Трыквшта апны Апсны акIьыкIвара нхауищтара йцIауа асквш 25 руацIа псахрата йгIаншаз, баргвырата йзынйуз, проектта йлырхуаз йгьи абзазара йаларыжьуаз йрыквчважватI йапшым асквшква рагIан тшызпсахуамцара акIьыкIвара аунашвачпагIв йъанатIа нкъвызгуз ауысхагIвчва.
Барганджиа Саид
Трыквшта апны Апсны акIьыкIвара гIахъыртIищтара сквшы 25 цIитI. Ауи асхъан Апсны йапхъахуз апрезидент Ардзынба Владислав йщаквыргылрала ауысхарта Астомбыль апны йгIахъыртIытI. Йапхъахауата акIьыкIвара даунашвачпагIвхатI АгIвдза Владимир.
АкIьыкIвара йапхъахауата йахъадаз йапхъахуз йынхара мшы шцаз
Ари аъанатIа сквшы 20 райхIа йынкъвызгаз АгIвдза Владимир йыхъазла арат асквшква йбзазара йахъв хъада духатI.
Абар ауи ари ауыс шгIайыхъвдаквырцIаз дшаквчважвауа: «Ардзынба Владислав сызшIитын йгIасайхIвтI джьауапкIра ду зпщылу уыскI гIасыхъвдаквицIарныс шигвыгъу. Ауищтара сквшы 26 цIитI, ауысхарта гIахъыртIырныс сквшыкI атахъыркIван. Ауыс сара йъагIасквнадыргаз йашвхIаусыгIву Трыквшта йту хIдиаспора йрыуата ауи асхъан щардагIвы бзита съарабадырхьаз, съарыщтаныкъвуз акIвызшва йызбитI.
АгIвдза Владимир Трыквшта апны дъадзанхуз хъатачIв мшгIвыра нкъвигун, мшигIадза йгIаншуз йауацIыхта йыгIвуан. АмшгIвыра апсыуа кIьыкIвара зтшын йгIахъыртIыз йгIашIарышвта йджвыквицIатI, ауи ахIатырла бзита йдырхитI ауысхарта ангIахъыртIы атшынгьи ауи агIаншара азаъащата йазйымазгьи.
«Йапхъахауа ачIвырхъа учпарныс швабыж йбаргвыпI, джьауапкIра дугьи апщылапI. СыгIвзачвагьи датша уагIа щардагьи гIасыцIагылтI. Ауи атлахан ъанатIа щарда нкъвызгахьата йаъан, ауатква съадзанхуз йадскIылыз адырраква гIасыхъвахтI. СызхъгвыргIвуз гьмачIмызтI, ауаса схъагвы аквын йгьи йсгвапан. Анхара саналагуз зымгIва рапхъа йстахъын ауаъа йбзазауа хIабашталагIвчва ргватра Апсны йазынадырхарныс. Ауи анархартала нхара ду акIвхIыршатI, щардагIвы хIрынйатI», – йгIайгвалашвахитI АгIвдза Владимир.
«АхIвачIвгIвыртаква зымгIвагьи Анкара йаъапI, ауаса апсыуаква зымгIва рацкIыс йъащарду Астомбыль апны акIвпI»
Апсны акIьыкIвара Астомбыль апны хъара йпшуата акIвпI йшгIахъыртIыз: араса йщаквйыргылтI Ардзынба Владислав йхъатала. АгIвдза йшихIвазла, ауи йашвхIаусыгIву ауысла Апсны йапхъахуз апрезидент йажва кьангьаш азгIауымгуашта йбагъьан: «гвынгIвырапI ахIвачIвгIвыртаква зымгIвагьи Анкара йшаъу, ауаса хIара зымгIва рапхъа апсыуаква хIрыцынхара атахъыпI, йара акIвпIта ауат зымгIва рацкIыс йщардагIвыта йъатабзазауа Астомбыль акIвпI». УыжвгIандзарагьи Астомбыль апны акIвпI акIьыкIвара ъанхауа. Асквш 2014 агIан АгIвдза Владимир дипсахын акIьыкIва йъанатIа йхъвдаквцIарахатI Гицба Инар. Ауи йахIба уысхагIв йщаквйыргылыз ацIас пшдзаква найырдзахуата йынхара джвыквицIатI.
«Уыста спахь йгылан Трыквшта щардагIвыта йтабзазауа хIдиаспори Апсни ращтаныкъвара арыбагъьара йгьи агIвымакъральква йырзынарху хIкъраль аполитика гIальаматраква рнарыскIьара. ЦIабыргыта, ауысхарта гIаншищтара арат ахачIвква тшрымпсахуата йгIамгIвайситI, рмагIны гьымдзстI, абзазара йызлалагIыжьуа амальква тшырпсахырныс ауаштI акIвмызтын», – араса йпхьадзитI Гицба Инар.
Сквшщарда йакIвшуз анхара: агIарбаракви абаргвыракви
АкIьыкIвара анхагIвчва уыс щарда дырхъйитI – культура, гуманитар нархара рымата.
