Апсны зхъа йахвиту къральыгIва кIьыдата адуней апны йырпхьадзауа йалагищтара жвасквша ъацIыз йазынархаз агвыргъьараква акIвшатI ареспублика апны август а 26 атшын.
Барганджиа Саид
Согъвым апны ахъахвитра аюбилей дыртлапIатI: жвасквшала утхъахта Россия йырпрезидентыз Медведев Дмитрий август а 26 агIан адуней шабгу хабар дйырдыртI гIвреспубликакI – Апсни ГIвадахь Осетии – зхъа йахвиту къральыгIва кIьыдата йшаъу.
Заджвгьи дгьхIхъмаштылтI…
АйгIайри ахъахвитри гIатгара апны йалацIара хвы узаквымцIушта йаъапI аполитика йгьи акъральыгIва уыснкъвгагIв дудздза, Апсны йапхъахуз рпрезидент Ардзынба Владислав. ЦIас пшдзахатI ари амш ауи дъацIу йцри кыт Ешера йаъу анышвынтара хIврапшдза азыщтIацIара.
«Ардзынба Владислав анцIрала хIтурых йгIалахаз дгIвычIвгIвыс дудздзапI. Са гвы аститI ауи гIаншаракI йапщылу амшква йырхъазымкIва ансимш бзазара апынгьи ауагIа дшгIаргвалашвахлауа. Рхъа йыладухауата ауи йунашва рхIвитI, ауи тшйыцырчпитI чкIвыныргIа. Йаргьи ауи акIвпI йбайара хъаду, ауи хIара йапхъахуз хIпрезидент ауагIа йгIарылхIвуз дшгIвычIвгIвысыз йаквшахIатхитI», – йпхьадзитI апсуа футболасыгIв шIа Барганджия Рамин.
Август а 26 Апсны ауагIа дгIаргвалашвахитI йгIвыджьхуз апрезидент Багапш Сергейгьи. Апсны шабгу йгIатыцIитIта ауагIа ауи йцри кыт Джгерда йцитI, ауаъа ауи йнышвынтара хIврапшдза азыщтIарцIитI.
«Сара бзита йыздырхитI Россия ателеканалкI апны Апсны ахъахвитра йазынархаз ауи йгIачважвара. Сара Воронеж саъата сгвы тшарбцIуа, схъа йыладухауа ауи йажваква срыздзыргIвуан. Анчва дизыразхатI, ауи хIкъраль ахъазла йчпаз зынгьи йгьхIхъаштылуашым», – лхIвитI Багапш Сергей дгIалгвалашвахуата Апсны йауу, ужвы Воронеж йбзазауа Дарчам Заира – ауи лпагьи длыцта уыста йылчпан агвыргъьахъв далазларныс дгIайтI.
Ари атшын Апсны акъала хъада абзазагIвчви асасчви хIврапшдза щтIарцIатI Артшхъвара апарк апынгьи. Аквырджькви апсуакви йрызбжьаз айсра йаладзыз ачкIвынчва гIазгвалашваз гьмачIыгIвмызтI. Ауат Апсны акыт щарда йгIартыцIын йгIайтI.
«Ауат рпсадгьыл ащарыкьипхьадза рхчауата, швара ззырхIвауа рымдыруата рхъа щтIарцIатI. Ауат рфырра атурых йгIалахуштI, ауат рхъацIара йгIадзынгылуа абанпараква рыхъазла швапхазлуштI. ХIара араъа хIызгIайыз заджвгьи дшхIхъмаштылыз хIхIварныс акIвпI», – йгIаликIгIатI Гагра абзазагIв Аристава Астамур.
ЛахъвгIахъасракIта йагIвпссгIаз ажвасквша
Апсны асуратгIвгIвчва радкIылара а-Квта гIарбарта апны ахъахвитра амш артлапIара йазынархаз ауысква йрылата «Ахъахвитра агвыргъьахъв» зхьзу Чкадуа Ибрагими Попов Владимири йахъырхыз асуратква ргIарбарта гIахъыртIытI.
