АААК, «Алашара» адкIылара йгьи Трыквшта апсыуа культура квтаква рфедерация йацакIвдыршауа агвчIагIвчпара акция «Агвы апхара» Апсны апны асквш шIыц агIаталымта йджвыквылуаштI.
Барганджиа Саид
АгвчIагIвчпара акция «Агвы апхара» абзазара йаларыжьуата Апсны апны цхъарагIара йазыбжу атгIачваква агъын чгIвыча комплектква рзыршуштI. Ари ауыс асквш 2019 январь мыз аквта йджвыквылуаштI. Ауыс йадгалагIвпI Адуней апсуа-абаза конгресс, Трыквшта апсыуа культура квтаква рфедерация (Апсуафед) йгьи «Алашара» адкIылара.
ЦхърагIара рыцIа йазыбжу атгIачваква йырзыршуштI гъын чгIвыча шIыц – ащапхъацIаква, акIвохвтаква, акурткаква, ашашыхвква. Ауат атгIачваква йашIыпхьадзата йызну ашвъаква Апсны Республика арепатриация ауысла аминистерства, Апсны анхара, анхара адкIылазлара йгьи асоциал адгалра рминистерства ашIыпIа хъвшараква, «Киараз», Хьапщ джьуар, адиннкъвагIвчва рыжвлара адкIылараква йгьи Къарча-Черкес апны йаныргIалу «Алашара» адкIылара гIарцхърагIумцара АААК йадыргалтI.
Акция йгьи Трыквшта апсыуа культура квтаква рфедерация ауи йъалу даквчважвауата абашталагIвчва апхъанчIви псадгьыл апны ргIацарпахрала Апсуафед акомиссия аунашвачпагIв Бычкуриа Эрджан йрыбагъьатI абаза уагIа руысхагIвчва «ауралагьи апхъанчIви псадгьыл абзазагIвчва цхърагIара рзадыргаллара» шатахъу.
«ЧкIвынргIа ртшадкIылра хIрыбагъьара шатахъу гIахIгвынгIвуата хIара апхъапхъа асабиква руыс джвыквхIцIарныс йщаквхIыргылтI – адиаспора апынгьи апхъанчIви псадгьыл апынгьи ауат абахъмаштылуата йащтаныкъварныс ахъазла. Адуней апны хIара хIъабзазауа гьакIвым йхъаду – йхъаду хIъанызлакIгьи хIлактагьи хIбзибарагьи Апсны ахьыла йнархазларныс акIвпI», – йхIватI ауи.
Агуманитар цхърагIара йапхъахауа ахъвы Апсуафед йгьи АААК ЙхIаракIу асовет руысхагIвчва Согъвым йгIаргхьатI. Уыжв ласыла ацхърагIара йгIвбахауа ахъвгьи гIадыргалра атахъыпI.
АдгалагIвчва йгIалыркIгIитI акция йкъару шалайцIаз Согъвым йтабзазауа ахIаракьатчпагIв Отырба Денисгьи. Ауи АААК ауысхагIвчва йриттI саби хъвмарга щарда.
СынчIва сентябрь мыз агIан АААК ЙхIаракIу асовет йалу ХIапIатI АхIмад йгIаджвыквцIарала Трыкв апсыуа-абаза диаспора йадыркIылын йгIарщтитI чгIвыча пхата комплект 1200 Апсны апны цхърагIара йазыбжу атгIачваква рыхъазла. Ауат йрыуата 400 саби чгIвычапI, 250 – хъацIа чгIвычапI, 550 – пхIвыс чгIвычапI.
А-Конгресс анхагIвчва акомплектква жвабапхьадзара йнадзауата арат агвчIагIвчпара адкIылараква йырзыргатI: Согъвым йгьи Согъвым район радкIылара «Апсны уагIа р-Абашта айсра аныкъвадыкъваква рассоциация», «Асквшква 1992-1993 рагIан йакIвшаз Апсны уагIа р-Абашта айсра йалаз апхIвыс ныкъвадыкъваква рассоциация», «Киараз», датшагьи. АчгIвычаква рызбжа Апсны республика репатриацияла аминистерства апынгьи йщтIарцIатI.
Трыквшта йбзазауа апсуакви абазакви гуманитар цхърагIарата йгIарщтийыз ачгIвыча пхаква рыуа азджьакI октябрь а 18 Гагра къала йтагылу ареспублика реабилитация квта йаъу Апсыуа уагIахъа р-Абашта айсра ныкъвадыкъвата йгIахъынхIвыхкваз йрырттI.
швталра йа тшаншвцIара атахъыпI.