Адуней апсуа-абаза конгресси амакъымгIаныршагIв Марыхвба Абзагви Апсны апны шIыскI злу чкIвыныргIа йшрызхIуш йазынарху макъымршIыйарала апроект нанардзитI.
Бгъанба Щазина
ЧкIвыныргIи физкультури тшауацIдрыхрала АААК ахъвшара амакъымгIаныршагIв Марыхвба Абзагв дрыцта макъымршIыйарала апроект гIадыршIыцхтI. Анчва закI гIазлайцIаз ачкIвынчви ахIвсси гIаура, ауагIахъа макъымкви амакъым ъамапсымакви йрыхаргIвазара – арат ракIвпI ари гIвысквшахауата йакIвшауа апроект ахачIв хъадаква. Артистква макъымршIыйара апны швапхата йдырхIахьаз ашIаква йрыцагIвыршуштI, амакъым ъамапсымаква йрысуа йырбжьуштI, амакъым зпсы йалу чкIвыныргIа дара рхатI рымазлара ахъазла йырчпара атахъула йрылабжьуштI.
Йшыргвыгъула, апсуа эстрада апны тшгIазырбахьаз ашвахIвагIвчви амакъымршIыйагIвчви 10 мастер-класскI акIвдыршуштI. Апроект Апсны ашIыпIаква зымгIва гIацIанакIуаштI. ШIыцрата ауи йаларцIаз ари акIвпI: аршIыйара рыцIа йызлата йырбауа ачкIвынчви ахIвссакви абыжьква ъаргIвуа астудия апны рашваква анырцIуштI.
ЧкIвыныргIи физкультури тшауацIдрыхрала АААК ахъвшара аунашвахъцIагIв Берзениа Валерий чкIвыныргIа апроект анардзара азыгIальаматра шазрыму гIаликIгIатI:
«ЧкIвыныргIа рахIварала асквш 2023 агIан йджвыквхIцIаз апроект тшауацIнахIрыхитI. Абари йапшу анйараква Апсны йапшым ашIыпIаква рпны йадыгIгалырныс хIдрайгвитI. ХIара ауат ахIвараква хIырхъйата йгIаланахIыркIуа ауагIа рыцIа йшщардахуш хIащтапI. Ауи дасузлакI йыхъаз дызшIысу гIайырбарныс, амакъым адуней тшаланайырхIварныс, йаргьи ауи йылайхIварныс, аъачIвагIагIвчва рбжьагажва даздзыргIвныс лшарапI. Амастер-классква рпны рыцIа йгврыхвакву гIалхIхуаштI, уацIыхъван Марыхвба Абзагв йстудия апны ауат йырхIвауа ашваква анырцIарныс лшара рауаштI», – йхIватI Берзениа.
Апроект апкъ йтата йапхъахуз анйара Очамчыра 2-хауа аквтанай апхьарта апны йакIвшатI. Ауи йалан Очамчыра райони Гал къали йрыуата апхьагIвчва 25-гIв. Ауат аъамапсымаква йддрыстI, музыка йапщылу йапшым апрограммаква рддырдыртI, аранжировка йшадынхалуа рархIвтI. Апроект йахъпшылуа Марыхвба Абзагв йара йыршIыйара амгIва даквчважватI, йынхара, астудия лшарата йгIаунатуа дрыквгIашIастI.
«УахьчIва программа зту компьютеркI уымазтын йутахъу макъым йа ашва узанцIуштI. Абыжьква анцIара тшаурыщцарныс щарда гьатахъым, ага дзакIьакIла угылата уангIапшуа ауи баргвызшва йубузтIхIва. Уъадзаламгас, уаламгара ахъаз швхIаусыгIваквакI уъадзарзыпшгIауа йучвыбаргвпI. ЙуымагIальаматызтын – заджвы дгIауцымхърагIауатагьи тшазубжьуштI», – йхIватI ауи.
ЙащтагIайуа амастер-класс мартI йакIвдыршарныс йаквдырпшитI.
швталра йа тшаншвцIара атахъыпI.