АкъральыгIва штаб аунашвачпагIв амедицина уысквала йтарагылыгIв, Апсны Республика азгIвадарахчара аминистр йтарагылыгIв Конджариа Алхас акъраль аунашвачпагIвчва Апсны апны акоронавирус атшауацIыхра йапшIагылуа амальква нарахвищтара ансимшы абзазагIвчва ауыс зкву йахайыргIвазитI.

ЙцIыхъвахауа агIарбараквала, Согъвым къала йтагылу ашIашIкIгIара згIваква йъарайъазауа ачымазагIвтара бзазагIвкI тшазынайырхатI. Ауи йпны диагнозта йщаквдыргылтI ОРВИ. Гвдауыта къала ачымазагIвтара гIвбзазагIвчва ыцIашватI. Араъа коронавис аъата йгьщаквдмыргылтI.

Акоронавирус ауысла ателефон тшазынархараква руысла йазакIу аколл-квта апны йцIыхъвахауа асахIат 24 руацIа 150-ны райхIа телефон йастI, абзазагIвчва йгIадрахаз ауысква йрыдынхалтI (йнахвхаз амальква йрыланакIуата колл-квта гIандыршатI, аквта ансимшы Апсны абзазагIвчва йапшым ауысквала тшазынадырхитI, йанатахъхара апсихолог ъазаква рцхърагIарагьи ддрадзитI – аредакция ррытаразга).

«Апсны апны уахьчIвала коронавирус гIаншата йгьгIадмырбастI, ага ауаса йаъазтынгьи, агвжважвагIва аъаща амальква нардзара атахъыпI, абзазагIвчвагьи уыс гвжвайыгIвакI гIарыламшвузтын рунагIваква йгIарджвылымцIуата. ЙалкIгIата араса акIвпI Апсны апны акоронавирус ашIашIкIгIара згIва атшауацIыхра гIанхIмыршарныс шхIылшуш», – йхIватI Конджариа Алхас Апсны абзазагIвчва тшырзынайырхауата.

УахьчIвала акоронавирус ашIашIкIгIара згIва ауысла йдырхъвыхуата уагIа 60-гIвы раъара атестква йырхъыстI.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.