Апсны апны ужвы акоронавирус ауысла аэпидемиология аъаща уарыразитI, йхIватI азгIвадарахчара аминистр Цахнакиа Тамаз абзазагIвчва акоронавирус шIкIгIара рачвхъыхчара йазалху а-Координация штаб алачIвара апны, ауи апщаша июнь а 11 атшын йакIвшатI.

Ари апш аъаща ъащаквгылыз збзиру ашIкIгIара абакIра йазынарху амальква йаназаманыз йъанахIахвыз акIвпI, йгIаликIгIатI аминистр. Ауи аштаб йалакву йшрайхIвызла, апандемия гIаншищтара Апсны йгIаргтI сом 67 353 772 рыхв йаквшвауата амедицина ъамапсымаква, ахъвшвква, ахъыхчара пкъыгIваква. Ауи акIвымкIва июнь мыз ауацIа Апсны аурышв жвлара йгIазыркIкIыз сом 9 мильуанкI райхIа йнадзауа ахчала ужвыгьи медицина ъамапсыма гIаргра атахъыпI.

«Ужвы асахатI Апсны апны ИВЛ ъамапсымата 60 гIадрысабапитI, ауат йрыуата 22 асквш 2020 мартI мыз йгIашIарышвта йагIвсыз агIамта ауацIа йырхвгIатI. Апандемия гIаншищтара ашIкIгIара йазынархата ПЦР-рхъвыхра 5900 гIарыквшватI. Рхъвыхра 1677 акIвдыршатI, уагIа 1241-джв йырхьпшытI», - йхIватI Цахнакиа Тамаз.

Ареспублика апны йщаквгылу ашIакIра амальква рпсахра далачважвауата Апсны апремьер-министр Анкваб Александр йшгIаликIгIазла, ашварагIварадара багъьахара йгьи акоронавирус акъраль «йгIатарымгара» ахъазла акъральгIвына хъысыртаква хъгIвата йгIаныжьра атахъыпI.

«ХIкъральгIвына ахъысырта хъгIвата йгIаныжьра атахъыпI, ауи гIахIрысабапуамцара акъраль ауацIа ашIакIра амальква гIахIырльальауа хIымгIвайсуаштI», - йхIватI Анкваб Александр.

Ауи йшгIацицIахызла, акъральгIвына ахъысырта гIахъыртIрыквын Апсны йгIайуа ауагIа йрылахIауа йалагуштI, ауи акъраль ауацIала аэпидемиология аъаща аргвымхарныс ауаштI.

ГIвсахIаткI раъара йалачIвата йынхаз а-Координация штаб апны ауи йалакву ангIалтI COVID-19 ауысла Щаквыргылра шIыц лырххта гIамта айшысла Апсны а-Президент Бжаниа Аслан йнапIыцIадыршварныс. Ауи даналапшра амщтахь ашвъа шIыц йгIайуа амчбыжь ахъа акъральыгIва ахъада йсайт йгIаквырцIуштI.

УахьчIвала йгIахвта Апсны апны коронавирус шIкIгIара шгIарахвызла йбергьльыпI 36-гIв, ауат йрыуата 27-гIв бзихахтI, азаджв дпсытI. Гвдауыта къала аквта чымазагIвтара апны айъазагIвчва 8-гIвы йрайъазитI. УагIа 481-джв Согъвым йтагылу «Айтар» сасырта апны гIвымчбжьа руацIа йырхъпшылуата йаъан. УахьчIвала ауаъа 16-гIв гIанхатI.

КIавкIаз апны COVID-19 тшшауацIнахуа гIазырбауа астатистика тшахаргIваза йауаштI абари азцагала