Адуней апсуа-абаза конгресси амакъымршIыйагIв Марыхвба Абзагви рхъвыхрата «Аҿар рыбжьы» проект джвыкврыжьтI.
Адуней апсуа-абаза конгресс апсуа макъымршIыйагIв Марыхвба Абзагв далата апроект шIыц «Аҿар рыбжьы» (апсуа бызшвала – «АшIара рбжьы») рхъвыхрата йджвыкврыжьтI. АпхьагIвчва 30-гIв райхIа злаз йапхъахуз амастер-класс февраль а 9 Гвдауыта апны йакIвшатI.
Апроект Апсны апны йгIадзынгылуа абанпара йрыуата амакъымршIыйара йазычпата йрылу гIахътIра йазынархапI. Апроект лызхыз амакъымршIыйагIв Марыхвба Абзагв йшипхьадзауала, ауи ршIыйара злу агIвычIвгIвыс йщаквгылра апны йапхъахауа чIвырхъата йалныс ауаштI.
«УахьчIва йхIчпауа ауыс амакъымршIыйара йацхърагIара йахъазымкIва Анчва йхъвыкI злу чкIвыныргIа гIаурагьи йазынархапI. АршIыйара зпсы йалу ауагIа ауи амгIва йаныквылгIвацауа агIан уырцхърагIарквын агалагьи рыцIа магIны амапI. ГIвыджь-хгIвы мгIва тамам йхIзыквцIузтынгьи хIара хIыхъаз ауи уыс дупI», – йгIаликIгIатI ауи.
Йапхъахуз амастер-класс далан НТВ апны йакIвшаз ашвахIварала асабиква рквта Адуней анкъвакъвра «Ты супер» апны айгIайра гIатызгаз Адлейба Валерия. Ауи лыршIыйара шджвыквылцIаз, йапхъахауата ашва ъалхIваз, апхъахьыла лгвтараква агьиква асабиква йралхIвтI, атшыбжьара йалаз ахвыцква разцIгIара щардагьи джьауап рылттI.
«АгIвычIвгIвыс хвыц, йалкIгIата аршIыйара Анчва йгIазлайцIаз асабичкIвынква цхърагIара швабыжта йазыбжапI. Схъа гIасахвпIта, сани ашвахIвара сазызбжьуз сарыпхьагIви йсыцрымкIзарквын уахьчIва ашва гьсымхIвушызтI, амакъымршIыйарагьи сгьаламызлушызтI», – лгвгIанаграква хIыцагIвылшатI Адлейба Валерия.
«Аҿар рыбжьы» проект Адуней апсуа-абаза конгресс ахьыла йахъпшылитI чкIвыныргIа ртшауацIыхрали физкультурали ахъвшара аунашвахъцIагIв Берзениа Валерийи ахъвшара аъачIвагIагIв Квициниа Есми. Берзениа Валерий йшихIвауала, хачIвы шлырхыз апкъ йтата апхьагIвчва рыхъазла амастер-классква Апсны арайонква зымгIва рпны йакIвшуштI.
«ХIара ари ауыс йбергьльу апсуа ашвахIвагIвчви артисткви гIаланахIыркIуаштI. Рхъвыхгата йапхъахауата хIъаныз йыгIбатI асабиква амакъым адуней шрымаджьащахъву. ХIара йхIмурадпI Апсны анахьанат арайонквагьи хIцарныс. Апроект йгIалцIуаштI Адуней апсуа-абаза конгресси йхIыцынхауа Марыхвба Абзагви ркъарула йгIандыршуш амузыка композиция шIыцкви авидеоклипкви. Йхъадахугьи – хIара хIгвыгъитI ари апроект абзирала хIкультура щтIызхуаш ахьыз шIыцква гIгIушта», – йхIватI ауи.
ЙащтагIайуа амастер-классква Ткъварчал, Гал, Очамчыра къалаква рпны йакIвшуштI.
швталра йа тшаншвцIара атахъыпI.