа, азаджв азаджв йыцIагылхуата йаъазара акIвпI.
«Цысквшахауата йадыгIгалитI ари йапшу анйараква. ХIара хачIв хъадата йхIыргылитI Ставропольшта апны йбзазауа, йапхьауа ауагIа адхIкIылырныс, ауат рпны апхъагылагIвта йзалуаш, джьгарта йзынхуш гIалхIкIгIарныс, йхIыгвлачву ауагIахъаква, аныла-арыла йгIатыцIта апхьара араъа йхIызгIайуа астудентква хIгвбайара, хIцIасква дхIырдырныс», – лхIватI АААК ахабарргарта портал ахъазла дгIачважвауата Ставропольшта апны абазаква руагIахъа-культура автономия «Абаза» унашва ахъызцIауа, АААК ЙхIаракIу асовет йалу Чагва Армида.
Ауи йшылхIвазла, сынчIва чкIвыныргIа рыхъазла «мастер-класс»-хIва йызпхьауа йапшым атшыбжьараква адыргалтI, ауат йрылакваз гвыпта уацынхара шатахъу гIаргвындыргIвытI, хъгалра зму, ажва ъагIадрысабапуа йгьи йъагIадымрысабапуа абадырра амальква ддырдыртI, ачважваща – ауагIа йатахъу ажва шрызгIарауаш – йазырбжьатI.
Йапшым агвыпква йырзынархаз атшыбжьараква йара заманкI йакIвшун.
ЙгIайззаз зымгIва рыхъазла концерт джьащахъва адыргалтI. Ауи йалан КIавкIаз ауагIахъаква ргIахIвыщаквала ансамбль «Горец», дара рхъацIа гIахIвыща гIазырбаз атаджик студентква ргвып, зыбызшвала ашва зхIваз Индия йауу астудент Чхокар Шубхам.
«Йара ауи йапшта абаза хIвсысаква уыжвгIанчIви заман йаквыргIапста йырсата АуагIахъа уысквала акомитет ацхърагIарала йырдзахыз ауагIахъа фашаква гIадырбатI», – йгIацылцIахтI Чагва Армида.
«Абазаква рыгIвзачва йрыцпI. ЦнапIкIракI» нетворкинг сынчIва уагIата 120-гIвы райхIа гIалалтI – ауат агIвыма къральква рпны йбзазауа абазаква, Ставрополь апны йапхьауа апсыуаква, Греция, Индия, ЮАР, Таджикистан йауу астудентква рылан.
швталра йа тшаншвцIара атахъыпI.