Египет апсуа-абаза диаспора ауысхагIв джьгар Абаза Мона Омар йцIыхъвахуз линтервью апны зтахъыраква намхъауа ауагIа гвчIагIвчпара цхърагIара шырзадылгалуаз даквчважватI. Ауи июнь а 13 атшын лгвы ашIастI, адуней лхIваджьтI.
АААК ахабарргарта портал Абаза Мона Омар йлыцакIвхIыршаз айчважвара июнь мыз йгIаквхIцIарныс йхIрыхIазыруан: агIвыра мшквакIла «йгIахьшватI» йгьи афыр дъадзабгаз йгьгIаквымшватI. Ауи июнь а 13 лгвы акIын дпсытI, лныбыжьла сквшы 72 дыртан. Аредакция анхагIвчва сквшкъомкI руацIа забашталагIвчва джьгарта йырзынхуз ари агIвычIвгIвыс джьащахъва ларгванкви лцрикви йрыцджьабитI. Аинтервью псахракIгьи алахIымцIауата йгIаквхIцIитI. Абаза Мона Омар йакIвлыршуз ауысква гIазшIылкIгIаз ланду лакIвын, ауат апхъахьылагьи йшIымчIвауата йшымгIвайсуаш йазхъахIцIитI.
Барганджиа Саид
Египет апсуа-абаза диаспора рпны джьгарта йынхуз ауысхагIвчва дрыуазаджвта Абаза Мона Омар сквшщарда рурала лабашталагIвчва рквтала гвчIагIвчпара нхара ду акIвлыршитI. АпхIвыс йшылпхьадзауала, АбазаргIа ртгIачва йрыуата зтахъыраквала йбжу ауагIа дъарцхърагIауа ланду Азиза асквш 1960-ква рагIан йгIаджвыквылцIаз ауыс налырдзахуата йылпхьадзитI. Асквш 1983 агIан ланду данпсы амщтахь Абаза Мона Омар «ауыс бзиква рнардзара» лара-лара борчта йналахвтI.
ЙгIашвхIыргвалашвахпI, Египет апны апсуа-абаза диаспора йаланакIуа Абаза зхьзу ткъвымзаджвыкI акIвпI, уахьчIва, йшырхIвауала, ауат рпхьадзара 1000-гIвы раъара йнадзуштI. Ауат «АбазаргIа ртгIачва» – хIва йрыпхьитI: адиаспора йауу зымгIвагьи тдзахьызта Абаза нкъвыргитI («атгIачва» йрыуу азджьакI рапхъанчIви тдзахьызква рзыгIахчатI, азджьакI йырчвыдзтI – аредакция ррытаразга). Египет апны зщала йапсыуу, йабазу рквтала, анахьанат ауагIахъаква йрапшта, цхърагIара йазыбжу агагIвгьи аъапI, ахчалазтынгьи датшалазтынгьи. Абарауи йапшу ацхърагIара адылгалитI Абаза Мона Омар. Ауи АААК ахабарргарта портал швапхата йрызгIалгтI щарда мцIуата йгIаладзаз атшазынархара.
«Ари амчбыжь апны пхIвыскI дхIызгIайтI. Ауи сквшы 30 дыртахуштI, мачIкI дчмазагIвыпI. Лаба хысквша рапхъала псхастала дыдзтI. Лхъазы дбзазун. МызкIы апхъала гIвычIвгIвыс бзикI дылгвапхатI, ауаса ахча гьлымамызтI. Египет апны ацIас шаъула ахъацIа тдзы гIайаута йхвгIара, электрокъарула йынхауа аунагIва техникала йадигалра атахъыпI, апхIвыс апсауатли аунагIва йатахъхуш анахьанат ахIапчыпкви гIадылгалитI. ХIара АбазаргIа йрыуата ауи йылцхърагIарныс йзылшушыз зымгIвагьи гIахIрайгватI, ахчата фунт зыкь 29 (Египет апны фунткI уахьчIвала Росссия асомла йгIауахвырквын 3,9 надзитI, США адолларла – 0,006 – аредакция ррытаразга) азхIкIкIын йлыхIттI, ларгьи йылтахъыз шабгу лзаквыршватI», – лхIватI Абаза Мона Омар.