Араъа йкIыду асуратква сквш 25 гIазцIазкIуа Апсны Республика аполитика турых агIаншара хъадаква рымшгIвыра гIадырбитI.
«АгIарбарта арат асквш 25 руацIа Апсны йгIайыз адуней йгьи Россия рполитика уысхагIвчва рсуратква азнакIкIытI. Ари амагIны зладуу йапшым агIаншаракви ауат йрылаз агIвычIвгIвыскви гIанарбауамца йгIамыгIдахьу аполитика мгIва уыла йъагIацIанажьуа акIвпI. Ауи аэкономика амальквала хIымгIва анхъвыркIылуаз, хIкъральыгIвара йанацыркIуаз, йапхъахауата къральыгIва уысла сасчва хIызгIайуа йаналагаз агIамта гIазцIазкIуа хIуыжвгIанчIви турых йашIчIваракIпI. УахьчIва хIацапшхта йагIвсыз гIахIгвалашвахырныс, хвы шIыц-шIыц йаквхIцIахырныс йагIапI», – йхIватI зсуратква агIарбарта йалу Чкадуа Ибрагим.
АгIарбарта асасчва ауи зшIуырпшуаш шаъам йгьи амагIны шдуу гIалыркIгIун.
«Ари запш умауаш швъахчартапI, хIкъраль алахь шцуш щаквзыргылуаз агIаншараква гIаугваланаршвахитI. Анчва дырзыразхатI атурых йгIалахаз ауи аъара гIаншара, ауи аъара гIвычIвгIвыс рсуратква хIызгIанызжьыз. ГIари дызму зымгIва рысабичва араъа йгIардырныс срылабжьарын. ЙгIадзынгылуа абанпара ауысква шакIвшуз рахIвра, йдырбара атахъыпI», – лгвгIанаграква хIыцагIвылшатI агIарбарта йаъаз Тарба Линда.
АгIарбарта сентябр а 5-дза йынхуштI, ауи амщтахь асуратква Апсны акъральыгIва музей йрыртхуаштI.
АуагIа ргвтлахIвара: ахъвмарраква, ашвахIвара, агIахIвраква, агвыргъьахъв салют
Ари атшын Апсны акъала хъада аквпшыра тшапсахтI: йъакIвызлакIгьи ауагIа абаракъква рнапIыцIа, пхата сальам абархуа йамдун. АхIауа агвыргъьара алахIвараквала йырчвын. Ауи гIазлыцIуаз ашвхIаусыгIваква йрыуан Багапш Сергей йыхьыз зхъу агьагьара джьанат гъыцIаракI йапшта цIлашвырли уатралыцIли йъахъдрысыз. Ареспублика арайонква зымгIва йгIартыцIын атйыгIвчва араъа джьармыкIьа адыргалтI, йаладыргылыз ачатырква рпны дара рнапIыла йгIадырйыз, йырмацIауыз афачвква Согъвым асасчва йрызгIаквдыргылтI.
«Ари арахIмат анубара уылаква нагIвгIагIвуа йалагитI. Анчва уйызныхIвара атахъыпI ари апш чIвыла адуней йъакву. ХIара джьанат хIбзазитI, йхIыму хIзызхчуш, йаззырхIуш акъыль анчва йгIахIитыргIатI», – лхIватI аджьармыкIьа йалапшыз заджвы.
Агвыргъьахъв асасчва ъанашылуаз ачатырква рпны апсуа рызкъква ддрыфуан, йырчIархIуан, даргьи ргвы йгIатыцIдзауата Апсны акъагIара ахъазла ашIаква щтIырхуан.
«ХIара Краснодар хIауапI. Апсны апны гIвзачва хIымапI. Жвасквша рапхъала Россия Апсны зхъа йахвиту къральыгIва кIьыдата йшапхьадзауа ангIархIва – ауи хIара хIыхъазгьи насыпра дута йалтI. ЙуымхIварыгьи, ари адгьыл апны йаъу джьанатпI. ШвпшыстI аныла-арыла – йгьцIабыргымма, зымгIва бзидздзапI! Арызкъква зымгIва хъгIапI, апсабара йшгIаннаршауа апш йаъапI», – лхIватI Россия йауу агIамдагIвы Хоцанян Светлана.