«Араъа йакIвшауа аконцертква, знархарала йапшым агвыргъьахъвква рпны хIапсыуа ршIыйагIвчва гвыпква ргIалалра, хIспорт гвыпква ргIайра адыгIгалуан, – йхIвитI Гицба Инар. – ХIуысхарта араъа йаъищтара райщчвара ащтаныкъвара щаквгылтI
Трыквшта йгьи Апсны акъалаква ймачIымкIва, гватра ду азхIыман арыпхьара: хIычкIвынчва атрыкв университетква рпны йапхьарныас амаль раутI».
Ауи йшихIвазла, рынхара апны абаргвыраквагьи гIаншун. ЗымгIва йрапхъата ауат гIазхъшахъыцIуаз акырт хIвачIвгIвырта ракIвын – ауат йашIамсуата йгIарпырасуан, руысква шалымсуашла амальта йрауа гIадрысабапуан. Ауаса, Трыквшта апны Апсны акIьыкIвара лшара ду гIадырбауата йынхитI, йажва найырдзахуата араса йхIвитI Инар, –«хIдахIвраквагьи апхъахьыла йхIырхъйарныс хIзайгвыгъауа ауысквагьи щардапI».
Ащтаныкъвара арыбагъьара йгьи Апсны агIальаматраква рнарыскIьара
ЦIыпх июль а 17 атшын Трыквшта апны йазалху ахъвдаквцIараква нкъвызгауа Апсны акIьыкIва йъанатIа апны Гицба Инар дипсахтI уахьчIва йъагIадзазгьи араъа йынхауа Харазиа Вадим. Асквш 25 рурала йапшта, акIьыкIвара гIвнархарта хъадакIла йынхитI: Трыквшта йтабзазауа апсыуа диаспори Апсни ращтаныкъвара арыбагъьара йгьи Трыкв Республика апны Апсны аполитика гIальаматраква рнарыскIьара.
Харазиа Вадим йшгIаликIгIазла, Трыквшта апны уахьчIва апсыуа диаспора йгIарыцIанакIуата уагIа 500-н зыкьыгIв бзазитI йгьи ауати рапхъанчIви псадгьыли ращтаныкъвара знархару анхара атшауацIнарыхра магIны ду амапI. Ауи ауысла проект щарда абзазара йаларыжьхьатI.
«Ажва гьалам, абаргвыраквагьи хIрынйитI, ауаса Апсуафед (Апсыуа культура квтаква рфедерация, Трыкв Республика апны ауат рпхьадзара 15 йнадзахьатI – аредакция ррытаразга), Адуней апсуа-абаза конгресс, Трыквшта апарламент апны йынхауа хIыгIвзачва ражва багъьи рцхърагIари рбзирала джьгарта хIынхитI, апроектква хIырхъйитI, амурад шIыцква лыхIхитI, ауат абзазара йалагIжьитI», – йхIвитI Вадим.
АААК йгьи Апсуафед рыцынхара ауысла Харазиа Вадим йгIахIгвалайыршвахтI щарда мцIуата КIавфед (КIавкIаз акультура квтаква рфедерация – аредакция ррытаразга) аунашвачпагIвчвагьи йшрынйаз. Ауи анйара анакIвшуз магIны ду зму ангIалраква адырчпалтI, апхъахьыла рацынхара уысква йрылачважватI.
УахьчIвала йыздынхалуа йгьи гIамта айшысла йыздынхалуаш ахачIвква гIайрахауата Харазиа арыпхьара знархару апроект даквчважватI. Апроект Апсны апхьартаква йгIарылгауа абитуриентква Эскищахир къала йтагылу Анатолия ауниверситет (Трыквшта апны рахIа йпхатшу ауниверситет йгьи астудентква рпхьадзарала адуней апны йпщбахауа агыларта зкIуа – аредакция ррытаразга) апны йхIаракIу адырраква гIапшцIыргарныс рылшуштI. АкIьыкIва йшихIвауала, ауниверситет аунашвачпагIвчва Апсны апны рфилиал гIахъыртIырныс йхIазырпI. Ари апроект йалапшырныс Апсны аправительства йырзырщтитI, уыжвласыла джьауап райдзара атахъыпI.
Трыквшта апны йазалху хъвдаквцIара нкъвызгауа Апсны акIьыкIвара нхауищтара баргвыра щарда йрынйатI, йалкIгIата йапхъахауа асквшква рагIан, йшпакIву ухIварыквын Апсны ауагIа р-Абашта айсра амщтахьбырг асквш 1994 агIан йгIахъыртIытI. Ауаса ауысхагIвчва йамайчуата абзазара йаларжьитI асквш 1994 йхьшвашваз мартI мышщымтакI ауи агIахътIра згIаджвыквцIараз Апсны йапхъахуз апрезидент Ардзынба Владислав йгвыгъаракви йгвалакви.
швталра йа тшаншвцIара атахъыпI.