Ари йапшу агIаншараква мачIымкIва дрынйатI Абаза Мона Омар. АгвчIагIвчпара адгалагIв йшгIалылкIгIазла, йгIаншалитI агIвычIвгIвыс ахча ауысла гвжвайыгIва даналашвауа, ауи асхъан къральыгIва цхърагIаракIгьи йбжара гьнанархъум. Ажва ахъазла, пIатла амамкIва ачымазагIв ркъьарала йайъазара анатахъхара.
Абаза Мона Омар ахчала дшырцхърагIуш дащтапI абитуриент шIаквагьи.
«ХIара чкIвын гвыбзыгъакI дхIыман, ауи Америка ауниверситет дыцIалырныс йтахъын, ауаса ауи ахчата йатахъу аъара гьйымамызтI. Египет апны ауниверситет уыцIалырныс ахъазла ахча щарда гьатахъым, ауаса ауи США апны дапхьарныс йтахъын, ауи ахъазла ахчата йатахъу агалагьи рыцIа йщардапI. ХIара ауи хIицхърагIатI, дыцIалтI, дапхьан дгIайхтI, ужвы дынхитI. Ауи даныцIалуаз йыхIтыз ахча гIацайырпахырныс йтахъын, ауаса сара ахча йазыбжу датша зджьакIы даларцхърагIанысла сйайбжьатI», – йгIацылцIахтI Абаза Мона Омар.
Ауи йшылхIвазла, АбазаргIа йрыуу зымгIвагьи йанатахъхара дасу йшйылшауа йгIаквхта ахча аларпситI. Абараса ланду Азиза сквшы 50 райхIа цIуата йгIаджвыквылцIаз ауыс магIны шаму, йшатахъу абзазара йгIанарбатI. Ужвы лара Абаза Мона Омаргьи дандупI, загIа йнадзаз лгIариква рычкIвынгьи цхърагIара йазыбжу рыхъазла йаназыркIкIуа ахча алайцIауа далагатI.
«Спа йпа мызквакI цIитI дынхауищтара, ауи ауниверситет дгIалгатI, США ауниверситет апны сквшквакI дынхатI, ауаъа дбзазатI. Ужвы ауи Египет дгIацапахтI, йаба дйыцта инженерта дынхитI. Са ауи араса йасхIвтI: ужвы уара нхаша гIаугитI, цхърагIара йазыбжу тшыткI рзалухрала атахъыпI. Абар пщымызкI-хвымызкI цIитIта йазхIкIкIуа ахча йхъвы гIалайцIитI. Абараса акIвпI ауыс хIшадынхалуа», – йгIахIгвынлыргIвитI Абаза Мона Омар.
ЙалкIгIата ауи уыс анылщардахауа агвыргъьарамшква ангIаталра акIвпI: Абаза Мона Омар йшылхIвазла, ауат амшква рагIан «ауыс рахIагьи дазгIашыкъхитI».
«Атара дуква йыртата асабитгIачваква, асаби йыбаква рыгIзартаква рпны афачIвква хIщтийитI: прунджь, хвша, фачыгIв, чай, ауасамцара. Асабиква чгIвыча, щапхъацIа согIата йырзыгIгитI, йшIыцмызтынгьи рквпшырала йбзийыркIвата», – лхIвитI ауи.
СынчIва апрель мыз агIан Адуней апсуа-абаза конгресс ауысхагIвчва ргвып Египет нхара уысла йаъан. Ауаъа йъадзаныз магIын ду зму анйараквакI рыман, Египет йбзазауа Абаза ткъвым йрыуу щардагIвгьи аргваныта йрабадырныс, йшацынхушла йрангIалырнысгьи рылшатI.
Фото 1: Абаза Мона Омар лпа йпхIи лари
Фото 2: Абаза Мона Омар лтгIачви лари
Фото 3: Абаза Мона Омар лпхIа Абаза Иман лсабикви лари
Фото 4: Асурат апны: Абаза Мона Омар данхвыцыз
швталра йа тшаншвцIара атахъыпI.