Атрыкв шта Коджаэли апны йгIаныршу апсуа культура квта ауысхагIвчва Кандыр къала апны йаъу КIавкIаз айсра йаладзкваз рнышвынтара адзхъа ауат йырчвахъабагата амасхва (олива) цIлауатра ларцIатI.
Барганджиа Саид
Атрыкв дзыгIвбжьа Кефкен апны КIавкIаз айсра йаладзкваз йырчвахъабагата амасхва цIлауатра ларцIатI. Ауи ауыс гIаджвыквызцIаз Коджаэли шта апны йгIаныршу апсуа культура квта аунашвачпагIв Кардиа ХIасана йакIвпI. Ауи ашта апны, рыцIа тамамта йухIвушызтын – Кандыр къала апны – КIавкIаз айсра йаладзкваз рнышвынтара аъапI.
Акция далан Трыквшта апны Апсны ахIвачIвыгIвчва руысхарта кьангьашыгIвта йынхауа Лазба Джьансыхв. Ауи йшихIвазла, амасхва цIлауатра ауаъа йларцIарныс ахъазгIваца йгьгIалрымхтI. Ансисквша май а 21 – КIавкIаз айсра йаладзыз ауагIа рхъмаштылра мшы агIан – айззараква ъакIвшалауа ауаъа акIвпI.
«Апсуа-адыгьаква йрыуата 19-хуз асквшышв агIан зпсадгьыл нызыжьра атахъхаз ауагIа йапхъахауата йъагIадгылыз Кефкен атшпы акIвпI», – йгIахIгвынйыргIвытI акьангьашыгIв.
Лазба Джьансыхв йгIаликIгIатI ашIыпIа унашвачпагIвчвагьи агIаджвыквцIара йшацыркIыз.
«Трыквшта, Апсны, адуней антахьгьыт акъральква рпны йгIадзынгылуа апсуакви абазакви рабанпара шIаква магIын ду зму атурых гIаншараква гватрадъа йгIанырмыжьра ахъазла ари йапшу ауысква адгаллара атахъыпI», – йхIватI ауи.
Ахъмаштылра йазынархаз ауыс далан Адуней апсуа-абаза конгресс ЙхIаракIу асовет йалу ХIапIатI АхIмад. Акция йалаз ауагIа йцIлауатрахуш ашIыпIа апны цIла шIата 300 ларцIата гIахIайхIвтI ауи.
Ари ауыс 100-гIвы райхIа алан. ХIапIатI АхIмад йшихIвазла, ауат йрылан Трыквшта апны Апсны рхIвачIвыгIвчва, Трыквшта йауата АААК ЙхIаракIу асовет йалакву, Трыквшта аштаква Коджаэли, Сакарйа, Инеголь, Бурса, Къараельмас рпны йгIаныршу апсуа культура квтаква руысхагIвчва, чын ду зму акъвырльыкъвхагIвчва, Коджаэли рыжвлара.
«КIавкIаз айсра йаладзкваз йырчвахъабагата йлахIцIаз амасхва цIлауатра абзазари амамыри хъгалра шрымазлуш йазынхауа, хвы ззырбауа тыпта йаъазлара атахъыпI», – йхIватI ХIапIатI АхIмад.
КIавкIаз айсра йаладзыз ауагIа ансисквша май а 21 йырджьабалитI. Асквш 1864 агIан ауи амш Кбаада (Швача аргванква рпны уахьчIва Красная Поляна – Атшшара Къапщы – кыт ъаныргIалу апны йчIваз акыт йахьзын – аредакция ррытаразга) апны асквшква 1817-1864 руацIа йакIвшаз, уагIа зкьышвпхьадзара псадгьылдъа йгIанызжьыз КIавкIаз айсра ъалгаз ахъазла аурышв ры парад рчпатI. Ауи айсра амщтахь уагIа щардагIв тгIачвала Осман империяла йхъыстI, уацIыхъван адуней шабгу апны йхъылапсахатI.
швталра йа тшаншвцIара атахъыпI.