Адуней апсуа-абаза конгресс ахабарргарта портал Россия рбоксер Агрба Харитон спорт апны йгIамидаз амгIва йгIаквчважвауа бзагIвра арыхIазыртI.
Агрба Харитон – Россия йауу, super lightweight (йапхъахауа аквтанай хIатлара) апны йайсуа дпрофессионал спортсменпI. Профессионалта дайсуищтара гIвысквша цIитI, заджвгьи дгьгIайамигIайстI: 12-н дайсын а 12-нгьи цкьата дайгIайтI.
Йсабихъи йчкIвынхъи
Агрба Харитон асквш 1995 октябрь а 22 агIан Апсны Республика апны дйытI. Йапхъахуз асквшква йцри къала Гагра йтайгатI. Хвысквша дыртата йтгIачва йаргьи дрыцта Россия йаланакIуа Ростов шта апны йаъу Волгодонск къала йталхтI.
Волгодонск йаъу «Олимп» спорт клуб апны йынхауа боксла асекция ауи йапхъахауата данага жвасквша дыртан. Ауаъа дзырцаз йаба йакIвпI – ауи йпа дшхвыцыз далаган спорт бзи ййырбун. Йара Харитон йымгIва ахъа араса йгIайгвалашвахитI:
«Санхвыцыз сайсгIвыта зынгьи сгьаъамызтI, амакIыракI гIаншарыгьи ауи тынчта йшалсыргуш сащтан. Ауаса сыгIвзачва смахъаква шбагъьу, тамамта скшауа тшызбжьарквын сшайсыгIв мчхуш гIасархIвуамца йхъасдырцIатI. Сгвтара саба йанйасхIв асекция сйырцатI".
Абауи апшта жвасквша йыртаз Харитон йбзазара тшапсахтI – ансимшы йызпшуаз апхьарасахIатква йхъурыпа йамуашыз атшыбжьараквагьи гIарылалтI.
Харитон дъанырцIаз асекция унашва ахъицIун, йапхъахуз бжьагIвытагьи дизалтI Тимофеев Николай. УацIыхъван апрофессионал ринг апынгьи йапхъахуз йчIвырхъаква зпщылазгьи йара ауи йакIвын.
Асквш 2013 агIан Харитон апхьарта дгIалган Ростов къральыгIва экономика университет (РИНХ) дыцIалтI, ауаъа экономика амагистр йдиплом йымата дгIацIцIхтI.
Аквтанай йгьи йхIаракIу апхьартаква рпны данапхьуз агIамта ауацIа Харитон квтанайбжа йгьи йапхъахауа аквтанай хIатлараква змаз абоксерква рквта Россия апны йгIвбахауа агылартаква йкIытI, Россия йалакIу агвып днарахвтI, Европа хъвмарраква йрыланакIуаз боксла анкъвакъвра апны рызна медаль гIатигатI.
Агрба Харитон ъачIвагIата йымчпасыз абокс
Асквш 2017 агIан Чачан Республика апны йакIвшуз боксла Россия ачемпионат апны Харитон килограмм 69-дза зчакьквуз рквта рызна гIатигатI. Ауи адахIвра абзирала Агрба Россия йалакIу ргвып дрыларцIатI.
Асквш 2018 агIан Якутск апны йакIвшуз боксла Россия ачемпионат апны Харитон килограмм 69-дза зчакьквуз рквта йгIванхауата рызна медаль гIатигитI.
Асквш 2018 февраль агIан ауи Болгария акъала хъада София апны йакIвшалауа «Кубок Странджа» зхьзу, чва зхъарбауа адуней анкъвакъвра апны афиналбжа апны Къазахстан йауу апрофессионал боксер Маралов Канагат, афинал апынгьи Иран йауу апрофессионал боксер Поштири Саджад Каземзаде драйгIайын апхъагылара гIатигатI.
Асквш 2019 агIан Россия йалакIу акоманда абжьагIвчва Минск апны йакIвшушыз Европа хъвмарраква йцушыз агвып дрыларцIарныс йыквдырпшитIта, йаргьи ауаъа финалдза днадзитI, афинал апны абритан боксер Маккормак Пэт йпны дгIалахитIта рызна медаль гIатигитI.
14 сквша рымщтахь – апрофессионал мгIва
Бокс ъачIвагIата йымчпауата 14 сквша данайсы амщтахь, асквш 2019 декабрь а 13 атшын Агрба Харитон «Face to face» ларпшра апны квтанайбжа хIатлара змаз дрылата йапхъахауата апрофессионал ринг дыквлитIта ауи апхъала заджвы йпынгьи йгIаламхасыз Россия йауу абоксер Абдиев Шохрух дйайгIайитI – асудьяква зымгIва ацшIакIта айгIайра Агрба йырттI.
