АААК апроект шIыц «Аҭоурыхтә ҭынха аԥеиԥшазы» йаквчважватI Адуней апсуа-абаза конгресс апресс-квта апны.
АААК апроект «Аҭоурыхтә ҭынха аԥеиԥшазы» («Атурых тынха – хIуачIвымш ахъазла») джвыкврыжьуата Адуней апсуа-абаза конгресс апресс-квта апны ауи йапхъахауа ахъвы гIадырбатI. Апроект палеолит угIалагата асквш 1965-дза гIарыцIанакIуата Апсны атурых апсуа бызшвала йгIаквчважвауа хъвыта 30 йнадзуштI. ХачIвы шлырхызла, мзигIадза гIвхъвыкI рчпалуштI.
Апроект гIазхъвыцыз АААК ЙхIаракIу асовет йалу Инджгиа Джьамбул йакIвпI. Апроект АААК ЙхIаракIу асовет аунашвачпагIв Эгьзакь Мусса ахчала дацхърагIан йджвыквырцIатI.
Апрезентация гIахъылтIытI арыпхьарала, жвлара джьгаррала йгьи згIвадарахчарала АААК ахъвшара аунашвахъцIагIв Хагба Изольда. Ауи апроект арыпхьара ахъазла магIныта йаму дацIачIвагъватI.
«ЙшвхIырбауа, ашвъаква йгIархъыху афильмква рабаркIыра йгIахIдахIвыз, дырра гIазлукIгIуш проектта йупхьадза ауаштI. Дырра щарда злу аролик айшысква Апсны атурых рыцIа цIолата йууырдырырныс ахъазла цхърагIага бзиуштI. Кьангьаш гьазгIазгуам апроект Апсны атурых, ащаквгылща здырра зтахъу зымгIва рыхъазла йшсабапхуш», – йгIалылкIгIатI ауи.
Инджгиа Джьамбул апроект ангIалайгуз мурадта йымаз, апхъахьыла ангьльыз йгьи трыкв бызшваквала ашвъаква йгIархъыху йауацIыху фильм гIанйыршарныс шигвыгъу йхIватI. Ауи Апсны атурых ареспублика утыцIтагьи йднардыруаштI – агIвыма къральква рпны йбзазауа апсуаквагьи рылата.
«УахьчIва адуней ласыта апхъала йцитI. Ацифра технологияква рсквшышв ачIвы нанауахвитI. ХIабашта атурых анхIхIырдыруа ауи хIыла йгIацIанажьуата хIызпшуаш гьхIымам. АпхьагIвчвагьи астудентквагьи атурых ачвахъабагаква рылаквала йанрымбас, йъанугьи запш шIыпIу анрымдыруа айхIарапI. Ауи акIвпI Апсны атурых йгIаквчважвауа афильмква рабаркIыра гIанхIыршарныс зхъатахIкIыз. Ауат хIтурых анууырдыруа цхърагIагата йал йауаштI», – йхIватI Инджгиа.
Ауи АААК апроект архъйара йъацхърагIауа ахъазла дшазыразу, йхъырхуа афильмква чкIвыныргIа рпсадгьыл бзи йырбауата йгIадзныргылра ауыс йахъвушта дшайгвгъауагьи йхIватI.
АъачIвагIагIвчва рыхьызла айззара апны йгIачважватI АГУ турыхдыррала ахъвшара адекан, аистория наукаква ркандидат Габелиа Алик, аистория наукаква ркандидат СалакIайа Сослан, Апсны аинститут турыхдыррала ахъвшара аунашвахъцIагIв, аистория наукаква рдоктор АгIвдза Аслан.
АГУ турыхдыррала ахъвшара адекан Габелиа Алик афильмква йгIарылухуамца йазалху анаука терминква апсуа бызшвала йлыхра шатахъу дацIачIвагъватI. Ауи йшихIвауала, ауи апсуа уагIахъа зымгIва йрапхъу ауысква – цри бызшва, ауагIахъа тшдырра, абашта атурых хчара – йазынхитI.
Адуней апсуа-абаза конгресс ахьыла апроект йахъпшылитI АААК ЙхIаракIу асовет аппарат аунашвахъцIагIв Таниа Кан, хабарргарала аполитики абадырракви унашва рхъызцIауа Тарба Тенгьыз йгьи СогIвым йаъу ауысхарта аунашвахъцIагIв Реквава Темур.
Ашвъаква йгIархъыху АААК апроект «Аҭоурыхтә ҭынха аԥеиԥшазы» абашта атурых Апсны апынгьи ауи утыцIтагьи ауагIа йшырдыруаш йазынархапI. ЗымгIва шалу апсуа бызшвала фильм 30 хъырхуаштI. АдгалагIвчва ауат урышв бызшвала атитрква рыцIаргIвырнысгьи ргвыгъапI.
швталра йа тшаншвцIара атахъыпI.