Апсны Республика абзазагIвчва акоронавирус шIкIгIара COVID-19 йачвхъыхчара знархару амальква апхъахьыла ргIарысабапра ауысла Апсны а-Президент Бжаниа Аслан щаквыргылра найахвтI.
Апсны апны абзазагIвчва акоронавирус шIкIгIара йачвхъыхчара ауысла акарантин амальква рпсахтI. АшIакIра амальква зымгIва июнь азакIдза йщаквгылазлуштI. Апщаша май а 14 атшын Апсны а-Президент Бжаниа Аслан арат ауысква йауацIыхта йгIазырбауа йазалху ащаквыргылра мачвы ацIайцIатI.
Ащаквыргылра йшгIанахIвауала, май а 15 йгIашIарышвта ажвлара чартаква рынхара джвыквырцIахитI – йрыгIвнагылу айшваква рбжьара метркIи бжакIи ацкIыс ймачIымкIва йаъата, рынхагIвчва ахъахчара амальква (амедицина маскIакви анапIтаракви) гIадрысабапырныс рборчта. Йара ари атшын, май а 15, йгIашIарышвта акъалаква йырбжьаныкъвауа атранспортгьи нхауа йалагахитI.
Ащаквыргылра апны йгIарбапI афачIвтйырта, акытмлыкврхIара йгьи ахIапчып тйырта базарква рынхара апхъала апшта йшымгIвайсуаш. Ауат рынхара ашIыпIа унашвахъацIартаква рхъадакви асанитар-эпидемиология къвырльыкъвхартакви ангIалуамцара йадыргалитI – абазарква ртйыгIвчвагьи рынхагIвчвагьи ахъахчара амальква нкъвыргарныс рборчпI. Асанитар-эпидемиология къвырльыкъвхартаква йырхъвдаквцIарапI абазарква рыкIьадыгвква хъыхчара амальта хъвшвыла ргIарыцкьара адыргалларныс.
Ужвыгьи уагIа щарда злу айззараква ракIвыршара заджвгьи дгьахвитым.
«УагIа щарда злу акультура, афизкультура, аспорт, атшпсщара айззараква, агIарбартаква ракIвыршара йархвитымчIвра. Апсны Республика апны атацанадылраква, агвыргъьахъв айззараква ракIвыршара йархвитымчIвра. [Арат ахачIвква ршвхIаусыгIвала] аресторанквагьи анахьанат ажвлара чартаквагьи рыланакIуата атацанадылра, агвыргъьахъв залква рынхара гIашIакIра», - араса йгIанахIвитI а-Щаквыргылра.
Радгалра йгьахвитым ужвыгьи агIамдараква, аларпшраква, апшдзартаква ргIарыкIвшара. Йгьахвитым ауагIа гIадрайгвата асасыртаква, асанаторийква, атшпсщартаква, анахьанат асас бзазартаква йыртарцIарныс. Ужвыгьи йгьынхушым акультура нхартаквагьи: атеатрква, амузейква, аконцерт залква, ауасамцара.
Апхъала апшта йырмачIпI Апсны-Россия къральгIвына хъысыртала йагIвсырныс йахвиту агIвымакъральгIвчви къральгIвра змам ауагIи, руыс кIьыдапI Апсны Республика апны аккредитация зму агIвымакъраль дипломат нхартаква рынхагIвчва, Россия а-ФСБ акъральгIвынахчара унашвахъцIарта, ЙадкIылу Россия архъв акъвырльыкъвхагIвчва, акъральква рбжьара ахIатлараква нкъвызгауа атранспортква рынкъвцагIвчва, ахIатланкъвгага гъбаква рмашинистква.
Апсны Республика гвжважвагIва аъаща ауысла аминистерства, азгIвадарахчара аминистерства, ауацIауысква рминистерства йрыхъвдаквпI Апсны-Россия къральгIвына хъысыртаква рпны айъазагIвчва гвыпква рынхара уахъгьи тшынгьи йапымшвтуата йадыргалырныс. Ауыс йазалху анхартаква йарауаса рпахь хачIвы гылапI акоронавирус шIкIгIара COVID-19 ъаныкъвауа акъральква йгIартыцIта Апсны Республика йгIайуа акъральгIвчва 14 мшкIла йдыркIьыдата йырхъпшылырныс.
Апсны аунашвачпагIвчва йарауаса йгьадрыхвитуам Апсны-Россия къральгIвына хъысырта апны пошлина зымшвауата йгылу аткванква (дьюти-фри) нхарныс.
Йынхарныс йгьахвитым аспорт залква, а-СПА-салонква, асаунаква, амассаж салонква. ЙгвжвайыгIву агIаншараква ракIвмызтын зныкI ахъазла ауагIа йгьрадзушым айъазара тахъыраква рызбжа, йалкIгIата астоматология.
Аквта, ашIыпIа къральыгIва унашвахъцIартаква, акъральыгIва къвырльыкъвхартаква, анхартаква унашва рзырчпатI сквшы 60 райхIа зныбжьу, зныбыжьла апхьарта йыцIамылс саби зму анхагIвчва нхаша рыртуата йындмырхарныс.
Апхъала апшта йынхарныс йгьахвитым апхьартаква, аспорт апхьартаква, акружокква. Руыс кIьыдапI 11 акласс йгIалгауа рыхъазла йадыргалуа агIацIщтра экзаменква, йхIаракIу йа йквтанайу аъачIвагIагIацгарта апхьартаква рпны адиплом нхараква – «арат анхартаква йщаквдыргылыз ащтацаща дырхъйахуата, асанитар-эпидемиология амальква йшатахъу апш йынкъвыргауата».
Май а 14 атшынла йгIахвта Апсны апны йбергьльыпI коронавирус шIкIгIара зхьуа 14-гIв чымазагIвчва. Ауат йрыуата Гвдауыта къала аквта чымазагIвтара апны айъазагIвчва 13-гIв йырхьпшитI. Азаджв, Гвдауыта йтагылу йбыжьбахауа Россия архъв акъвырльыкъвхагIв, йара араъа арра чымазагIвтара апны йайъазуштI.
Апсны апны пандемия гIаншищтара COVID-19 згIва гIазахвта йгIадрыбергьльыз 17-гIв йнадзитI. Ауат йрыуата гIвыджь бзихахтI, азаджв дпсытI.
швталра йа тшаншвцIара атахъыпI.