«Абаза» культура-спорт фестиваль ацIаскви ауыжвгIанчIвири адызкIылуа, апсуа-абаза уагIахъа рацзакIыра гIазырбауа гIаншарапI. Афестиваль июль а 23 – Апсны акъральыгIва баракъ андрыбагъьа амш йаквшвауата йакIвшалитI.
Бгъанба Щазина
Ари ауагIахъа гвыргъьахъв ари жванхауата йакIвшитIта – сквшигIадзагьи рыцIа-рыцIа тшауацIнахитI, йпшдзахитI, йбайахитI. ЗымгIва йагъьу ацIасква йыртагылапI: агIахIвраква, ашваква, ашарабзараква, анхагIвчва напI ъазаква йырчпауа апкъыгIваква ргIарбарта, абазакви апсуакви ранйараква, абаза фаша зышву, ауагIахъа баракъква знапIыцIу ауагIа рамдара – абараса акIвпI йшакIвшауа Черкесск апны акультура амш.
Афестиваль дагIаджвыквцIагIвын Адуней апсуа-абаза конгресс ЙхIаракIу асовет аунашвачпагIв Эгьзакь Мусса. СынчIва ацзакIыра агвыргъьахъв йаюбилейпI – ари йжвабахауа фестивальта йакIвшитI. Ауи йаланакIитI Абаза уагIа рхъвмарраквагьи, ари азын ауи июль а 26 Хъвыжвду кыт апны йакIвшуштI. Ахъвмарраква адыргалитI «Алашара» Дуней адкIылари Абаза уагIа рспорт академии.
«Ари афестиваль йгьахъаз анкъвакъврам. Ауи ацзакIыра йагвыргъьахъвпI, ауаъа хIара йгIадзынгылуа хIабанпараква хIапхъанчIвиква руасаражвра рзынахIырдзитI. ХIара йанакIвызлакIгьи хIгвбайара тынха шгIахIхчуш амальква хIырзыпшгIитI, багъьатагьи йхъасцIитI мгIва тамам хIшыкву» – араса аныпI АААК ЙхIаракIу асовет аунашвачпагIв Эгьзакь Мусса йгIайцхIаз атшазынархара.
Амш хайыр абзазара йгIахъыху афильм «Дзыба йапш угIахIвы!» агIарбарала йджвыквырцIатI. Ауи абалетмейстер йгьи агIахIвыгIв ду Дзыба Георгий йгIайыквчважвитI.
Апрезентация КЧР акъральыгIва филармония апны йакIвшатI. АААК ЙхIаракIу асовет аунашвачпагIв Эгьзакь Мусса йыхьызла йгIайззаз тшырзыналырхауата дгIачважватI афильм гIаныршарала апроект аунашвахъцIагIв Джьмакъвыл Нателла. Ауи йшылхIвазла, Дзыба Георгий йыхъазла кино ахъыхра ауыс бзидздза цIуата йгIаларгахьан, ауаса йдырхъйарныс анрылша сынчIва акIвпI.
«СквшквакI цIуата АААК асайт апны Дзыба Георгий йхабар гIазхIвуз гIвыракI сапхьатI. Ауищтара ауи агIвычIвгIвыс ду йыхъазла фильм хъысхныс сгвы йтата сгIамгIвайстI. ХIара кIара хъыхIхуата Апсны, Дагъстан, Чачаншта хIаъан. Афильм ъадзахъыхIхуаз хIара агIахIвгIвы зхъатала дыздыруаз ршIыйагIвчвата 22-джь ргIачважвараква анхIцIатI. Апрезентацияя апны Дзыба йыцынхакваз, дыздыруаз, йзаъачва гIачважватI. ГвлахIарапI Дзыба Георгий хIара зымгIва хIъатазикIкIхыз», – лхIватI Джьмакъвыл Нателла.
Уыжвласыла афильм Апсны апынгьи йгIадырбуштI, ауи йапшра зтахъкву АААК йгьи «Алашара» рсайтква рпны йрауаштI.
Агвыргъьахъв йгIвбахуз ахъвы «АдзыгIвбжьа йачIва» парк апны йакIвшатI. Араъа нархара-нархара йалыхта агIарбартаква агвныргIвын, ауат абаза уагIахъа ргвбайара гIадырбун, йаъан араъа анапIлачпараквагьи абаза фачIвквагьи ргIарбартаква.
Агвыргъьахъв уагIа щардагIв гIаднагалтI, ауат йрылан ареспублика абзазагIвчвагьи асасчвагьи.
Аконцерт апны апсуа йгьи абаза эстрада артистква рыршIыйара гIадырбатI. Агвыргъьахъв салютла, нашх пшдзала, хIапхъагьи йшанйушла абаргвыгъараквала йалгатI.
швталра йа тшаншвцIара атахъыпI.