Аквырджькви апсуакви райсра алгищтара йцIуа асквш 27 йапылуата Атара кыт апны Апсны ауагIа р-Абашта айсра йаладзыз афырква рчвахъабага син гIахъыртIытI.
Асквшква 1992-1993 рагIан йакIвшаз аквырджькви апсуакви райсра апны айгIайра асквш 27 йадахIвуата Атара йауата Апсны ауагIа р-Абашта айсра йаладзыз афырква рчвахъабага гIахъыртIытI. Ахъмаштылра син абзихагIвчви ажвлара адкIыларакви, Адуней апсуа-абаза конгрессгьи рылата, йазыркIкIыз ахчала йдыргылтI.
АААК ЙхIаракIу асовет аунашвачпагIв Эгьзакь Мусса йгIаликIгIатI айсра амщтахь Апсны апны йгIадзынгылуа абанпара хачIвыта йшрыкву "рабашталагIвчва – агIвыма къраль хъараква йгIартыцIта рыжвла ъану р-Псадгьыл рхчарныс йгIайквазгьи рылата – рхъацIари ркърари уахьчIва йбзазауагьи рымщтахь йгIайуаш абанпараквагьи ргвы йштымцIуаш апшта йрылшауа зымгIва рчпарныс".
"Атара кыт апны йдыргылыз асин, Апсны ахъахвитра ахъаз зхъа щтIазцIаз йрыздыргылыз анахьанат ачвахъабагаква йрапшта, афырри апсадгьыл азцIабыргри йыргIарбагапI. Асквшква 1992-1993 рагIан йакIвшаз Апсны ауагIа р-Абашта айсра йазынарху турых зпщылу ашIыпIаква раъаща ахъпшылра рахIа магIын ду зму ахачIвква йрыуапI. Ачвахъабага Атара абзазагIвчви акыт йгIарылцIыз згвы цхIауа ауагIи ркъару адыркIылта йъагIадыршIыцхыз щарда гIаунахIвуата йаъапI", – йпхьадзитI Эгьзакь Мусса.
Ачвахъабага араъа рыцIа пасата йгылаз асин ащатала йдыргылхтI. Йаргьи йшцазла ари хъмаштылра адкIылара шIыцта йалтI.
"Ачвахъабага агIащаквыргылхра зкъару алазцIаз зымгIва анчва дырзыразхатI. Апсны ауагIа рыжвгIванд цкьазтI, рбзазарагьи тынчызтI", – йажва алйыргатI АААК аунашвачпагIв.
Асин аргылра джьгарта далан, ауи ахъаз ахча азикIкIуатагьи щарда йчпатI Атара кыт апны йгIаныршу АААК ашIыпIа хъвшара унашва ахъызцIауа Квициниа Алхас. Ауи йшихIвазла, ачвахъабага ачпара йаквдрыдзыз ахча айхIара Атара кыт йгIарылцIыз ауагIа йаларцIатI. Квициниа йгIаликIгIатI асин "кытла йшдыргылыз".
"ХымызкI руацIа уахъгьи тшынгьи анхараква гьашIамстI. АъачIвагIагIвчва йрыцта ансимшы араъа йаъан акыт абзазагIвчва, йалкIгIата – чкIвыныргIа. Дасу йзычпуз йчпун. Анчва дырзыразхатI гвалымста йгIанымхаз, Апсны ауагIа р-Абашта айсра йаладзыз афырква рчвахъабага аргылра зкъару адызгалыз зымгIва", – йхIватI ауи.
Ахъмаштылра син агIахътIра акъраль аунашвачпагIвчва апрезидент Бжаниа Аслан рапхъа дгылата йгIайтI, зхъа щтIазцIаз айсчва ранчва, ажвлара уысхагIвчва, Апсны ауагIа р-Абашта айсра йалаз гIадгылтI.
Абар атурыхква рыуа закIы. Айщчва цриква АрютаргIа Риади Фариди Сирия йгIатыцIын айсра алагарныс пщымызкI атахъыркIвата Апсны йгIаталхтI. АгIвыджьгьи рабадучва рпсадгьыл апны йбзазарныс ргвалан. Апсны апны ахъачва шIаква айсра йакIытI. АйцIба Риад ауи агIан сквш 28 дыртан, ахIба
Фарид – сквш 41. АгIвыджьгьи кьангьашракIгьи гIарыламшвауата р-Псадгьыл ахчара йазгылтI. Ауаса йцан – Фарид асквш 1993 мартI а 16 Атара апны дщхатI. Риад айсра шабгаз дайсытI, Леон йорденгьи гIайквнадыргатI (аорден Апсны Республика зхчауата зхъа йамайгьдзауата йалкIгIата хъацIара гIазырбаз рыхьыз алархIварныс асквш 1992 декабрь а 4 агIан йщаквдыргылтI – аредакция ррытаразга). Айсра амщтахь ауи Сирия дцахтI, ауаса й-Псадгьыл азшIытра рыцIа йымчыта йгIацIцIтI, йаргьи асквш 2012 агIан Апсны датагIайхын ужвы йъагIадзазгьи араъа дбзазитI, гIвпачви пхIакIи йыгIзитI.
Арютаа Риад ачвахъабага ъагIахъыртIуаз дызцайсквузгьи йыцта дгIайтI.
"Ари амш хIара хIыхъаз хвду амапI. Анчва дырзыразхатI зымгIвагьи", – йхIватI аветеран.
Апсны ауагIа р-Абашта айсра йаладзкваз рчвахъабага синква ареспублика акыт щарда рпны йаъапI. Ансисквшагьи Апсны ахъазла йхъмаштылру амшква рагIан акъраль абзазагIвчвагьи асасчвагьи ауат йрызцитIта хIврапшдза рзыщтIарцIитI – ауыла рабашталагIвчва рфырра пIатIу аквырцIитI.
швталра йа тшаншвцIара атахъыпI.