АААК ареспублика апхьагIвчва рзгIвадара рхъвыхрала апроект атаджвыквнацIахтI. Асквш 2024 агIан йапхъахауата йъацаз Гвдауыта район йаланакIуа Уатхара кыт акIвпI.
Бгъанба Щазина
Адуней апсуа-абаза конгресс арыпхьарала, жвлара джьгаррала, згIвадарахчарала ахъвшари (ОСАЗ) Апсны азгIвадарахчара а-Министерстви ареспублика апхьагIвчви арыпхьагIвчви рзгIвадара дырхъвыхуа йаталагахтI.
ЗгIва кIара рыхьуазтын пасата йгIаддырдырта йрайъазара ахIатырла йалакIу рхъвыхра рзадыргалтI Демырджьыпа О.С. йыхьыз зхъу Уатхара аквтанай апхьарта апхьагIвчва 110-гIви 15-гIв арыпхьагIвчви. РыцIа пасата ауат рща дырхъвыхырныс йарттI. Йанырпшуаз атшын ауат рща агIарбараква гIарыртххьан. ОСАЗ хъвшара аунашвахъцIагIв Хагба Изольда йшылхIвазла, агIарбараква гьгвымхам, ауаса зджьакIы кIьыдата айъазагIвчва гIарпшра атахъхушта йаъапI.
«ХIайъазагIвчва шаквшахIатула, ацIайква рзгIвадара аъаща йшабгу йгIауахвырквын уахъгвыргIвушта йгьаъам, ауаса диспансеризация ъакIвхIыршахьаз апхьартаква зымгIва рпны апшта араъагьи йазалху аъачIвагIагIвчва, ажва ахъазла – аофтальмологква, ргватра ззынадырхуш гвбжараквакI аъапI. Апхьарта апны рыгIамта ага джьгарта йыргарыгьи, ацIайква рпынква йанцахра асмартфонква гьырнапIыцIырхуам, даргьи йрымдырдзакIва рылаква зарар ддрадзитI. АйъазагIв-реабилитологгьи ацIайква рмахъа-щахъаква рыцIа йындырхара, азгIвадара зрыбагъьауа физкультура рчпара шатахъу гIаликIгIитI, йауа ухIварыквын, ари апхьарта йахъазымкIва Апсны шабгу апынгьи щардагIвы сколиоз, киофоз-агьиква рымапI, заманкI агIвсырквын ауат рыцIа мчыта тшгIаддырдырхуаштI», – лхIватI Хагба.
АпхьагIвчви арыпхьагIвчви йырпшытI аъачIвагIагIвчва: аневролог Конджариа Саида, апедиатрква Уатырба Ангелини Рогова Натальи, аэндокринологква АмкIваб Ренати Гуниа Радмили, алор-айъазагIв Чалмаз Вероника, акардиолог Фет-оглы Ирина, ультрабжьыла азгIва щаквзыргылуа айъазагIв Габова Лариса, ауролог Смыр Давид, ареабилитолог Агрба Арзадин, аофтальмолог Джоджуа Анжела, амедахщчва Тарба Алини Берзениа Иналити.
Ари азын ацхърагIагIвчвагьи рыцIа йщардагIвын. Адиспансеризация йалалырныс дара йыртахъыта адгалагIвчва тшырзынадырхатI СогIвым амедицина колледж апхьагIвчва, датшагьи йгвалымсым ачкIвынчви ахIвссакви. Амедколледж апны йапхьауа Курт-оглы Мадина йшылхIвазла, ари йапшу ауысква рпны йайъазагIвхарныс зтахъкву аъачIвагIагIвчва шынхауа йапшуа, йрызгIайквауа йшрачважвауа йаздзыргIвуамца щарда тшырзырбжьитI.
«АйъазагIвчва хIанырцхърагIауа хIара йыгIбитI ауат ацIайква йшрыцынхауа, йшдырхъвыхуа, йзырбзихуш хъвшвыта йырзыгIарыгIвуа. Ауатква зымгIва хIылаквала йъагIбауа магIын ду амапI», – лгвгIанаграква хIыцагIвылшатI Курт-оглы Мадина.
ОСАЗ хъвшара аъачIвагIагIв Хьышба Науыр ацхърагIагIвчва зымгIва дырзыразта йхIватI.
«Адиспансеризация йгIалалуа дзачIвызлакIгьи йыхъвдаквырцIаз ауыс джьауапкIра йылата дъадгылуа абзирала хIынхара агалагьи йласхитI. Ауи ззысхIвауа айъазагIвчви аволонтеркви йгьырхъазым – сразыра ажваква арыпхьагIвчвагьи ан-абачвагьи йырзынасырхитI. Ауат ари ауыс йшазаъу аныгIбара хIынхара шабгу закIы йшахъвауа хIылахIхIвитI», – йпхьадзитI Хьышба.
УахьчIвала Уатхара апхьарта апны гIвмедахщчва нхитI, ауат йатахъхарыквын апхьагIвчва йапхъахауа амедицина цхърагIара дрызрайдзуштI. Ауаса арыпхьара йахъпшылуа Абыджьба Саида йшгIахIалхIвызла, апхьарта апны асабиква рзгIвадара йалакIыта йдмырхъвыхсищтара жвыхвсквша цIитI.
«Амш ауацIа хIсабиква апещква зымгIва йгIаркIылсуамцара йгIарпшытI, ауыгьи – хвыдъа. ХIаргьи ан-абачвагьи ага тшхIрыгIапсаргьи айъазарта хIцата мшкIыла гIвыджь-хыгIв айъазагIвчва райхIа хIгьызгIаркIылсуашым. ХIара хIыхъаз магIын ду амапI зджьарагьи хIымцауата, кьазу хIазымпшуата ауыс ъахъвдаквыцIуа. Анхара бзидздзата йадгалапIта – угвы кIарала йбжахушта йгьаъам», – лхIватI ауи.
Апсны акытква рапхьартаква рпны диспансеризация адгалра – Адуней апсуа-абаза конгресс йгIаджвыквнацIата ареспублика азгIвадарахчара а-Министерства ацхърагIарала йдырхъйауа проектпI. ЦIыпх апроект апкъ йтата 19 кыткI йрыуата апхьагIвча 1500-гIв рзгIвадара дырхъвыхтI.
швталра йа тшаншвцIара атахъыпI.