Абаза тацанадылра йапщылу ацIасква йгIарыквчважвауа авидеофильмква рабаркIыра Адуней апсуа-абаза конгресси «Алашара» Дуней адкIылари йацдырхъйауа, апсуакви абазакви ргвбайара тынха йазынарху «Амазара» проект надырдзитI.

Йхъырхыз ажвароликкI йрыуата апщба – «Атаца шIа йапхъахауата дзгара дшдырцауа», «Атаца шIа гвыр шылдыркIуа», «Ажьи Фатима лквтIужьдзырдза», «АхъагIараква шырмацIауа» – «Алашара» асайт йгIатарцIахьатI.

АААК ЙхIаракIу асовет аунашвачпагIв Эгьзакь Мусса йунашвала атацанадылра йапщылу ацIасква йгIарыквчважвауа авидеофильмква рахъыхра «Алашара» адкIылара йаланакIуа «АтгIачви асабикви» ахъвшари абаза кытква рпхIвыс советква радкIылари йадыргалитI.

Авидеофильмква рабаркIыра атацанадылра агIани ауи амщтахьи йынкъвыргауа ацIасква йалыргата йгIанарбитI.

Анхара зладжвыквырцIаз афильмква рсценарийква йрыщатахушыз ахабарква разкIкIрала акIвпI. Ауат ахабарква абаза кытква рпны йбзазауа ахIбачва йгIаршIыркIгIатI. Сюжетипхьадза ацIас ахъа уалагата ацIыхъвадза йшакIвыргашуз уыла йгIацIанажьуата, ауи магIныта йгIацIанакIуагьи гIаугвыннаргIвуата йдрыхIазыртI.

АбаркIыра йапхъахауа афильм «Атаца шIа йапхъахауата дзгара дшдырцауа» атдзы йгIашылыз атаца йщаквгылаз ацIасквала атгIачва шIыц рбзазаща дшаларжьуаз гIанарбитI. АжвапIта – атаца шIа дзы гIагра, мацIаура, аунагIва алыргара агьиквала аборч лыхъвда йшгIаквылуа. Тыдзра даналалра амщтахь йпщбахуз амш атаца шIа агвлачва хIвсысаквагьи лыцта дзгара дырщтиуан. Ауи асахIат атаца дырбарныс аджвырагIв гIайуазтын – «Ауи дзгара дцатI» – хIва рархIвуанта, анахьанатгьи йгIаргвынгIвуан атаца йапхъахауата агвлачви акытлагIвчви дшрылалыз. Асюжет атгIачва анкъвгарала аборч атаца йлыхъвдаквцIара – ахIбачва рборчква рынкъвгара айцIбачва йшырзыгIадзауа йшагIарбагу, ауи абанпараква рамдара йшацIасу гIанахIвитI.

ЙгIвбахауа авидеоролик  «Атаца шIа гвыр шылдыркIуа» атацанадылра йащтагIайуа ацIасква йрыуу закIы гIанарбитI – атаца шIа гвыр лыркIра. АтгIачва шIыц рпны атаца ддзахуа далагара апхъала дгIазлалыз аткъвым рымадзаквакI лдырдыруан. ПщдакъикъакI йнайуа аролик ауи ацIас шакIвшуз уыла йгIацIанажьитI.

Абазаква айшва анхъыргIвауа – ауи йашвхIаусыгIву гвыргъьаразтынгьи нашхыйаразтынгьи – апхъапхъа ауи йгIаквдыргылуа квтIужьдзырдзапI. Йхпахауа авидеоролик «Ажьи Фатима лквтIужьдзырдза» ауи абаза фачIвы амацIауыща амадзаква гIахънатIитI. Ауат амадзаква гIалхIвитI амацIауыща бзита йыздыруа ЙынджьыгьчкIвын кыт ахIвссаква рсовет аунашвахъцIагIв Ажьи Фатима.

Йпщбахауа аролик «АхъагIараква шырмацIауа» мастер-класс джыпха йтагылата къальтама шдрыдзуа уазнабжьитI. Ауи ахъа уалагата ацIыхъвадза йгIалырбитI Къазма акытква рыхIвссаква рсовет аунашвашвахъцIагIв Уырчыкъва Асйат.

Афильмква дыррежиссерпI абаза ршIыйагIв шIа Апса Аслан. АпщфильмкIгьи «Алашара» адкIылара апны «АтгIачви асабикви» хъвшара унашва ахъызцIауа Джьмакъвыл Нателла лсценарийквала йхъыйхтI авидеограф Шармат Динисльам.

Джьмакъвыл Нателла йшылхIвауала, агвып апщфильмкIгьи ъагIарыдахIвыз збзиру «зуыс бзидздзата йыздыруа арежиссер» йакIвпI.

«Арежиссер йуыс ауи аъарала дазычпапIта – агвып зымгIва анхара ргвы азыщтIата йадгылуан. ДзачIвызлакIгьи йгIайархIвуаз йнардзата йчпун. РыцIа хIыздгIапсалыз йгьи хIзырхъыччаз, йызнымкIва йхъыхIххра атахъхаз – апщырхIаква гIащтIыхра акIвпI. Дзбылга зынгьи йзымкIысыз хIыхIвссаква рыхъазла ауи йангIалуата, пшдзата йчпара уыс баргвыта йгIацIцIтI», – лгватраква хIыцагIвылшатI ауи.

Авидеофильмква ррежиссер Апса Аслан апроект йшалакIу йгIауахвырквын магIын ду шаму гIаликIгIатI.

«Абазаква йынкъвыргуз цIас щарда агIамта йарыдзтI. Заман агIвспхьадзагьи апхъала йынкъвыргуз ацIасква шаъаз ухIварныс рыцIа-рыцIа йбаргвхитI. ХIапхъанчIвиква рхабзакви рцIаскви гIащаквыгIымжьуазтын – хIтурых хIчвыдзта йпхьадза», – йхIватI Апса Аслан.

ХIызту асквш апны «Алашара» адкIылара йаланакIуа апхIвыс совет проект хъадата йыздынхалуа 10 видеофильмкI йнадзауа ари абаркIыра арыхIазырра акIвпI. Ауат анхъырхра абаза тацанадылра йапщылу ацIас джьащахъваква йгIарыквчважвауа, абзазара йгIахъыху, зметраж нархъу фильмта йабыртхуаштI.

«Амазара» – Адуней апсуа-абаза конгресси «Алашара» Дуней адкIылари йацдырхъйауа, абаза уагIа ргвбайара тынха агIащаквыжьра йазынарху проектпI. Ауи гIалазгаз АААК ЙхIаракIу асовет аунашвачпагIв Эгьзакь Мусса йакIвпI.