Асквш 2020 агIан Агрба Харитон Адуней бокс адкIылара (WBA) тшапищылитIта знадзара рыцIа йхIаракIу анкъвакъвраква дрылалитI. Панама йаъу Arena Roberto Duran спорткомплекс апны йакIвшуз анкъвакъвраква рпны ауи хдакъикъакIла Мексика йауу абоксер Рамос Флавио Сезар дашIйырццын йапхъахуз асогIа гIатигатI.
Атшыбжьараква ашIайымрысуамца ауи «Крылья Советов» спорт клуб Москва йаъу ауниверситет апны Армения йауу Диланян Манук дйайгIайитI. Ауаъа WBA Continental аверсияла аконтитент ачемпион йыхьыз пшцIан, Харитонгьи ауи гIайынхатI.
АААК ахабарргарта портал дгIарачважвауата абоксер йдахIвраква лшарата йызчпауа закIгьи дъагIашIанамкIуа, йгIайпшIагыллакIгьи дъайчвымшвауа акIвта йхIватI. АйсракI анипыру ауи йазалхта тшгьазичпум – ансимшы йчпауа ауысква йхитI, дызтагылу амш алаща дгьтыцIуам.
«Уыста йукIуа бзи йубузтын, ауи угвы арчIвузтын укъаругьи абгата йаутуазтын – ауи агIан акIвпI дахIвра ануымазлуш. Абзазара йашIамсуа хIархъвыхитI, умурад уазынадзара ахIатырлагьи ауи уаззырцуш ачIвырхъаква зымгIва атупра атахъыпI. Умурад заъара йхIаракIу уымгIвагьи баргвхитI», – йпшыща хIыцагIвишатI ауи.
УахьчIвала Агрба Харитон йхIатлара – килограмм 63-и бжакIи апны заджв йпынгьи йгIаламхас дпрофессионал боксерпI.
ХIызту асквш мартI мыз агIан Агрба 11-хуз йайсра акIвшатI, ауаъа ауи ГIвадахь Африка уахьчIвала йачемпиону дйайгIайтI. Агрба Харитони Дломо Принци райсра Екатеринбург аспорт хъвмарраква р-Тдзы апны йакIвшатI.
АААК ахабарргарта портал дгIарачважвауата аспортсмен апхъахьыла ймурадква хIыцагIвишатI, Апсны апны спорт атшауацIыхща йыла йшгIацIайжьуагьи йхIватI.
«Апсны апны са гIвзачва щардагIв сымапI, ауати сари хIабадырра гьапышвтуам. Ауат йрылапI спорт ахъаз бзи йызбауагьи апрофессоналквагьи. Са йызбитI хIыуа дзачIвызлакIгьи швапха амидарныс дшхIазыру. Ауи магIын ду амата йспхьадзитI. ЗакI гIазлыцIуаш чкIвыныргIа аъапI, ауатI цIагыла йазыбжапI. ХIара зымгIвагьи Апсны бзиракI азыхIхара ахIатырла хIнапIтараква ачIвымыгъ йхъахIымрышвхуата хIхъа хIадынхалра атахъыпI. Са сыхъаз магIын ду амапI сабашталагIвчва съарабадыруа, швапха ъамыздауа. Уыжвласыла Апсны аспортсмен шIаква рыхъазла мастер-классквакI адыгIгалырныс лыхIхтI», – йхIватI Агрба.
Асквш 2023 апрель а 28 Душанбе апны йадыргалыз бокс ахъвлапын далата Харитон апрофессионал ринг апны 12-хауа айгIайра гIатигатI. 8 раундкI йнайра атахъыз Узбекистан йауу абоксер Нематов Мирзакамоли йари райсра йпщбахуз араунд апны техника нокаутла йалгатI – ауи аспортсмен профессионалта дайсуищтара йагIбахауа нокаутпI.
ЙницIыз асквш 27 руацIа Агрба Харитон 400-н айхIа дайсытI. Апрофессионал ринг апны 12-н дайсын зымгIва рпны дайгIайтI, агIны – нокаутла.
Агрба Харитон Апсны йауу дпрофессионал спортсменпI, анкъвакъвраква Россия ахьызла дрылазлитI. УахьчIвала ауи дуней класс зму спорт дамастерпI, боксла Россия ачемпионатква рпны гIван – асквшква 2017 – 2018 рагIан – рызна согIа гIатигатI, WBA Fedecaribe, WBA Continental йгьи IBF European хьызква нкъвигитI.
швталра йа тшаншвцIара атахъыпI.