Апсны апны ансисквша йадыргаллауа асогIа «Асквш йагъьу асуратчпагIв» акIвшатI.
Барганджиа Саид
Апсны культурала а-Министерстви ареспублика АсуратгIвгIвчва радкIылари йщаквдыргылта ансисквша йыршауа ахча согIа «Асквш йагъьу асуратчпагIв» аршIыйагIв шIа Кварчелиа Сабина йлырттI.
АсогIа адызгалыз йшырхIвауала, сынчIва йагъьу асуратква гIалызхуаз аъачIвагIагIвчва Апсны асуратчпагIвчва йапшым ажанрквала йыргIвыз нхара 100 рызгIаргтI, ауат йрыуата анкъвакъвра йалазларныс 73 гIалырхтI. Ауат асуратква асогIа зыртуаш йыхьыз ангIархIвушыз атшын Согъвым Аквта гIарбарта пещ апны йгIаладыргылтI.
Апсны акъала хъада йауу асуратчпагIв шIа Кварчелиа Сабина анкъвакъвра апны дайгIайуашта дгьазымпшуазтI. Ауи йапхъахауата ари анкъвакъвра далалын зынла айгIайра гIатылгатI.
Сабина сурат дхвыцищтарагьи йылгIвитI. Согъвым агвацчпа училища апны дапхьатI, уацIыхъван Апсны акъральыгIва университет дыцIалтI. АГУ дангIалга Кварчелиа Швейцария Азъазара ауниверситет апынгьи дапхьатI. УахьчIва асуратчпагIв шIа Согъвым АшIара ртдзы апны чкIвыныргIа асуратгIвра йазылбжьитI. Сабина анкъвакъвра «ДучкIа дапхьитI» сурат рылттI. Асурат ауи асквш 2019 агIапын йылгIвытI. Ауаъа ауи лабаду йахща ДучкIа дгIалырбитI. АсуратчпагIв йшылхIвауала, лнана лсурат ргIвра гьылтахъымызтIта «тшацалырпатI».
«Сара сурат йанакIвызлакIгьи йгIазхъысхуа сапшуамца йызгIвитI. ЙгIазхъысхуа айхIарала псабарапI йа сгIакIвзыршауа уагIапI. СхъатачIв азкIкIра нхара щарда йнадзитI», – лхIватI «Асквш йагъьу асуратчпагIв» согIа айгIайыгIв.
ЙгIвбахауи йхпахауи агылартаква «Пхыз» сурат згIвыз Цвижба Мактини «Рица гвал» згIвыз Пилиа Адгури йрырттI.
Апсны Республика культурала аминистр йтарагылыгIв Гурджуа Беслан айгIайыгIвчва зымгIва ахча согIа шрыртуаш йхIватI.
«Анкъвакъвра апсуа суратгIвгIвчва рквта хвду амапI. Швабыж йхIгвапапI ауи ахIбачва йрыцта аршIыйагIвчва шIаквагьи ъагIалалуа – ауат рыхъазла айгIайра аршIыйара рыцIагьи мчыта йадзыргылуаш ргвышхвага дупI», – йхIватI Гурджуа.
Апсны асуратгIвгIвчва радкIылара аунашвачпагIв Джениа Валерий йгIаликIгIатI анкъвакъвра асуратгIвра зъачIвагIу йырхъазымкIва астудентквагьи шалаз.
«ХIара ауи ззыхIчпауа (астудентквагьи алалырныс лшарата йызхIчпауа – аредакция ррытаразга) аршIыйара йауу ауагIа рынхараква гIарг йшауаш рдырныс, руыс ргвы азыщтIата йынхарныс ахъазла акIвпI. ЙаъапI астудентква рынхараква гIахIахвырныс йзымуагьи, ауаса са йшспхьадзауала, йхIчпауа тамампI. СынчIва асогIа зквшваз ауи апхъала зынгьи айгIайракIгьи тзымгасыз суратчпагIвчва шIапI. АйгIайра ауат хIреспублика апны азъазара атшауацIыхра йазынхарныс йаргвышхвуштI», – йхIвитI ауи.
АсогIа анрыртуаз йгIадгылыз ауагIа асуратгIвра, аршIыйара бзазага къару хъадата йыззалуа чкIвыныргIа щардагIв рылан.
«Сара ауи хIапхъа салалырныс йсгвыгъапI. Са сашIамсуа сурат згIвитI, йызгIвуа гьапшым, схвыцищтарагьи сгIвитI. Ари асогIа апны уынхараква хвы рыквызцIауа щарда цIуата йщаквгылхьаз аъачIвагIагIвчва ъаракIву магIын ду амата йызбитI. Ауи йара анкъвакъврагьи ауаъа айгIайрагьи рыхв рыцIа йщтIнахитI», – йхIватI асуратгIвра тшадызкIылуа Сангулиа Алан.
«Асквш йагъьу асуратчпагIв» согIа Апсны апны йапхъахауата асквш 2002 агIан йакIвшатI. Ауи азаман ауацIа анкъвакъвра ауи йгIалаллауа апсуа суратгIвгIвчва хвду азырбауа йцатI. ЦIыпх йагъьыз нхарата йырпхьадзатI апсуа суратчпагIв ДжьапIуа Батал йсурат абаркIыра «АпсыквцIара». ЙгIвбахуз агыларта гIатнагатI Ампар Адгур йынхара «Тамили ахIаджьрат чвгьа Кампэна Роберти», йхпахуз асогIа «Арка. Сара скъапщыта йсыпхьитI» сурат згIвыз Хинтба Диана йлырттI.
швталра йа тшаншвцIара атахъыпI.