Агвыргъьахъв концертгьи алан. Ауи Чанба Самсон йыхьыз зхъу Апсны адрама театр апны йакIвшатI. Айззара йалаз Апсны рпрезидент Хаджимба Рауль ареспублика абзазагIвчва агвыргъьахъвла драйхIвахIвтI.
«ХIара ауырата, айрышта адуней апны хIалархIвауа йаналагуш хIазцун. РахIа йанбаргвыз, йщарычIвараз айсра апны йайгIайыз хIкъраль аналарыхъвашаз, амгIваква анхъвкIылаз, агIылахIва абзазара хIангIахъуазгьи заджвгьи кьангьаш гьазгIайымгуазтI хIызквгылыз амгIва – зхъа йахвиту къральыгIва ауыхвара – шымгIва тамаму. АуагIахъагьи акъральыгIва аунашвачпагIвчвагьи рполитика мурадква рпны йацзакIын, йыртахъу нахвата йгIаргвынгIвуан», – йхIватI апрезидент.
Хаджимба Рауль йгIацицIахтI, Россия Федерация Апсны акъральыгIвара йшацнакIуа ангIархIва Венесуэла, Никарагуа датшагьи къральквакI йара ауи шырчпаз. Апсны ауат акъралькви дари разазаъащаква апхъахьылагьи штшауацIырхуаш, йшбагъьахуш йащтапI, ауи анархарала йатахъу ачIвырхъаква атнапырныс йхIазырпI.
Ауи асахIат амшын атшпы апны агвтлахIвара йашымтан. ЙахьъакIвызлакIгьи апсуа ашваква гIагун. АуагIа фаша рышвата уарад рхIвун, йгIахIвуан, сурат рхъырхуан. Анаъагьи араъагьи гваран хвыцквакI гIандыршунта агIахIвра джвыквырцIун.
Апхьарта йыцIу ЧокIуа Мия уахьчIва йамгIан мшу бзита йылдыритI. Ауи дхвыцыркIвата лани лаби йгIалархIвтI.
«Сара ауи агIан гIвысквша ракIвын сызтаз, ауаса сани саби йгIасархIвуан айсра шакIвшаз, ауагIа баргвыта йшбзазуз, уацIыхъван Россия йхIыцыркIын уахьчIва ауи хIайгвыргъьитI. ЗымгIвагьи сшвайхIвахIвитI!» – лхIватI ауи.
Апсны а-Фыр Трапизанян Галуста йпа йпа Марк йан длыцта Гагра йгIатыцIын агвыргъьахъв йалазларныс Согъвым йгIайтI.
«ХIара апхьарта апынгьи айсра, ауаъа хIшайгIайыз, ауи йаладзкваз рыхъазла кIара гIахIархIвлитI. ХIара гIвычIвгIвыс бзита хIшгIадзынгылуаш хIырбжьитI», – гIахIайхIвтI Марк.
Ажва аламкIва, зымгIвагьи агвыргъьахъв салют йазпшуан. Абар йаргьи ауи зхъа йахвиту Апсны ахъахьла ажвгIванд гIатнарыкIкIгIатI – ари амш амагIны ужвыгьи зны йгIахIнаргвалашвахуа, агвыргъьахъв мшгьи шалгауа гIахIнахIвуа.
Асквш 2008 август а 26 агIан Россия рпрезидент Медведев Дмитрий, апсуа йгьи асатин уагIахъаква ртахъыра гIайпхьадзауата, адуней акъральква разазаъащаква щаквзыргылуа ашвъаква рыпкъ йтата Россия Федерация Апсни ГIвадахь Осетии ркъральыгIвара йшацнакIуа ауысла Унашва мачвы ацIайцIатI. Ауищтара ансисквша Апсны апны август а 26 ахъахвитра йамшта йдыртлапIитI.
швталра йа тшаншвцIара атахъыпI.