Голандзиа Эсма

«Абаза» культура-спорт фестиваль йахъвыкIта VIII Абаза хъвмарраква акIвшатI. Афестиваль сквшигIадзагьи Абаза-апсуа уагIахъа ртшауацIыхра ацхърагIара знархару «Алашара» Дуней адкIылара йаднагалитI. СынчIва анкъвакъвраква Псыжв кыт апны йакIвшатI. Ауат йрылан КъЧР йауу абаза кытква, Черкесск къала йгьи Апсны Республика рыхьызла йгIахъвмаруаз жвакомандакI. Ахъвмарраква рпны согIа хъадата йбжьапI аджьаз йгIалху, ауагIахъа дамыгъаквала йрыпшдзу йамдахауа акубок. Ауи адарыкъвактква йрызгIаргтI цIыпх йакIвшаз анкъвакъвраква рпны йайгIайыз Къвбина кыт ргвып.

Ахъвмарраква ргIахътIра йазынархаз айззара йалан Къарча-Черкес а-Хъади а-Правительстви рунашвахъцIарта аунашвачпагIв Уаз Мурат, АААК ЙхIаракIу асовет аунашвачпагIв, «Алашара» жвлара адкIылара апрезидент, КъЧР а-Парламент аунашвачпагIв йтарагылыгIв Эгьзакь Мусса, асенатор, Россия а-Федерация а-Совет наукали арыпхьарали культурали акомитет йалу Галушина Римма, АкъральыгIва Дума ауагIахъа уысквала акомитет аунашвачпагIв йапхъахауа йтарагылыгIв Гильмуддинов Ильдар, АкъральыгIва Дума адепутат, ауагIахъа уысквала акомитет йалу Удальцова Анастасия, Петр Ду йыхьыз зхъу, РАН йаланакIуа Антропологии этнографии рмузей (Кунсткамера) адиректор Головнев Андрей, Апсны а-Парламент адепутат, АААК архъйагIв секретарь Гыцба Инар.

«ХIара зымгIвадзугьи йпшдзу хIкультура ахъазгIваца хIгьалам – ауи амца нкъвыгIгитI. Арат ахъвмарраква акъаруи аспорт дахIвракви йгьырхъазым йызгIарбагу. Ауат хIара хIайщчвари хIгIвычIвгIвысра амчи гIадырбитI. ХIара хIанацу хIъапсыуу йгьи хIъабазу йахъазымкIва йалакIу хIымч апшдзаралагьи хIацзакIыпI», – йгIаликIгIатI асасчвагьи анкъвакъвраква йрылазгьи тшырзынайырхауата Эгьзакь Мусса.

Йапшым анкъвакъвыртаква рпны абакIра мчын. Ахъвмарраква йапшым аспорт квпшыраквала йакIвшун: мини-футбол, волейбол, апхънысра, датшагьи. Ауи акIвымкIвагьи апшыгIвчва рыуа йызтахъу дзачIвызлакIгьи дызлал йауашыз анкъвакъвраква рзадыргалтI.

«Сара гIванхауата араъа сгIайитI, анкъвакъвраква швабыж йсгвапхитI, ауи йгIалцIла сымнакIгIакIуата сгIайырныс йаквскIтI. ХIволейболасчва гвып бзита тшхIрыхIазыртI. ХIара спортгIваца хIапщылата хIгьаъам – хIынхитI, хIапхьитI. Ага ауаса йаъазтынгьи, заманкI шхIауаз аспортзал хIыгIвуан. ХIыззынадзахьаз ахIаракIыра апны тшыкIра атахъыпI», – лхIватI Апсны аволейболасчва ргвып йалу Хагба София.

Йазланкъваквъуаз аспорт 11 квпшыракI йрылан ауагIахъа йырцIасугьи: нахъгIахъра, ащъа хъалра, хрихыцаущтра.

«Ага амара гIакIачIчIузтынгьи, анкъвакъвраква мчыта йакIвшитI, араъа ушпсыпнкъвгауа ажвала йгьузыхIвушым. Скоманда 35-гIв алапI, зымгIвагьи айгIайра йазгIашыкъпI. РыцIа йымчу йакIвпI айгIайра тызгуш, хIара рыцIа хIымчхара ахъазла тшахIырщуа хIанкъвакъвуаштI», – йхIватI Апсны агвып ркапитан, чкIвыныргIи физкультури тшауацIдрыхрала АААК ахъвшара аунашвахъцIагIв Берзениа Валерий.

СынчIва ахъвмарраква зны йапшымкIва уагIа щардагIв азырддатI. Анкъвакъвраква йырпшырныс 8000-гIв райхIа гIайтI. Араъа йаъан Апсны, Италия, Россия йапшым аштаква – Москва, Къабард-Балкъар, Ставропольшта йгIартыцIыз асасчва. Ахъвмарраква йшцIасхаз апшта «Алашара» йакIвнаршауа «Абаза» фестиваль йахъвыкIта йалитI.

«Асквш 2014 йгIашIарышвта ахъвмарраква Эгьзакь Мусса запхъа дгылу «Алашара» йаднагалитI. ХIара бзита йгIахIцхърагIитI аволонтерква, апхIвыс советква, ажвлара советква, акытква рунашвахъцIартаква рхъадаква, згвы цхIауа, «закIыла хIшвыхъварныс хIгIайтI» – хIва йгIахIыдгылуа ауагIа», – йхIватI Черкесск апны йгIаныршу «Алашара» ахъвшара аунашвачпагIв Мыква Мурат.

Аспорт анкъвакъвраква йырхъазымкIва ауагIа араъа рыла зладырпшуаш щардан, ахъвмарыртаква нхун, агIарбартаква адгалан, абаза рызкъква рмацIауан.

Анкъвакъвраква ргIарбараквала апхъагылара гIатыргатI, йамдахауа акубокгьи нарахвтI ЙынджьыгьчкIвын ргвып. ЙгIвбахауа агыларта Къвбина, йхпахауа – АлбыргIан йыркIытI. Апсуаква ргвып пщынхауата волейболла анкъвакъвраква рпны йайгIайтI.

ЙащтагIайуа аспорт фестиваль акIвдыршарныс Апсуа кыт йрыквдырпштI.

АйгIайыгIвчва рсогIаква анрырт амщтахь агвыргъьахъв йалаз Абазашта йагъьу артистква злаз аконцерт йапшытI.

Бзила хIанйатI IХ Абаза хъвмарраква рпны!