Адуней апсуа-абаза конгресс акытква рапхьартаква рапхьагIвчви рарыпхьагIвчви рзгIвадара архъвыхрала апроект агIарбараква йрылапштI. Адиспансеризация АААКи Апсны згIвадарахчарала а-Министерстви йацыта йадыргалтI.
Базба Селма
Асквш 2023 агIан а-Конгресс анхагIвчви апсуа айъазагIвчва ргвыпи йцIыхъвахауата йъацаз Когониа И.А. йыхьыз зхъу КвтIол аквтанай апхьарта акIвпI. Ауаъа архъвыхра апхьагIвчвати арыпхьагIвчвати 150-гIвы раъара гIакIылстI.
ЙшцIасхаз апшта, адиспансеризация гIвхъвыкIта йшан – аща архъвыхри ауи агIарбараква гIапхьадзахауата амедицина хьпшри.
АпхьагIвчва йгIарпшытI апедиатрква Гуниа Есми Быковская Ольги, аэндокринологква Газизова Светлани Джьыкьырба ХIамиди, аофтальмологква Кове Анни Сангулиа Фатими, акардиологква Пипия Инги Поцхор-оглы Сарии, аотоларингологква Эшба Лани Халбад Рици, аневролог Синопян Роза, арентгенолог Берзениа Аслан, ареабилитолог Агрба Арзадин йгьи ЭКГ йаланхауа амедахщчва Бороловец Раиси Ламашова Эмми. ЦхърагIагIвта ауат йрыцын СогIвым амедицина колледж апхьагIвчва.
АпхьагIвчва йанырпшуаз зынла йчпачIву рархIвуан, йатахъу архъвыхраква йгIаркIылырщтуан. ЗакI зхьуата йгIарауаз ужвыгьи йазалху рхъвыхра йгIакылсырныс йырщтитI.
Арыпхьарали жвлара джьгаррали згIвадарахчарали АААК ахъвшара (ОСАЗ – аредакция ррытаразга) аунашвахъцIагIв Хагба Изольда акыт йшцази асквш ауацIа йалачпу нхарата йакIвдыршази гIалхIватI.
«СынчIва апроект КвтIол ацарала йалхIыргатI. Ауаъа хIара апхьагIвчвати арыпхьагIвчвати 150-гIвы раъара хIырпшныс хIылшатI. Асквш ауацIа акыт хъараква йыртабзазауа, ауи йгIалцIла ачымазагIвтара цараква зчвыбаргву апхьагIвчвати арыпхьагIвчвати 1000-гIвыкI хIырпшырныс акIвын хачIвыта йхIыргылыз. Ауаса йшцазла 1500-гIв райхIа хIырпшныс хIылшан – ауи хIайгвыргъьитI», – йгIалылкIгIатI ауи.
Хагба апроект архъйара йгIацхърагIаз ареспублика згIвадарахчарала а-Министерства дшырзыразу лхIватI.
«Адиспансеризация ангIалагIга зымгIва йрапхъата тшыззынахIырхаз згIвадарахчарала аминистр Бытба Эдуард йакIвпI, йаргьи зынла дадгылтI. Ауи амщтахь хIара хIрыцынхатI аминистр йтарагылыгIв Делба Саиди айъазара-профилактика цхърагIарала а-Министерства аунашвахъцIарта аъачIвагIагIв хъада Гуниа Есми. Ауат айъазагIвчва адгалра ауысла зымгIвала йгIахIцхърагIун. Ауи гьуыс майрам, йауа ухIварыквын, айъазагIв акыт данущтиуа ауи йара йынхарта ъачIвагIагIв дрымамкIва йшгIанымхуш уазхъвыцра атахъыпI. Йара ауи акIвпI анхагаква – УЗИ йа ЭКГ аппаратква – руысгьи зкву. Ажва ахъазла, КвтIол йапшу апхьарта дуква нархарипхьадзала гIвыджь-гIвыджь ъачIвагIагIв гара атахъын. ХIара зджьара йгIанымхауата ауи ацхърагIара хIазыразпI, ауи акIвымзара апроект гьхIзымырхъйушызтI», – лхIватI Хагба.
ОСАЗ хъвшара аунашвахъцIагIв апроект аурала АААК йацынхаз ахъатачIв квтаквагьи лразыра ажваква рзыналырхатI.
