ПIатIу зкву сабашталагIвчва, сайщчви сахщчви!

Адуней апсуа-абаза конгресс ахьызлагьи схъаталагьи Апсны Республика Ахъахвитри АйгIайри рысквш 30 ахъазла сшвайхIвахIвитI.

Асквшква 1992-1993 рагIан йакIвшаз Апсны ауагIа р-Абашта айсра апсуа уагIахъа ртурых йрыцхIагIу, фырралагьи йырчву бгъьыцта йгIалахатI. Йагъьыз рпачви рыпхIчви рща хвыта йазыртйын Апсны ауагIа, цхърагIара йрызгIайыз райщчва рыцта, аквырджьква рыр йапшIагылырныс, ртгIачваква рхчарныс, апсуа-абаза уагIахъа гIащаквырыжьта цри бызшва, культура, ацIасква хвы рзыбара щатата йызму къральыгIва щаквдыргылырныс рылшатI.

РпхыцIа зпсахыз АйгIайра гIатыргата рхъа йшахвиту ахабар андырга амщтахь ауагIахъа айсра йащтагIайыз аэкономика йгьи агуманитар тащахIараква йгIандыршаз абаргвыраква йгIарылсын ркъральыгIвара шгIащаквдыргылхуаши йшдрыбагъьуши джьгарта йазынхун.

Россия дыр-Президентта Путин Владимир Владимир йпа даналырх амщтахь акIвпI Апсны йазрымаз аполитика уыла йабауата тшанапсах, йаргьи ауи абзирала акъраль ахъахвитра адуней апны йалархIвауата йцатI.

УахьчIва Апсны хIара къраль 50 райхIа рпны йбзазауа апсуа-абаза уагIахъа адхIкIылырныс, хIапхъаланаскIьара атурых шIыц хIацыта хIуысквала йыгIгIвырныс лшара гIахIнатитI.

Ансисквшагьи сентябрь а 30 агIан хIара зцрикви заргванкви тынчта йбзазара ахъаз, акъраль апхъала йызлацуш амгIва хIара-хIара йлыхIхныс хIахвитызлара ахъаз зхъа щтIазцIаз афырква гIхIгвалашвахитI. Грузии хIари хIайсра апны айгIайра зыбызшвали здинли йапшым уагIа щардагIв йацыхIчIвпI. Айсра агIангьи ауи амщтахьгьи йхIхъадзгылаз ацзакIыра абах уахьчIвагьи Апсны апны йбзазауа ауагIахъаква адызкIылуа ацхIа шIыцква хънацIитI, азхъацIари абагвынгIври шрызбжьазлуш йазынхитI.

ХъацIара гIазырбаз хIыгIвычIвгIвысква гIахIгвалашвахуата хIара ауат ззабакIуаз абайараква ргIахчара магIныта йамугьи гIалхIкIгIитI. ХIхъа хIахвитызлара, хIымгIва хIара-хIара йлыхIхрала аъащаква хIыжвлара йащатапI, хIаргьи ауат хIрызсакъуа йхIыщтагIайуаш абанпараква йрыхIтхра хIборчпI.

УахьчIва хIара ауат ртынха хвы аквхIцIауамца хIкъраль анкъагIуш, амамыри хвы азазыбари хъгалра анрымазлуш хIуачIвымш хIазынхитI.

ХIара апхъахьылагьи хIадызкIылуа айгвари айщчвари хIрыбагъьуштI, Апсны дара йыртдзыта йызпхьадзауа зымгIва рыхъазла йлашару, зымгIвалагьи йабанархъауа бзазара щаквхIыргылуаштI. ХIацыта хIара йхIылшуштI хвы зквцIауачву хIфырква рхъмаштылра хIуагIа рапхъаламгIвайсри ркъагIари йгIарылахарныс.

Ужвыгьи зны апсуа-абаза уагIахъа йрыуу дзачIвызлакIгьи, Апсны абзазагIвчва, згвы азшIытрала айсра йпшцIаз зымгIва ари йхIызтлапIу амшла сатарайхIвахIвхра стахъыпI.

РахIмат агымхатI, йкъагIаргIатI бзи йыгIбауа Апсны!

ЙХIАРАКIУ АСОВЕТ АУНАШВАЧПАГIВ ЭГЬЗАКЬ МУССА