Апсыуа режиссёр, чIахIра змата АААК йалу Таниа Тимур йфильм «Анчва дизыразхатI сабаду айгIайра ахъазла» Россия апны йауацIыхта йгIадырбауа йалагатI.
Барганджиа Саид
Апсыуа режиссёр, чIахIра змата Адуней апсуа-абаза конгресс йалу Таниа Тимур йфильм «Анчва дизыразхатI сабаду айгIайра ахъазла» апремьера Москва апны агIваша апрель а 30 атшын йакIвшатI. Йара арежиссёр афильм тгIачвала йызпшуа афильмква йрылайпхьадзитI.
Апремьера анакIвшуз атшын Таниа Тимур алахIвара лашараква ддырчвуан.
«Йапхъахауата йхъысхтI зурала йабгу ари апш фильм йгьи насып дута йспхьадзитI ауи йауацIыхта йгIадырбауа йъалагаз. АпшыгIвчва ргвгIанаграква йапхъахауата йангIасархIв апремьера апхъала йанапшы амщтахь акIвпI. АуагIа гIасыдзхъагылын йгIасархIвтI афильм йапшырныс йшатагIайхуаш, раргванквагьи шрыцгIардуаш», – абараса йгвгIанаграква хIыцагIвишитI арежиссёр. Ауи йшихIвазла, афильм ахъыхра данчкIвыныз йгвы йгIаташватI, йалкIгIата «даззырхъвыцыз» йабаду йакIвын.
«Сансабийыз сабаду хабар джьащахъва щарда гIасайхIвуан, ауи агIан схъа йасхIвтI ауи йгIахIвахраквала кино шхъысхуашыз. Абар сквшщарда анахъыцI ссабихъа ауи агвала абзазара йалазжьырныс сылшатI. ХъатакIла йгIахIахвырквын ауат ахабарква фильмта йхъысхырныс акIвпI срежиссёрхарныс згIастахъхаз», – йхIватI Таниа Тимур.
Афильм ашIчIваракI йазалхыз атурасыла дгIахъвмартI КВН агвып «Апсны йауу нартргIа» дызцрылу, Апсны апны «Ужас» – хIва зыхьыз бергьльу Аршба Тимур. Ауыгьи даъан апремьера апны.
«ЗымгIва бзидздзата йакIвшатI. Афильм сгвапхатI. ЦIабыргыта ари афильм атгIачва йырзалху мшыркъвара комедияпI. ЙагIврымщтауата йапшырныс йаквгIазшIыститI зымгIвагьи. Ажва аламкIва Тимури сари хIхъа аладухитI. Ауи апхъахьылагьи йзыстахъпI адахIвра дуква», – йхIватI Аршба.
Афильм асюжет шаъула, Москва йауу чкIвынкI йаби йари апсыуа кыткI йтабзазауа йабаду йпны сасра йгIайитI. Акыт йауата дзынйаз ачкIвынчви пхIвыспакIи ауи дыгьрымгвапхатI. Йара апхIвыспа зынла бзи дибатI. Йабаду дашIамсуата дызлаз айсра ахабарква гIайайхIвитI. Ауат ахабарква ачкIвын дуней шIыц йзыгIахъыртIитI, магIны зму абзазара ацIас хъадаква дырзырбжьитI, хъацIара йылата дгIадзындыргылитI. Йхъаду атурасквала афильм апны йгIахъвмартI Россия актёрква Бероев Егор йгьи Алфёрова Ксения, абаду йтурасыла йгIахъвмарыз йбергьльу апсыуа актёр Хагба Кьасоу йакIвпI.
швталра йа тшаншвцIара атахъыпI.