«ЙгIалхIкIгIара хIтахъыпI «MedLife» аунашвачпагIв Ахвба Лариси заман айшысла архъвыхраква зымгIва акIвзыршуз анхагIвчви. ХIылзыразпI адиспансеризация йалаз, техникала йгIахIцхърагIаз «АЛЬБАМЕД» медицина квта аунашвачпагIв Ходжава Альбина. Анчва дылзыразхатI СогIвым медколледж астудентква хIзадызгалыз Тарба Нато. Ажва аламкIва, хIырзыразпI апроект йгIалалыз абзихагIвчва. ЙгIалскIгIара стахъыпI а-Конгресс апны сызцынхауа агвып шабгу – хъвшарата йъанхалакIгьи ауат асквш ауацIа уыс щарда хIыцырхатI, ага дасузлакIгьи ргватра ззынадырхуш дара рпроектква рымазтынгьи. Араса йсхIвапIта: адиспансеризация хIынхарта анхагIвчва зымгIва рпсгьи ркъаругьи здыргалыз уыста йалтI. Ауаса йхъаду – хIара апроект хIарыразтI, ауи амагIны хIылахIхIватI. Йхъадахугьи – асабапра хIылаквала йыгIбун», – йгIацылцIахтI ауи.
Хагба дгвыгъитI асквш 2024 агIангьи апроект йалаз зымгIва алата йшацынадырдзуш.
Апедиатр Гуниа Есма акыт апхьартаква рапхьагIвчва рзгIвадара архъвыхра адгалра апны Адуней апсуа-абаза конгресси згIвадарахчарала а-Министерстви йацасуа йшынхуз дацIачIвагъватI.
«Асквш 2023 мартI мыз йгIашIарышвта а-Министерства АААК йацта Апсны акытква рпны асабиква диспансеризация йгIакIылырщтуан. АйъазагIвчва гвып йрылан апедиатрква, аневрологква, аофтальмологква, аотоларингологква, аурологква, акардиологква, аэндокринологква. Асабиква ареабилитолог дгIарпшуан, ЭКГ, УЗИ ргIапсгаквала йдырхъвыхуан. 14 сквша ацкIыс йахIбу флюорография рхъырхуан. Апроект хIсабиква згIва кIара гIарыдсылызтын пасата йгIагIдырырныс лшара гIахIнаттI, ауи ауагIа, хIуачIвымш зпщылазлуш асабиква рзгIвадара хчара апны а-Министерства ахъазгьи хIкъраль ахъазгьи магIын ду амапI», – лхIватI Гуниа.
ОСАЗ аъачIвагIагIв Хьышба Науыр апроект агIарбараква пхьадзарала йгIайырбатI.
«МартI йгIашIарышвта хIара йхIылшатI 19 кыткI рпны арыпхьагIвти апхьагIвчвати 1500-гIв райхIа рзгIвадара хIырхъвыхныс, ауат йрыуата 1200-гIв райхIа апхьагIвчвапI. Йшабгу йгIауахвырквын, Апсны акытква рпны 11-н зкьыгIв раъара цIайта йапхьитI, йшцауала, апроект ауат ржвизпроценткI гIаланакIтI, ауи гIарбара бзипI. Медицина ъачIвагIагIвта 80-гIв раъара гIахIцхърагIатI ари ауыс апны. Узыргвыргъьауа – йызпшыз райхIарагIв згIвадапI, дукI рцрыхъуата йгьаъам, ауаса уызхьпшра атахъугьи аъапI. Ауи акIвызтIхIва йазалху айъазара – аркъьараквагьи алата – йазыбжугьи хIрынйатI», – йхIватI ауи.
Хьышба йгIаликIгIатI Апсны акытква рбзазагIвчва рзгIвадара акъраль уачIвы акъагIара йшащату.
«МагIын ду амапI агIвычIвгIвыс йзгIвадара алкIгIараква дшхвыцыркву йангIаудыруа. Ауыла акытква рбзазагIвчва рылшараква акъалаква йырту рацкIыс ймачIпI. ЙалкIгIата айъазагIв йпны ацара рчвыбаргвпI атгIачва дуква. Ауыла йгIауахвырквын, диспансеризация – магIын ду зму къральыгIва уыспI», – йгвгIанаграква хIыцагIвишатI Хьышба.
Диспансеризацияла апроект акыт хъараква рапхьартаква рпны апхьагIвчви арыпхьагIвчви медицина цхърагIара рзадгалра йазынархапI. Апроект асквш 2023 мартI мыз йгIашIарышвта АААКи згIвадарахчарала а-Министерстви йдырхъйитI. Ауи апкъ йтата ареспублика а 19 кыткI рпны уагIата 1500-гIв райхIа йырпшытI, ауат йрыуата 1200-гIв апхьагIвчвапI. Ауыс адгалагIвчва апроект асквш 2024 агIангьи йдырхъйарныс ргвыгъапI.
швталра йа тшаншвцIара атахъыпI.