Очамчыра апны хъвы-хъвы йакIвшуз ашвахIвагIвчва шIаква ранкъвакъвра «Орфей» алгатI.
Барганджиа Саид
СквшбжакI ауацIа йакIвшуз апсуа саби гврыхваква ашвахIварала ранкъвакъвра «Орфей» июнь а 20 Очамчыра апны йалгатI. АсогIа хъада жвизсквша йырту Микая Виктория йтылгатI, рыцIа пасата йакIвшаз анкъвакъвра ахъвыкI апны АААК йазалхыз асогIа зквшваз Азизова Саида йапхъахауа астепен зму длауреатхатI.
Ари азын Саида щардагIвы зыздзыргIвуа акомпозиция «ЙгIапсаз адзычваква рбзибара» гIалхIватI. Ари ашва зхIвауа збжьы цоктавакIла йыззыпсахуа Кудайбергенов Димаш шйакIву гIаупхьадзарыквын апхIвыспачкIвын хачIв ду лпахь йшлыргылыз гIаугвынгIвитI.
Гран-при зквнадыргаз Микая Виктория афинал апны Дион Селин йылхIвауа «Титаник» фильм йалу ауарад Will Go On («Сгвы кшауаркIвитI» – аредакция ррытаразга) лхIватI. АпхIвыспа йшылхIвауала ауи аномер гIалылхырныс Азизова Саида дгIалцхърагIатI: анкъвакъвра йалаз асабиква зымгIва рапшта ауат агIвыджьгьи араъа йагIвзачвахатI.
Виктория зынгьи йазалхта вокал дгьаднымхалуазтI, ауаса уарад лхIварныс йанакIвызлакIгьи бзи йылбун. ДшайгIайыз лакъыль йазымцадзаскIва ауи дназахвыз алахIвараква хIыцагIвылшун.
«Сара Гран-при гIатызгушта сгьазымпшуазтI, йхпахауа йа йгIвбахауа гылартакI скIыпI-хIва сгвыгъун. Вокал сазызбжьуш арыпхьагIвкI дгIасаута схъа садынхалра, музыка ссырдырра стахъыпI. Ужвы сайгвыргъьахитI ари апш анкъвакъвра шакIвшушыз аныздыр сымшвауата ауи съалалыз. Анчва дырзыразхатI зымгIвагьи, йалкIгIата – сарыпхьагIвчва», – лхIватI анкъвакъвра айгIайыгIв.
Апроект йалаз зымгIва вокал йазылбжьун Цвижба Лика. Ауи лакIвпI анкъвакъвра анахьанат адгалагIвчва йрыцта Очамчыра район дахъыкIвшауа асаби гврыхваква гIалызхуаз.
«Швабыж сайгвыргъьитI анкъвакъвра ъакIвшаз. ЗымгIвагьи анчва дырзыразхатI!» – лхIвитI Цвижба.
Анкъвакъвра йалакваз рашвахIвара хвы аквырцIун ажюри йалаз зуыс здыруа аъачIвагIагIвчва. Ауат дрыуапI йбергьльу апсуа макъымршIыйагIв Гумба Анри (АААК асогIа зквнадыргаз Азизова Саида йылхIваз ашва алазцIаз – аредакция ррытаразга). Ауи йшихIвауала анкъвакъвра апны «дыззымпшуаз йгьи дзыргвыргъьаз щарда дрынйатI».
«СайгвыргъьитI арат рапш саби гврыхва ъахIыму. Ажва гьалам, уыздынхалуаш аъапI, урыдынхалрагьи атахъыпI, ауаса йхъаду – анчва йхъвы рылапI. ЙайгIайыз дгIалхра баргвын. Щарда хIкьангьаштI. Ауаса тамамта йщаквхIыргылызшва йызбитI», – йхIватI Гумба.
АшвахIвагIвчва шIаква хвы рыквызцIуз дрыуан Россия апны йакIвшуз «Голос» («Бжьы») анкъвакъвра апны рыцIа мчыта тшгIазырбаз йрыуазаджву, Апсны апны йакIвлыршауа аконцертквала апсуа пшыгIвчва бзита йырдыруа Мерабова Мариам.
«Апроект йацхърагIаз зымгIва сшырзыразу расхIвра стахъыпI. Апсабара гврыхвара рылата йгIаннаршаз ауи аъарагIвы саби збан сайгвыргъьитI. Ауат апхъала йымгIвайсра, йапхьара атахъыпI, йрылу анчва йхъвы абгата тшгIахъназыртIуаш рытра атахъыпI. «Орфей» сара сыхъазла сыззымпшуаз, угвы зхвгIауа шIыцрата йалтI. Ауи апш надзара амата йакIвшатI! Аномерква зымгIва пшдзата йадгалан. АпшыгIвчва зджьара йгIанымхауата ашвахIвагIвчва йрызбзийын, пхата йырпылуан, мчыта йрыцыркIуан. Сара йахьчIва насып дукI сауызшва саъапI», – лхIватI Мерабова.
Анкъвакъвра ангIаджвыквылбырг йгIашIарышвта АААК ауи йацхърагIун. Аконгресс ахьызла дгIачважватI апхIвыс советква рунашвачпагIв Ардзынба Гета. Ауи адгалагIвчва зымгIвагьи Очамчыра абзазагIвчвагьи «апроект джьащахъва ъагIарыдахIвызла» драйхIвахIвтI.
«Сара анъквакъвра йалакваз ранчваква щардала срызхъвыцуан. УгIари асцена дыквгылата ашва шихIвауа убарныс… угвы зрыпшкауа лахъвгIахъасрапI. Анчва дшвзыразхатI арат асабиква рыхъазла. Анчва дырзыразхатI ари апш гвыргъьахъв адызгалыз зымгIва», – лхIватI Ардзынба.
«Орфей» – асквш 2019 январь-июнь агIан Очамчыра район апны йакIвшаз ашвахIварала анкъвакъврапI. Ауи дагIаджвыквцIагIвхатI Россия ателеканал НТВ апны зхабар гауата йакIвшауа ашвахIварала апроект «Ты супер!» йапхъахуз агIамта апны айгIайра гIатызгаз Адлейба Валерия.
Спонсор хъадата йалтI «Аквафон» компания, Адуней апсуа-абаза конгрессгьи зымгIвалагьи анкъвакъвра йацхърагIун. Апроект йгIаланакIыз асабиква райхIарагIв атгIачва къвльейсызква йрыуапI. Анкъвакъвра ахъвква зымгIва гIауахвырквын ауи жвибжьыгIв алан. Ауат Очамчыра район йауу саби гврыхвапI, ащардагIв ари апхъаала микрофон гьрымкIдзасызтI.
швталра йа тшаншвцIара атахъыпI.